Lenkawl

Niminpiah khan Mizoram-ah Sample 5102 zet enfiah leh niin heng atang hian COVID-19 hri kai 364 hmuh an ni a, Sample enfiah atanga za zela 7.13 te chuan hri an kai a ni.

Vairengte tlaklam Assam leh Mizoram inrina bulah nimin khan Assam Police te'n Patrolling neiin Thlam pakhat bakah Kuhva kung thenkhat an tichhia.

Inkhuahkhirhna siamtha

Remna Ni Pual - Pu Laldenga i fak ang u... - K.Remruatfela

Serchhip District-a Press Accreditation pek thar mi 12 te hnenah nimin khan Serchhip DIPRO, K. Saitluanga chuan Press Accreditation Card a hlan.

Serchhip District-a COVID-19 hri danna pek hna kalpui mekah nimin khan kum 18-44 inkar mi 318 te hnenah vaccine Dose 1-na pek leh a ni a, heti hian Serchhip District-a kum 18 leh 44 inkar mi 16,358 te hnenah vaccine Dose 1-na hi pek a ni tawh a ni. Serchhip District-ah hian Healthcare Workers 723 ten vaccine an lak tur an la kim tawh a, Frontline Workers mi 1816 te pawhin Dose 2-na la tawh bawkin kum 45-59 mi 491 leh kum 60 chunglam mi 1349 ten vaccine an lak tur ang an la zo tawh a, Dose 2-na la lo thahnem tak an la awm bawk a ni.

Serchhip District-a COVID-19 hri kai hmuh tawh chu mi 696 an tling tawh.

Serchhip Town Piggery Cooperative Society Ltd. chuan Serchhip District-ah ASF vangin Vawk 891 a thi tawh nia sawiin,heng te hi hri in a man avanga thi leh hri vanga tihhlum an ni tih an sawi a. Tunhnaia AH & Vety Minister. Dr. K. Beichhua-a’n Vawk hri leng meka Vawk tihhlum neitute tan zangnadawmna sawrkar laipuiah dilpui an tum thu a sawi chu sum awmsa ni lo, sawrkar laipui-a dil chawp tur chauh a nih avangin hri leng avanga tihhlum chawp chauh ni lo, hri avanga tuartu zawng zawng, natna avanga amaha thi leh tihhlum chawp te thliar hrang chuang lova ngaihtuah sak turin  an ngen tih an sawi bawk.

Serchhip District-ah Vawk hri leng, African Swine Fever (ASF) vanga Vawk thi chu 691 a tling tawh.

Vawiin June 30, 2021 hi India sawrkar leh MNF ten inremna an ziahna ni, Remna ni vawi 35-na a ni a, sawrkar Pisa chawlh a nih angin sawrkar Pisa te khar an ni anga, hri leng avanga inkharkhipna kalpui mek a nih avangin he ni puala programme ruahman erawh a awmlo thung.

Mizoram sawrkar-a Human Resource Development Board Vice Chairman, L. Thangmawia kaihhruai 'Online Education Committee'  chu nimin khan thukhawmin COVID-19 hrileng avanga School khar ngai leh chumi nghawng avanga zirna pangngai kalpui theih loh laia mumal zawka zirna kalpui dan tur chungchang an sawiho.

Mizoram-a COVID-19 hri kaite enkawl dan chungchang sawihona chu nimin khan Health Minister, Dr. R. Lalthangliana hovin SAD Conference Hall-ah neih a ni a, ZMC Doctor te chuan tun dinhmun ah a hma aiin damlo na zual enkawl ngai an tlem tawh tih an sawi.

Pathianni khan Mizoram-ah Sample 608 enfiah niin COVID-19 hri kai 131 hmuh an ni a, hri kai hmuhchhuah hi tlem deuh mah se Sample enfiah zawng zawng atanga zaa 21.54 te chuan hri an kai a ni.

