Lenkawl

Lai Autonomous District Council (LADC)-a Chief Executive Member C. Lalmuanthanga'n Executive Member atana a rawt mi pakua (9) te chu Mizoram Governor-in May 27, 2024-a a pawmpui hnuah nimin khan Executive Member atan lakluh an ni a. Executive Member lakluhna hun LADC Hall, Lawngtlai-a neih ah Lawngtlai District Bawrhsap Cheemala Siva Gopal Reddy chuan heng Executive Member thar te hi rinawmna thu tiam tirin a lalut a ni.

Mizoram Police te chuan Inrinni kalta khan Aizawl leh Agartala (Tripura) inkara tlan Maxi Cab pakhat atangin nungcha chi hrang hrang dan lova phurh an man.

Vawk hri leng African Swine Fever (ASF) avangin Mizoram-ah thu leh awm hma chuan Vawk, Vawksa leh Vawksa atanga siam thil eng pawh ramchhunga State dang leh ramdang atanga lakluh khap a ni.

Mizoram-a Cyclone Remal avanga chhiatna thleng chungchang sawihona chu nimin khan Chief Secretary Dr. Renu Sharma hovin Chief Secretary Conference Room-ah neih a ni.

Chief Minister Lalduhoma chuan HIV/AIDS vei te tan ART lak chu enkawl nana thil tha ber anih avangin natna tuar mek ten pan hram se an duh thu a sawi.

Mizoram-a Political party panga (5) te chuan Lok Sabha Inthlanpui a Duty Mizoram Police 1047 te Vote thlak thei lova siam an nih chungchang ah an lungawi loh thu nimin khan Prime Minister leh Chief Election Commissioner te hnenah ziakin an thlen a, vote an thlak ngei theihna tura hma la turin an ngen bawk.

Tunhnaia ruahsur avanga leimin in chenna In a hnawl zinga mihring a hnawl tel te zawn hna chu nimin khan thawh chhunzawm leh niin nimin khan ruang pahnih hmuh belh leh a ni.

Khawzawl District AIDS Control and Prevention Committee chu nimin khan thukhawmin HIV/AIDS darh zel tur venna kawnga hmalak dan tur hrang hrang an sawiho.

Kolasib District Bawrhsap John LT. Sanga chuan nimin khan ruahsur nasa avanga Tlawng lui lianin Bairabi khua hmun thenkhat a harsatna a thlen te a enfiah.

MJA General Hqrs. hruaitute chuan nimin khan Chief Minister Lalduhoma hmuin an pawl mamawh hrang hrang an thlen.

PHE Minister Prof. Lalnilawma chuan tunhnaia ruahsur nasa leh thli tleh vanga Tui Pump leh sem kawnga harsatna an tawh hrang hrangte nimin khan MJA hruaitute a hrilhfiah.

Chief Minister Lalduhoma chuan sawrkar hmalakna inthuah leh inhnai lutuk te tihbo a nih theih nan Department tin in an project duan te chu Planning Board kaltlang zela thehluh tawh tur an tih thu a sawi.

Chief Minister Lalduhoma hovin Thawhtanni khan Mizoram Institute of Advanced Studies (MIAS) dinhmunte thlira sawiho a ni.

Mizoram Governor Dr. Hari Babu Kambhampati chuan kumin a HSSLC leh HSLC Exam Result chhuaka Mizoram pum-a pakhatna te chu niminpiah khan Raj Bhavan-a leng-ah sawmin chawimawina thuziak leh pawisafai a hlan.

Samagra Shiksa Lunglei District bultumin, Mizo Academy of Sciences Sub-Headquarters Lunglei leh Mizoram Mathetics Society Lunglei tangkawp chuan Lunglei-a Zirlai, Pawl 11-a Science lak tum te tan Science leh Mathematics Bridge Course an buatsaih dawn.

National AIDS Control Organization (NACO), 2022 tarlan danin Champhai District mipui za zela 2.97 (1664) te chuan HIV an vei.

Cyclone Remal-in Mizoram hmun hrang hranga kawlphetha pekna a tihchhiat te chak taka siamthat a nih theih dan tur chu nimin khan P&E Minister F. Rodingliana hovin Department hotu ten an sawiho.

Mizoram-a Political party hrang hrangte chuan ruah leh thlipui thawk avanga Mizoram-a chhiatna thleng chu pawi an tih thu an sawi.

Cyclone Remal leh a kentel ruahsur in nizan hmasa zankhua leh nimin thlenga Mizoram a nuai avangin hmun tam takah chhiatna thleng a awm a, tun tuma chhiatna thleng ah hian nunna chan mi 20 chuang awmin leimin in a hnawl mi thenkhat chu chin hriatloh in an la awm bawk a. Vanduaina thlenna hmun te hi nimin khan Chief Minister chuan a tlawh a ni.

