Latest News

Covid-19 Ex-Gratia Lump sum Compensation Scheme hnuaiah mi 25,740 ziaklut tawh

Mizoram Sawrkarin LLTF leh VLTF Member/Volunteer an duty naa Covid vanga nunna chante tana Ex-Gratia Lump sum Compensation Scheme a ruahman hnuaiah mi 25,740 inziaklut tawhin, he Scheme hnuaiah hian LLTF/VLTF Member/Volunteer, an duty-naa COVID-19 vanga thihna tawk te chu cheng nuai 20 pek theih an ni.

Mizoram sawrkar in a din Task Group on Insurance in an sawi danin rawtna an siam anga Mizoram Sawrkarin Local/Village Level Task Force (LLTF/VLTF) Member leh Volunteer, an duty naa Covid vanga nunna chante tan Ex-Gratia Lump sum Compensation Scheme a lo tihchhuah tak chu a nihna ang taka hman a nih theih nan chak takin bawhzui zel a ni a, tunah hian LLTF 83 huam tawhin mi 4273 ziahluh an ni tawh a. VLTF pawh 740 huam tawhin mi 21,467 ziahluh an ni tawh a. LLTF hi zawhfel ni tawhin VLTF pawh hi zawh thawkhat a ni tawh bawk.

Ex-Gratia Lump sum Compensation Scheme hnuaiah hian LLTF/VLTF Member/Volunteer, an duty-naa COVID-19 vanga thihna tawk chhungte’n cheng nuai 20 an dawng thei dawn a, chutiang vanduaina an tawh hmaa an inziahluh ngei ngei a ngai thung a. Chuvangin LLTF/VLTF member la inziaklutlo an awm chuan a rang lama inziaklut tura ngen an ni a. Heta inziaklut te hi Task Group on Insurance chuan Data base siamin kartin a update bakah mumal takin a vil zui reng a. He Scheme hian September ni 30, 2021 thleng a awh dawn a ni. VLTF/LLTF mi leh sa, khawtlang leh ram tana thahnemngai taka thawktute zingah he Scheme hnuaia an inziahluh loh vanga an compensation dawn tur dawn loh phah awm lo se tih chu Task Group on Insurance duh dan a nih thu pawh sawiin, la inziaklutlo te pawh June 21, 2021 tlai dar 5:00 hmaa inziaklut vek turin a ngen a. Hemi hnu lamah hi chuan inziahluh belh tur chuan Task Group phalna lak hmasak zel a ngai tawh dawn tih an sawi bawk.

Sawrkar hnathawk nghet leh nghet lo te hi chu COVID-19 donaa thi an nih chuan Ex-Gratia Lump sum Compensation Scheme hran hnuaiah cheng nuai 20 an dawn theih dawn tho avangin he Scheme hian a huam lo thung tih pawh an sawi a. He Scheme hnuaia inziaklut te hian vanduaina an lo tawk a nih pawhin Compensation dawng tura ruat lawk (nominee) ziaklut vekin he ruahmanna hnuaia hamthatna dawng turte chuan Mitthi chu LLTF/VLTF member a ni ngei a ni tih tihchianna te, Mitthi-in COVID -19 a kai tanna tihchianna (Contact Tracing team te atanga hriatpuina) leh Covid-19 vanga thi tihchianna Hospital/Laboratory report te thiltel a ngai dawn a ni.

Comments

Chhiar Hlawhte