Congress Legislture Party (CLP) Leader, Zodintluanga Ralte chuan sawrkar laipui Flagship Programme, Housing For All (HFA) tia hriat lar tak, Pradhan Mantri Awas Yojana-Urban (PMAY-U) hnuaia In sakna tur hmanga MNF sawrkarin Party politics a khel chu pawi a tih thu a sawi.

CM leh Governor te kawm

Health Minister Dr.R. Lalthangliana chuan nimin khan a bial chhunga awm, District Hospital Hnahthial tan COVID-19 hri dona atana hmanrua pawimawh tak tak pein, a bial mipuite chu thlaphang lo turin a chah nghal bawk.

Nimin khan Kolasib District Bawrhsap, Dr. H. Lalthlangliana hovin an District-a Bank hrang hrangte hmalak dan thlirhona neih a ni.

Mizo Zirlai Pawl (MZP) General Hqrs. hruaitute chuan nimin khan Higher & Technical Education Minister, Dr. R. Lalthangliana kawmin College zirlai ten harsatna an tawh theih thil pawimawh an sawipui.

Nimin khan Serchhip District-a ASF hri lenna hmunah Vawk thi 35 zet chhinchhiah belh leh a ni.

Serchhip Chhim Veng Branch KTP te chuan nimin khan Serchhip Blood Bank-a dah turin thisen Unit 22 an pe.

Nimin khan Serchhip District-ah COVID-19 hri kai 3 hmuh belh leh an ni.

Serchhip Chanmari Village Council chuan hri leng avanga mipui khawsak harsatna thleng mek phuhrukna atan nimin atang khan an huamchhunga chhungkaw hrang hrangte tan inhlawhna an siam sak.

BJP Serchhip District-a President, PC. Rothangpuia, Thenzawl chuan nimin khan BJP Mizoram State President hnenah BJP Serchhip District President a nihna atanga banna a thehlut.

Inrinni khan Mizoram-ah Sample 3575 enfiah niin heng atang hian COVID-19 hri kai 233 hmuh an ni a, Mizoram-a hri kai hmuh tawh zawng zawng chu 19,324 an tling tawh a ni.

Serchhip Blood Bank-ah thisen dahkhawl sa a tam loh avangin Inrinni khan Royal Riders, Serchhip chuan thisen an pe. Thudawn danin tunhnaiah Serchhip Blood Bank-ah thisen dah-khawl sa a awm hman meuh lova, thisen mamawhna a san avangin Association for Voluntary Blood Donations (AVBD) ten an ngen angin Royal Riders Serchhip te hian thisen hi an pe a, thisen petute hi mi 9 niin mipa vek an ni.

Serchhip District Bawrhsap chuan thuchhuah siamin COVID-19 Second wave avanga nau-pang kum 18 hnuailam mahni khua/Veng chhungah harsatna tawk palh emaw, enkawltu in a thihsan emaw an lo awm thei tih a tarlang a. Chutiang harsatna tawk an awm a nih chuan Child Welfare Committee emaw, District Child Protection Officer emaw hnenah a rang lamin report vat turin mipuite a ngen bawk.

Zirtawpni leh Inrinni-ah Serchhip District-a Sample enfiah atangin COVID-19 hri kai hmuh belh an awm lova, Serchhip District-ah hri kai enkawllai mi 28 an la awm mek.

Inrinni khan khawvel pumah Ruihhlo hman-sual leh tawlhruk dona Ni, ‘International Day Against Drug Abuse and Illicit Trafficking’ hman a ni a, Serchhip-a hmunpui nei 8th Bn. Assam Rifles te pawhin Serchhip khawpui chhung hmun thum-ah Serchhip Bazar-a hmun hnih leh New Serchhip-ah te hun an hmang a, heng hun an hmanna ah te hian Aurinna hmangin damdawi hmansual leh a ngawl veina thatlohna an puan-chhuah bakah inzirtirna thuziak hrang hrangte an tarchhuak bawk a ni. International Day Against Drug Abuse and Illicit Trafficking pual hian Serchhip-a Excise & Narcotics Department te pawhin khawlai hmun hrang hrangah ruihhlo hmansulna laka inthiarfihlim a pawimawhzia thuziak an tar bawk a ni.