Nimin khan Khawzawl-ah District Level Committee on Green Mizoram chu an Chairman leh District Bawrhsap K. Lalrohlua hova thukhawmin kumin a Green Mizoram Day hman dan tur an rel a. Green Mizoram Day hi Khawzawl DC Conference Hall-a hman relin hemi hnu hian NH-06 (Khawzawl – Champhai)-ah thing phun tur a ni anga, Tuimuk lei atanga Champhai lam kilometer 1.5 a thui-ah thingtiak 500 tal phun tura ruahmanna siam a ni.

Kumin-a a hmasa ber atan Mizoram-ah Vaimin eichhetu Pangang, Fall Armyworm hmuh leh a ni.

Nimin khan Khawzawl-ah District Inspection and Monitoring Committee on Prevention of Illegal Transportation of Children chu an Chairman leh Khawzawl DC hova thukhawmin Dan kalha naupang kumtlinglo hruai bo tihtawp leh ven dan tur an sawiho.

Sawrkar Department hrang hrangin mipuite rawngbawl hna mumal zawk leh tha zawka an thawh theihna tura dan siam, The Mizoram Right to Public Service (RTPS) Act 2015 chu tun thlengin hmang tangkai an la awm lo.

Champhai District Bawrhsap leh District Level Committee on Myanmar and Bangladesh Refugees (DLCM&BR)-a Chairman James Lalrinchhana chuan Myanmar atanga raltlante chhawmdawlna pek chungchang chu nimin khan Relief Agency hrangte hrangte a sawipui a. Champhai District chu raltlan ngah ber District a nih thu sawiin, Raltlan chhawmdawl leh tanpui kawnga Relief Agency hrang hrangte hmalakna fakawm a tih thu sawiin, theihtawp chhuah chhunzawm zel turin a fuih a. Tunhnaiah Vaikhawtlang, Khuangphah leh Hnahlan khua ah te raltlan lut thar mi engemaw zat an awm belh thu sawiin, Relief Agency-te chu raltlante tanpui leh chhawmdawl kawngah thawhhopuiah a sawm nghal bawk.

National Skill Competition-Indiaskills 2024-a Mizoram atanga tel Mizo thalai Medal la mi 8 te chu nimin khan Chief Minister Lalduhoma chuan lawmpuina thingpui a inpui.

Home Secretary H. Lalengmawia'n tunhnai-a Assam Sawrkar-in Mizoram ramri-a Commando Camp an sak chungchangah Assam Chief Minister-in Assam nek anga Mizoram a puh chu thu awmze nei lo a nih thu a sawi.

Mizoram sawrkar-a Home Secretary H. Lalengmawia chuan State pawna Mizoram Police duty-te'n vote an thlak theih loh chhan chu sawrkar inthlahdah vang a nih loh thu a sawi a. Mizoram DGP Anil Shukla pawhin, “Police-te'n vote an thlak theihna atan theihtawp tak meuh meuh kan chhuah,” a ti.

Mizoram-a Political party pahnih, Aam Aadmi Party (AAP) Mizoram leh Peoples Conference (PC) Party te chuan Mizoram-a MLA 16 te chu Dan kalha an thuneihna piah lama nihna chelh nia an hriat avangin Dan anga hma la turin Assembly Speaker an ngen a. Speaker chuan heng MLA te hian Dan an bawhchhe lo niin a sawi thung.

Myanmar ram buaina vanga Rakhine State-ah eitur leh tuialhthei mamawhna a san vangin March thla laihawl vel atang khan tuialhthei leh eitur lam chi thahnem tak chu Mizoram chhung, Siaha District kaltlangin Rakhine State-ah thawnluh thin a ni a, hemi chungchang ah hian khua leh tuite him zawk nan Central Young Lai Association chuan Inrinni, May 25, 2024 zanlai dar 12:00 hnu lamah chuan Lawngtlai District chhung leh District kaltlangin Rakhine State-ah engmah thawnlut lo turin hetiang lama inhnamhnawihte chu an ngen a ni.

Mara Kohran pahnih, Evangelical Church of Maraland (ECM) leh Congregational Church of India Maraland (CCIM) te chu kum 35 (1989-2024) chhung Assembly rorelna pakhat hnuaiah an awm tawh loh hnu Zirtawpni zan khan Kohhran pahnih te hian inpumkhatna atana hming ziakin CCIM chu thiah a ni a, Evangelical Church of Maraland (ECM) tih hming puin an awm tawh dawn a ni. Heng Kohhran pahnih te inpumkhatna tur atan hian May 24-26, 2024 chhungin ECM Local Church New Siaha-ah Special Assembly neiin Rev. T Laikai chuan inremna puanzar a pawtpharh a ni.

