Latest News

High Court-a PIL thehluh ngaihtuah leh a ni

Gauhati High Court Aizawl Bench-in Lunglei-a RT-PCR Laboratory bun theih rihloh chhan Mizoram sawrkar sawifiahna hnawlin, sawrkar chuan building awmsa chu khawl bunna turin a ruahman turah a ngai tih a sawi.

Justice Michael Zothankhuma leh Justice Nelson Sailo te thutna, Division Bench chuan nimin khan Lunglei Civil Hospital-a RT-PCR chungchanga PIL lut chu a ngaihtuah chhunzawm a, State sawrkar chuan Lunglei Civil Hospital-a RT-PCR Testing Laboratory din tur hian kum 2020-ah thutlukna a siam tawh tih a lang a, PWD chuan Laboratory sakna tur hian Rs. 1,40,61,400/- ruahmanna siamin, hei hi Finance Department lamin sum indaihlohna avangin a hnawl a, cheng vbc 7.80 senna tur ruahmanna chu siam lehin hei hi NEC pawmpui tura thawn a ni a, pawm a nih pawhin building sa zo tur chuan hun a la duh rei dawn tih a lang a ni tih Court hian a sawi a, state sawrkar chuan RT-PCR Laboratory din tura thutlukna a siam tawh avangin, building awmsa te chu RT-PCR Testing Laboratory lailawk atana lo hman dan tur sawrkar chuan a ngaihtuah turah an ngai tih Court hian a sawi.

Sawrkar aiawha ding Advocate General chuan building awmsa-ah te RT-PCR khawl bun lailawkna tur ruahman tura rawtna sawrkarah a thlen tur thu Court-ah hian a sawi bawk avangin Court chuan tun dinhmunah chuan sawi chhunzawm tur a awm rih lo a, thubuai ngaihtuah leh hunah sawrkar Ukil chuan hmalak anih dan Court a hriattir leh ang tih a sawi.

RT-PCR Laboratory lailawk din turah a luhna tur kawngka hrang siam a tul nia sawi chungchangah pawh Court hian building thar sakna tur sum hmuh hun tur nghah ringawt ai chuan sawrkar chuan kawngka hran emaw, a luhna tur kailawn hran emaw a siam thei ang tih a sawi a, ZMC-a RT-PCR Laboratory dahna hmun pawh TB Centre tho a ni tih a sawi lang bawk.

Nimin-a PIL ngaihtuah chhunzawmna ah hian Mizoram sawrkar aiawhin Senior Advocate Diganta Das, Advocate General chu Guwahati atangin a ding a, Ukil dang ten tawiawmin PIL thehluttu aiawhin JC. Lalnunsanga, Advocate chu Delhi atangin a ding thung a, Hearing hi video kaltlanga neih leh niin July 12-ah Hearing hi neih leh tur a ni ang.

Comments

Chhiar Hlawhte