Serchhip khawpui chhunga kawng peng-thuam pawimawh pathum ah Serchhip Traffic Police ten Inrinni khan Convex Mirror an tar.

Serchhip District-a Vawk hri leng, African Swine Fever (ASF) avanga Vawk thi chu 771 zet an tling tawh.

 Central YMA in CM-ah thlen

Mizoram hmun hrang hranga Vaimim eichhetu Pangang, Fall Army Worm (FAW) Pangang puang chu la reh fel chiahlo mahse thunun thawkhat a ni tawh.

Kar kalta chhung khan Champhai District-ah Myanmar atanga raltlan 200 vel an lo luh belh leh a, lo lutte zingah hri kai hmuhchhuah an awm lo.

Congress Thalaite chuan Mizoram sawrkar chu COVID-19 avanga harsatna lian tak kan tawh laiin kan mamawh hmasa thliar thiam tura an duh thu an sawi.

Mizoram sawrkar chuan Mizoram-a rualbanlo zingah COVID-19 hri kai an awm a nih chuan anmahni enkawl dan ruahmanna a siam.

Mizoram-ah COVID-19 Thawh hnihna avanga kumin April 20-a Lockdown kalpui leh a nih atangin Inrinni kalta, June 26, 2021 thleng khan Sample 196,889 enfiah ni tawhin COVID-19 hri kai 14,187 hmuhchhuah an ni tawh a. Tun thla hman mek hi hri hmuhchhuah tam ber thla a ni mek bawk a ni.

Higher & Technical Education (H&TE) Minister Dr. R. Lalthangliana chuan College Admission Fee chungchang ah ngaihtuahna sen mek a ni tih sawiin, Department dangte nen inrawn zau a ngaih vangin thutlukna siam a la nih loh thu a sawi bawk.

Indian Medical Association (IMA), Mizoram State Branch chuan COVID-19 hri laka dam tawh anga ngaih te enkawlna hmun atanga chhuah tir dan kalphung (discharge protocol) thlak tawh turin nawr mah se, Mizoram sawrkar in a chuan ala thlak duhlo tih an sawi.

Niminpiah-a Mizoram-a Sample enfiah 3413 atangin COVID-19 hri kai 233 hmuh leh an ni a, Sample enfiah atanga za zela 6.56 te chuan hri an kai a ni.

Serchhip-a Battalion Hqrs. nei 8th Assam Rifles te chuan niminpiah khan Champhai District-a Chhungte khaw dai-ah Champhai-a  Customs Preventive Force nen tangtlangin Methamphetamine mum 20,000 zet an man a, heng ruihhlo kaihhnawih ah hian mi 2 man ni bawkin cheng vbc. 1 hu vel nia chhut a ni.

Serchhip District chhunga khaw 10-ah nimin khan COVID-19 Vaccine pek hna kalpui leh a ni. Kum 18 leh 44 inkar te hnenah COVID-19 Vaccine pek hna kalpui mekah hian nimin khan Serchhip District chhunga hmun 10-ah hri danna hi pek leh a ni a, heng te hi Serchhip Main Centre leh New Serchhip YMA Hall bakah Khawlai-lung, Piler, Sialsir, Hmunzawl, Mualcheng, Leng, Kanghmun South leh North Vanlaiphai te a ni . Serchhip District chhunga COVID-19 Vaccine pek hna hi ngawrh taka chhunzawm chhoh zel tura ruahman a ni.

Serchhip District-ah COVID-19 hri kai la hmuh belh ni zelin nimin thlenga hri kai hmuh chu 689 an tling tawh.

Serchhip District-ah Vawk thi ala awm belh zel a, nimin khan Vawk thi 84 zet chhinchhiah belh a awm leh.