Mizoram-a Phar enkawlna damdawi In awmchhun, Tlabung Leprosy Hospital-a Phar enkawllai awmchhun chu tunhnaia a thih avangin he damdawi In-ah hian Phar natna vei enkawllai an awm rih lo.

MNF Sr. Vice President Dr. R. Lalthangliana'n Lok Sabha MP thlanna April ni 19-a neih takah Mizoram Armed Police 1047 zet te vote thlak thei lova siam an ni chu an Party chuan pawi an tih thu leh Mizoram sawrkar inthlahdah vang a nih thu a sawi.

Myanmar atanga dan lova kuhva tawlh a nih loh nan Bilkhawthlir Kuhva Chingtu Co-Operative Society Ltd. chuan duty an la kalpui reng a. Khawchhak atanga kuhva tawlh an awm vang hian kumin hian kuhva lei tuma dawrtu pawh an la awm lo.

Ramchhunga Civil chawimawina sang, Padma Shree Award dawngtu TNT Founder Sangthankima chawimawina dawn lawmna inkhawm Inrinni-a TNT, Muanna Veng-a neih chu Chief Minister Lalduhoma leh Home Minister K. Sapdanga ten an telpui.

Myanmar ramchhunga buaina chhuak in ziaawm lam ala pan theih tak tak loh avangin Mizoram-ah raltlan rawn lut an la awm belh zel a, Inrinni thleng khan raltlan rawn lut hi awmin Mizoram pumah Myanmar atanga raltlan mi 35,624 zet an tling tawh nia hriat a ni.

BJP Mizoram President Vanlalhmuaka chuan Sawrkar kan hrawn thin ten Mizoram mipui min ti beidawng niin a sawi.

MNF Adviser leh MLA hlui TC. Pachhunga chuan ZPM sawrkar chu a bilhah a tho lo nasa em em nia sawiin, “An insawi ang an ni lo a, mipui beisei an pha lo nasa em em a ni,” a ti.

Mizoram Pradesh Congress Committee (MPCC) General Secretary PC. Laltlansanga chuan chhawr tlak leh hnathawk tak tak thei tur thiamna pe tura Eduication kan siamthat a ngai tih sawi.

Hachhek Bial Kuhva Chingtu Pawl (HBKCP) chuan Kuhva tawlhru te dang turin an Duty leh dawn tih sawiin, sawrkar in thlai thenkhat a Minimum Support Price a siam turah Kuhva telh ve ngei turin an ngen bawk.

Chief Minister Lalduhoma chuan 'Save the Riparian' huaihawt luikawr dung thenfai hnatlang neih mek, Mega River Cleaning Programme nimin-a Tuikual lui-a neih chu a telpui a, Sports Minister Lalnghinglova Hmar pawhin he hnatlang hi a telpui bawk a ni.

Land, Revenue & Settlement Department chuan ‘GIS Based Comprehensive Land Record Management System’ an buatsaih thar chu enchhinna hun hmangin he hun hi Revenue Minister B. Lalchhanzova chuan a telpui.

Mizoram Police te chuan North East Frontier Railway thuneitu ten Railways bungraw bo leh thubuaiah te Police ten hma an la tawklo anga ngaih theih tura thu thehdarh lo awm chu thu belhchian dawl lo a ni tih sawiin, “Rel kawng siam mekah hian pawikhawihna a thlenin Police ten theihtawpin chhuichhuah hna an thawk thin,” an ti.

Sakawrhmuituai tlang-a Skywalk leh Chaltlang - Durtlang inkara Ropeway siam chungchang chu Anti-Corruption Bureau (ACB)-in an la chhui mek.

Myanmar ramchhung Chin State hmar lam Tonzang leh Cikha khua a Myanmar sipai Hmunpui te Chin National Army (CNA) leh an thawhpui PDF pawl hrang hrangin an lak hnua indona kal zelah Mizoram-ah raltlan an la pun belh zel.

Lok Sabha Inthlanpui neih a State pawn lama venhimna hna thawk tura kal Mizoram Police 1,047 te chuan vote an thlak ve thei dawn lo tih a chiang tawh.

Mizo Zirlai Pawl (MZP) General Hqrs. chuan High School Leaving Certificate (HSLC) Examination 2024-a Top 10-a Mizo tlingte chawimawina hun nimin khan Aizawl Vanapa Hall-ah an buatsaih a, Minister Prof. Lalnilawma chuan he hun hi khuallian niin a hmanpui a ni.

Experiential Learning Centre (ELC), Champhai enkawl tura din, Management Committee of Experiential Learning Centre chu nimin khan an Chairman leh Champhai DC, James Lalrinchhana hovin an thukhawm.

