Lockdown kalpui mekah vawilehkhata inthlahdul vek chu a la him tawk lovah ngai

Nimin-a Health Minister hova sawrkar mi pawimawh te thukhawm chuan Lockdown kalpui mek thlirin vawilehkhata inthlahdul vek chu a la him tawk lovah an ngai tih an sawi.

Nimin khan SAD Conference Hall-ah Health Minister Dr. R. Lalthangliana hovin Mizoram-a COVID-19 inkhuahkhirhna kalpui mek thlirhona neih niin he hunah hian MOT Chairman Dr. ZR. Thiamsanga MLA, Chief Secretary leh AMC Mayor bakah COVID-19 dona kawnga hmalatu Department hrang hrang hotute, Indian Medical Association, Medical Operational Team, Jt. NGO Coordination Committee leh Mizoram Kohhran Hruaitute Committee (MKHC), Local Task Force aiawhte an tel a. Mizoram-a Lockdown kalpui mek chungchang sawiho niin, kan dinhmun thlirin vawilehkhata inthlahdul vek chu a la him tawk lovah an ngai a, karleh lama kan awm dan tur chu uluk tak leh fimkhur taka ruahmanna siam tha tih a ni a, rawtna hrang hrang sawiho niin State Executive Committee on State Disaster Management Authority in a tul angin ruahmanna an siam ang. He Meeting-ah hian COVID-19 hri leng laka kan himna tura dan siamte leh SOP te pawh a tul anga ennawn a, siamthat ngai laite siamthat a tul tih sawi a ni bawk.

He hunah hian Sample test chungchang sawiho niin hri kaite a hma thei ang bera hmuhchhuah chu a pawimawh avangin mahni inringhlel ten awlsam taka sample an test theihnan tuna kiosk kalpui mek bakah Vanapa Hall-ah Sample test theihna tur a rang thei ang bera ruahman tha tiin a tul angin hmun dang remchang dap nghal ni bawk se an ti a. Sample hi a thlawna test turin ruahmanna siam tha tih a ni.

Mizoram-a positive damchhuakte (recovery rate) a hniam bik chhan chu India ram hmun dang aia fimkhur leh uluk zawka kan kal vang a ni tih he hunah hian tarlan a ni a, Recovery rate hniam angin lang mahse hlauhthawn tur a awm loh thu leh Mizoram-a Discharge Protocol hman mek  hi a him zawk hle thu tarlan a ni bawk.