Cheng nuai 4 theuh hlan

Nimin khan Champhai-ah District Bawrhsap hovin sawrkar sikul zirlai inziaklut awm zat leh Schooll kal theih dan tur chungchang sawiho a ni.

Mizoram-a damlo inenkawlna hmanrua leh a kaihhnawih tihchangtlunna turin sawrkar laipui chuan World Bank atangin US Dollar Mtd. 32 loan a puk dawn.

Nimin khan Health Minister, Dr. R. Lalthangliana hovin sawrkar mi pawimawh hrang hrangte an thukhawm a, hri leng avanga inkhuahkhirhna hman mek chungchang bakah vaccine pek mek chungchang te leh Covid hri kai enkawl mek te chungchang bakah thil pawimawh hrang hrang sawiho a ni.

Mizoram-ah COVID-19 hri kai hmuhchhuah thar an la awm belh zel a, niminpiah khan Mizoram-ah Sample 3136 enfiah niin hri kai 226 hmuh an ni a, Sample enfiah atanga za zela 7.20 te chuan hri an kai a ni.

Serchhip BDO Office buatsaihin nimin khan Serchhip-ah ‘Azadi Ka Amrit Mahotsav’ hmalakna hnuaiah hriselna kaihhnawih thil pawimawh inzirtirna hun hman a ni.

Serchhip District chhunga kum 18-44 te tana COVID-19 hri danna (vaccine) pek hna chu chak taka thawh chhunzawm mek zel a ni a, nimin khan Serchhip khawpui chhunga Veng pali (4) te tan Serchhip Main Centre-ah Vaccine hi pek niin Vawiin lam pawh hian chhunzawm leh a ni anga, Vawiin hian Serchhip Main Centre bakah New Serchhip YMA Hall-ah pawh hri danna hi pek tura ruahman a ni.

Govt. Serchhip College NSS Unit ten Ser-chhip leh Thenzawl inkara NSS Plantation an neih chu nimin khan NSS Volunteer ten samfai hnatlang neiin thingtiak an phun belh bawk a. He hunah hian NSS Volunteer mi 17 te chu Prog-ramme Officer, H. Lalchhanhima leh C. Lalram-liana te kaihhruaina hnuaiah thawkin tingtiak 20 an phun belh a ni. Serchhip leh Thenzawl inkar Thuhruk ram-a NSS Plantation hi nikum atanga siam kha niin thing thahnem tak an phun tawh a ni.

Nimin khan Serchhip Darnam Veng-ah COVID-19 hri kai mi 7 hmuhchhuah belh leh an ni a, Serchhip District-a hri kai hmuhchhuah chu mi 683 an tling ta.

Nimin khan Serchhip District-ah Vawk thi 54 zet chhinchhiah belh leh a ni.

MGNREGS hnuaia tuihna tipung tura kum 2019 atanga kalpui tawh, Jal Shakti Abhiyan - Catch the Rain Campaign Serchhip RD Block a kalpui dan thlirhona chu nimin khan Serchhip BDO, Vanlalhmachhuana hovin BNRGSK Hall, P&E Veng-ah neih a ni.

Chaw ei man pek tawh tur

Hachhek bialtu MLA, Lalrindika Ralte chuan Total Lockdown avanga mipui tawrhna chhawk zangkhai nan Electric Bill leh Tui bill awltir rih tura ngenna nimin khan Chief Minister hnenah a thlen.

ZPM Legislature Party (ZLP) chuan sawrkar chu a rang thei ang bera Vegetable Supply Chain kalpui leh turin an ngen.

Mamit District Bawrhsap, Dr. Lalrozama IAS leh SP, Vineet Kumar IPS te chuan nimin khan Saikhawthlir khua-a Border Out-Post (BOP) an tlawh.

Thla leh-a Summer Olympics Games neih tura India Hockey Squad-a tel tura thlan Lalremsiami lawmpuina leh chawimawina hun chu nimin khan Chief Minister, Zoramthanga hovin CM Conference Hall-ah neih a ni.