Chief Minister thurawn anga Rubber chin kawnga hmalakna hrang hrang zirtu Land Resources, Soil &Water Conservation Department-a Team of Officers te chu Vawiin hian Aizawl rawn thleng leh tura beisei an ni.

Chief Minister Lalduhoma chuan nimin khan a Pisa-ah Mizoram Environment & Forest Consultative Forum (MEFCOF) hruaitute kawmin an hmalakna te a sawipui.

Mizoram tharchhuah Buhhum lei chungchang chu nimin khan Chief Minister Lalduhoma hovin sawrkar mi pawimawh ten an sawiho.

International Day for Biological Diversity 2024 chu nimin May 22, 2024 khan hman a ni a, Mizoram-ah pawh Forest Training School, Bethlehem Vengthlang-ah State Biodiversity Board buatsaihin he ni pual hian hun hman niin kumin hian ‘Ruahmanna ah tel ve ta che’ (Be Part of the Plan) tih chu thupui atan hman a ni.

Chief Minister Lalduhoma chuan nimin khan a Office-ah Northeast Frontier Railway-a General Manager Chetan Kumar Shrivastava leh a thawhpuite kawmin Bairabi leh Sairang inkara Rel kawng an siam mek chungchang a sawipui.

Chief Minister Lalduhoma chuan Sawrkar tharah tunhma aia nasa leh hlawk zawka ruihhlo do an tum dawn tih a sawi.

Vawk hri, African Swine Fever (ASF) leng meka Mizoram dinhmun thlirletna leh hmalakna tur sawihona chu nimin khan AH&Vety Minister C. Lalsawivunga hovin a Pisa-ah neih a ni.

Chief Minister Lalduhoma chuan Assam Rifles ten mipuite nunphung nghawng thei engemaw thiltih an neih dawnin State sawrkar nen inrawntawnin tih thin a duh thu a sawi.

IndiaSkills Competition 2024 neih zawh taka Mizoram Team atanga Medal latu mi 8 te chu nimin khan LESDE Minister Lalnghinglova Hmar chuan a Pisa-ah thingpui a inpui.

Mizoram Board of School Education (MBSE) chuan kumin 2024-a Higher Secondary School Leaving Certificate (HSSLC) Exam result chu nimin khan a tichhuak a. Mizoram puma Zirlai Exam zawng zawng mi 11,824 zinga 9227 an pass a, pass percentage hi za zela 78.04 niin nikum aiin 0.62 in a hniam zawk a ni.

Mizoram Public Service Commission (MPSC) Chairman thar atan R. Lalramnghaka IAS (Rtd) chu nimin khan rinawmna thu tiam tira lakluh a ni.

Mizoram Pig Farmer’s Association (MIPFA) chuan Mizoram-a Frozen Vawksa rawn lut chu dan phal loh nia sawiin, a dan kawngah theihtawp an chhuah dawn tih an sawi a. Mizoram-a ASF hri leng mek chu a ziaawm theih nan hmalak an tum thu leh kum 2022-a ASF vanga Vawk suat te hnenah zangnadawmna pek thuai an phut thu an sawi bawk.

MNF General Secretary Lalremruata Chhangte chuan kan sawrkar hrawn mek ZPM chu Manifesto-a an insawi anga an awm loh thu a sawi.

Health and Family Welfare Department changtu Minister Lalrinpuii chuan mipui huapzo Universal Health Care Scheme chu a taka kalpui a nih theih nan hma an lak mek thu a sawi.

Tun thla ni 15 atanga New Delhi-ah neih ‘National Skill Competition-Indiaskills:2024’ chu nimin khan zawhfel niin Mizoram atanga tel ten Medal 8 an la.

Adviser to Chief Minister leh MLA Lalmuanpuia Punte chuan Bangladesh atanga raltlan rawn kal te chu Chakma Autonomous District Council (CADC) area-a dah vek tawh tur a nih thu a sawi.

Chief Minister Lalduhoma chuan Indradanush Gas Grid Limited hotute chu nimin khan a Pisa-ah kawmin Gas Pipeline phum meka an hmalakna te a sawipui.

India leh Bangladesh ramri hungna tur atana sawrkarin mimal ram a laksak a Land Settlement Certificate (LSC) lem hmanga zangna-dawmna la mi 23 te chu lung In tang tur leh pawisa chawi tura hrem an ni.

Food Corporation of India (FCI) Executive Director (North East) DP. Shukla leh a hote chuan Supply Minister B. Lalchhanzova chu nimin khan a Pisa-ah kawmin Mizoram-a an hnathawh mek dan leh an mamawh tul te an thlen.