Latest News

Green Mizoram Day-ah enkawl theih tawk thing phun turin thingtiak pekchhuah mek a ni

Naktuk Zirtawpni, June 11, 2021 khian Mizoram-ah Green Mizoram Day hman a ni leh dawn a, hemi atan hian Environment, Forest and Climate Change Department chuan thingtiak an pechhuak mek.


Kumdanga lo hman tawh thin angin Green Mizoram Day hi hripui leng karah kumin hian hman leh a ni dawn a, Serchhip District-ah pawh he Ni pual hian hmun hrang hrangah thingtiak phun tura hmalak mek niin sawrkar Department hrang hrangte pawh anmahni remchan dan anga thingtiak hi phun tura beisei an ni a. Kumin ah Serchhip District-ah ramkang nasa tak a awm avangin kumdang zawng aiin Environment, Forest and Climate Change Department chuan tan lain thingtiak pawh phun tur an ruahman tam a ni.

Thenzawl DFO Margareth Lalramchhani chuan kumin hian thingtiak tam zawk phun tumin hma la mah se enkawl zui theih ngei tur phun a nih theih nan hma an lak thu a sawi a, thingtiak lachhuak leh phuntute pawhin kumin hian phun tam lama tan an lak rualin an enkawl theih tur tawk phun thei se an duh thu a sawi a. Hemi hmalam hian Serchhip District Level Committee on Green Mizoram Day thu-khawm chuan kumin a he ni puala sawrkar Department ten thingtiak an phun te hi kumtluan-a an enkawl zui dan enfiahin nakum lamah a enkawl tha te lawmman pek turin an lo rel tawh bawk a ni.

Environment, Forest and Climate Change Department hian thingtiak phun tur pekchhuah dan ah hian kaihhruaina mumal tak siamin mimal leh pawl tana a thlawna pekchhuah theih zat bithliah an nei vek a, heng baka thingtiak mamawh te chuan an lei a ngai thung a. EFCC Department in rate an bithliah ang chuan thingtiak lei tur hi kum 1-a upa anih chuan Rs. 10/- man niin kum 2-a upa a nih chuan Rs. 20/- leh kum 3 leh a aia upa chu Rs. 30/- in lei a ngai thung a ni.

Comments

Chhiar Hlawhte