Mizoram-a tlawngai pawl hrang hrang, Political Party hrang hrang leh Kohhran hruaitute chu nimin khan thukhawmin hripui leng mek doletna kawnga hmalakho dan tur chungchang an sawiho a. BPL leh AAY chhungkua te Sawrkar Bill hrang hrangte Sawrkar-in ngaihnathiam an duh thu an sawi bawk.

Serchhip District-ah COVID-19 hri kai hmuh belh an la awm zel a, nimin thleng khan hri kai hmuhchhuah chu 676 an tling tawh.

Mizoram-ah ni khat-a COVID-19 hri kai hmuhchhuah zat ala tlahniam hlei thei lova, niminpiah-a Sample enfiah 3974 atangin hri kai mi 419 hmuh niin Sample enfiah atanga za zela 10.82 te chuan hri an kai a ni.

Gauhati High Court Aizawl Bench-in Lunglei-a RT-PCR Laboratory bun theih rihloh chhan Mizoram sawrkar sawifiahna hnawlin, sawrkar chuan building awmsa chu khawl bunna turin a ruahman turah a ngai tih a sawi.

Sawrkar in ngenna siam

Tokyo Olympics Games neih tura India aiawha Hockey khel tura thlan, Lalremsiami chu Mizoram sawrkar chuan cheng nuai 25 a pe dawn.

Agriculture Minister, C Lalrinsanga chuan nimin khan Agriculture Research Farm, Neih-bawi, Sihphir chu a tlawh.

Kolasib District Bawrhsap, Dr. H. Lalthlangliana chuan nimin khan thuthar thehdarhtute kawmin hrileng dona kawnga hmalakna hrang hranga mipuite hriat tur pawimawh te a sawipui.

Tunhnaia Central Jail-a tang zinga COVID-19 hri kai hmuh belh an nih chungchang leh Jail tang te himna tur chungchang chu nimin khan Home Minister, Lalchamliana hovin sawiho a ni.

Tunhnaia MBSE in Higher Secondary School Leaving Certificate (HSSLC) Exam result a tih-chhuaha Govt. Mizo Higher Secondary School zirlaite harsatna tawh chungchangah he School Principal mawhphurhna la mektu chu chawlhtir rih a ni.

Serchhip District chhunga COVID-19 hri danna (vaccine) pek hna chu ngawrh taka kalpui chhunzawm zel a ni a, tunah hian kum 18 leh 44 inkar te hnenah vaccine pek hna hi thawh mek niin Vawiin pawh hian kum 18 chunglam te tan Serchhip Main Centre-ah Vaccine hi lak theih a ni leh dawn a, vaccine la la lo tan lak theih a ni ang. Online hmanga inziaklut thiam lo tan pawh a hmunah tih chawp theih niin mahni Aadhaar Card leh Mobile Phone nen kal theih a ni tih Health Department hotute chuan an sawi.

Serchhip District-ah African Swine Fever (ASF) hri leng avanga Vawk thi an la awm belh zel a, hei vang hian Bialtu MLA, Lalduhoma’n MLA Fund a ruahman atangin Vawk phumna tur nimin khan laih a ni.

Serchhip Sub-Hqrs. YMA chuan HSLC leh HSSLC Exam result chhuakta a Mizoram puma Top 10-a lang phak an huamchhung ami te chawimawina hun nimin khan an buatsaih a. Hei hi YMA Kumpuan 'Zirna Uar' chungchanga hmalakna niin College zirlai Exam result chhuaka titha bik te pawh chawimawi leh tura ruahman a ni.

Niminpiah khan Mizoram-ah Sample 4499 enfiah niin heng atang hian COVID-19 hri kai 374 hmuh leh an ni a, sample enfiah atanga za zela 8.31 te chuan hri an kai a ni.

Nimin khan Environment, Forest & Climate Change Minister, TJ. Lalnuntluanga chuan Aizawl Zoological Park, Sakawrtuichhun tlawhin Sakei dahna tur hmunhma a enfiah.

India rama Dan siamtu pawl (Legislative Body) hrang hrangte chuan nimin tlai khan Lok Sabha Speaker, Om Birla hovin inhmuh-khawmna an nei.

Mizoram chhunga COVID-19 hri kai hmuhchhuah zatin tam lam a pan mek laiin, July thla vel atang chuan tlakhniam lam a pan tawh beisei a ni tih IMA hruaitute chuan an sawi.

H&TE Minister in ngen

Nimin khan Champhai District chhung Indo-Myanmar ramri kai khaw hrang hranga inkhuah-khirhna leh a kaihhnawih chungchang sawihona neih a ni.

Tunhnaia Thenzawl khuaa COVID-19 hri kai hmuhchhuah te chu enkawl dam fel niin nimin khan mi 3 te chu anmahni enkawlna hmun atanga chhuahtir an ni.

Mizo Zirlai Pawl (MZP) Hqrs. Serchhip te chuan nimin khan Serchhip SP, Stephen Lalrin-awma kawmin hnamdang ILP chungchang leh thil pawimawh dang te an sawipui.

Serchhip District-ah African Swine Fever (ASF) vanga Vawk thi 45 zet awm belh lehin chhan hriatloh a Vawk thi 11 a awm leh bawk.

Mizo Zaimi Inzawmkhawm (MZI) Headquarters Serchhip chuan ‘Online Solo Competition’ an buatsaih a lawmman dawngtute hnenah nimin khan lawmman hlanna an nei.

Serchhip District chhunga COVID-19 Vaccine pek hna kalpui mek chak zawka thawh a nih theih dan tur chu nimin khan Serchhip-ah District Bawrhsap hovin sawiho a ni a. Bawrhsap chuan COVID-19 laka kan inven theihna tha ber chu Vaccine a ni tih sawiin, vaccine la thei chin te chu Vaccine la theuh turin a sawm bawk.

Pathianni khan Mizoram-ah Sample 1877 enfiah niin heng atang hian COVID-19 hri kai 662 hmuhchhuah niin ni khat-a Mizoram-a hri kai hmuhchhuah tam ber ni ala ni a, Sample enfiah atanga za zela 35.26 te chuan hri kaiin heng zingah hian TNT Camp-a hri kai hmuhchhuah 528 an tel a ni.

Myanmar rama buaina thleng avangin tunhnaiah Mizoram chhunga raltlan rawn lut an pung zel.

Kum 18 atanga 44 inkar, a nawlpui te tana COVID-19 vaccine pek hna kalpui mekah Vawiin, June 22, 2021 hian Serchhip Main Centre, CMO Office Building-ah vaccine pek leh a ni dawn a, he hunah hian kum 18 chunglam a duh apiang tan vaccine hi lak theih a ni dawn a, Online hmanga inziaklut lo tan pawh Aadhaar Card kengin hri danna hi lak theih a ni ang.

Serchhip District Addl. SP tura ruat, Vanlalnghenga chuan nimin khan Addl. SP kalchhuak tur, PC. Laltanpuia hnen atangin Addl. SP mawh-phurhna a la ta a, Addl. SP thar Vanlalnghenga hi 3rd Bn. MAP-a Deputy Commandant hna chelh thin a ni.

Nimin khan Serchhip District-ah COVID-19 hri kai mi 8 zet hmuhchhuah belh leh an ni a, Serchhip District-ah hri kai enkawllai mi 24 an awm mek a ni.

Nimin June 21 kha International Yoga Day a ni a, khawvel hmun hrang hrangah Yoga thatna leh pawimawh zia inzirtirna hun atan hman a ni.

Nimin khan Serchhip District-ah Vawk hri leng mek, African Swine Fever avangin Vawk thi 35 lai chhinchhiah thar a awm leh a, ASF vanga Vawk thi pawh 500 a tling dawn hnai tawh a ni.

TNT tan tanpuina pe

Aizawl South-I bialtu MLA,C. Lalsawivunga chuan chhuanchham a awm mai thei te tun aia nasa lehzual a chhawmdawl hna thawk turin sawrkar chu a ngen.

Directorate of Health Services-a Joint Director (Food & Drugs) chuan ZoAqua Packaged Drinking Water siamtu MZ Agencies chu December, 2020 hnu lama an thil siamchhuah te lalet leh vek turin a ti.

Mizoram Pradesh Congress Committee (MPCC) Media Department chuan sawrkar in COVID-19 hi Total Lockdown hmang ringawta do hneh chi a ni lo tih a hre ta chu lawmawm an ti hle tih an sawi.

BJP Mizoram Pradesh chuan nimin June 21, 2021 khan ramri chinfelna tura hmala tur a ngenna lehkha chu Chief Minister Office-ah an thehlut.

ZPM Legislature Party (ZLP) chuan sawrkar in Assembly Session zawhna a chhan danah thil fello tam tak a awm nia sawiin, MNF Party chu sawrkar aiawha MLA leh mipuite hnena thupha chawi zawk tur an nih thu an sawi.

Nimin khan Health Minister Dr. R. Lalthangliana hovin Mizoram-a COVID-19 hri kaite enkawl dan chungchang sawihona neih a ni a, he hunah hian Zoram Medical College (ZMC)-a Doctor te chuan nunna a tam thei ang ber chhanhim chu a pawimawh ber a nih thu an sawi.

Mizoram Sawrkarin LLTF leh VLTF Member/Volunteer an duty naa Covid vanga nunna chante tana Ex-Gratia Lump sum Compensation Scheme a ruahman hnuaiah mi 25,740 inziaklut tawhin, he Scheme hnuaiah hian LLTF/VLTF Member/Volunteer, an duty-naa COVID-19 vanga thihna tawk te chu cheng nuai 20 pek theih an ni.

Nimin khan Thutak Nunpuitu Team (TNT) Camp, Muanna Veng Aizawl-a awm te Sample enfiah sak niin hri kai 528 zet hmuhchhuah an ni a, nimin kha Mizoram-a ni khat-a hri kai hmuhchhuah tam ber ni a ni.

Inrinni khan Mizoram-ah Sample 2779 enfiah niin heng atang hian COVID-19 hri kai mi 193 hmuhchhuah leh an ni a, Sample enfiah atanga za zela 6.94 te chuan hri kaiin hri kai hmuhchhuah a tlahniam hret a ni.

Thenzawl Joint YMA leh Forest Department chuan Thenzawl tui lakna hnar, Sailam ram ah tuihna tipung turin Zirtawpni khan thingtiak 100 zet an phun a, he hunah hian hnatlang tura ruat mi tlemte in thingtiak hi an phun a ni. Thenzawl tui lakna hnar hi mimal ram a ni thin a, bialtu MLA hlui leh Chief Minister hlui, Lal Thanhawla te chhungkua khan Rs. 150,000/- in Vantlang tan an lo lei tawh nia thudawn a ni.

Serchhip-a awm 8th Assam Rifles te chuan HSSLC Exam result tihchhuah taka Serchhip atanga Top 10-a lang zirlai pahnih te hnenah Inrinni khan chawimawina an hlan.

Inrinni leh nimin lamah Serchhip District-ah COVID-19 hri kai hmuhchhuah belh leh hri kai enkawl dam an awm belh lova, heti hian nimin thleng khan Serchhip District-a COVID-19 hri kai hmuhchhuah tawh chu 663 niin an zinga 644 te chu enkawl dam an ni tawh a. Tunah hian hri kai enkawllai 16 la awm mekin hri kai hmuh tawh zingah nunna chan mi 3 an awm tawh a ni.

Serchhip District chhung khaw 7-a Vawk hri, African Swine Fever (ASF) hri lenna hmuna Vawk thi chu 464 an tling tawh.

Sample thawn leh dawn

COVID-19 hri leng avanga Total Lockdown kalpui mek chu Mizoram sawrkar in tun thla ni 30 thleng kalpui chhunzawm tura a tih angin Serchhip District-ah pawh kalpui chhunzawm a ni dawn a. Hemi atan hian Serchhip District-a hman tur inkaihhruaina pawh nimin khan tihchhuah niin inkaihhruaina hmanlai nen tih danglam lian lutuk a awm lova, Sawrkar hnathawk, COVID-19 Executive Duty atana ruat ni lo te chuan CAB tha taka zawm chungin Office an kai tawh ang.

Zoram People Movement (ZPM) Party Thalai chuan thuchhuah siamin Mizoram-ah ICU mamawhna a sang hle nia sawiin, siam belh vat turin thuneitute an ngen tih an tarlang a, ZMC atanga hlawh la Nurse te chu an thawhna tura ko let vat tura an phut thu an sawi bawk.

Health Minister Dr. R. Lalthangliana chuan Civil Hospital Lunglei Compound-a Laboratory Building, RT-PCR khawl pawh bun theihna tur sa tura hmalak tan mek chu PWD kuta dah a nih thu sawiin, PWD chu contractor tur an nih thu leh tunah chuan pawisa hmanna tur a la awm loh thu a sawi bawk.

BJP Mizoram Pradesh chuan RT-PCR khawl chu thil bun harsa tak nia an hriat loh thu sawiin, Lunglei-a RT-PCR khawl bunna tur sawrkar in a buaipui dan chu mipui bum tumna ah an ngaih thu an sawi bawk.

TNT Camp-ah COVID-19 hri kai tam tham tak hmuh an niS Nimin khan Thutak Nunpuitu Team (TNT) Camp, Muanna Veng Aizawl-a awm te Sample enfiah sak niin nimin tlai dar 6:00 thleng khan COVID-19 hri kai mi 324 hmuhchhuah an ni tawh a, nizan khan TNT Camp-a awm zawng zawngte Sample hi enfiah sak vek tura ruahman a ni.

Champhai-a Tlawmngai Pawl hrang hrang hruaitute thukhawm chuan Mizoram pum huapa hmasawnna rualkhai zawka a kal theihna turin District Planning Committee din turin Mizoram Sawrkar ah ngenna thlen nise an ti.

June 30 thleng Lockdown

Niminpiah-a Mizoram-a Sample enfiah 4395 atangin COVID-19 hri kai mi 302 hmuh leh an ni a, Sample enfiah atanga za zela 6.87 te chuan hri kaiin Mizoram-a hri kai hmuhchhuah chu 16,437 an tling tawh a ni.

Rampum-a COVID-19 Frontline Workers Training neih tur chu nimin khan Prime Minister Narendra Modi chuan hawngin Mizoram atang pawhin mi 160 training pek tum an ni.

Mizoram Rural Bank (MRB) Head Office sak zawh hlim, Aizawl ami chu COVID-19 hri kaite enkawlna tur hmun, Dedicated Covid Health Centre (DCHC) atan ruahman niin nimin khan Medical Operational Team on COVID-19 Chairman, Dr. ZR. Thiamsanga chuan a hawng.

MNF Party chuan ZPM Legislature Party ten COVID-19 dona kawnga hmanraw pawimawh Thermal Camera leh Ambulance lei chungchang a thuchhuah an siam chu thu diklo niin an sawi.

Nimin-a Health Minister hova sawrkar mi pawimawh te thukhawm chuan Lockdown kalpui mek thlirin vawilehkhata inthlahdul vek chu a la him tawk lovah an ngai tih an sawi.

AH&Vety Department in nimin-a report a an tarlan danin nimin lamah Serchhip District-ah ASF vangin Vawk thi 19 a awm belh leh.

Serchhip Thalai Pawl (STP) chuan Serchhip District-a COVID-19 hri leng dona kawnga hlawh nei lova thawk tura inpe hmasa ber, Jessica Lalremruati chu nimin khan chawimawina an hlan.