Latest News

Thla 12 chhung aiin May, 2021 chhunga COVID-19 hri kai hmuhchhuah an tam zawk

Thla kalta May, 2021 chhung khan Mizoram-ah COVID-19 hri kai 6268 hmuh an ni a, hei hi Mizoram-a hri len tirh atanga thla 12 chhung, nikum March thla atanga kumin April thla thlenga hri kai hmuhchhuah 6131 aiin 137 in a tam zawk a ni.

State Spokesperson on COVID-19, Dr. Pachuau Lalmalsawma chuan Mizoram-a COVID-19 second wave dinhmun sawifiahna nimin-a a siam ah he thu hi a tarlang a, May 31, 2021 thleng khan Mizoram-ah COVID-19 hri kai 12,399 hmuhchhuah niin COVID-19 1st Wave (March, 2020 - March, 2021) chhungin hri kai 6131 hmuhchhuah niin mi 11 in nunna an chan a, COVID-19 2nd Wave (April - May, 2021) chhungin hri kai 7923 hmuhchhuah niin nunna chan mi 30 an awm bawk. May 2021 chhung khan hri kai 6268 hmuh niin hei hi a hma thla 12 kalta, nikum March thla atanga kumin April thla thlenga hri kai hmuhchhuah 6131 aiin 137 in an tam zawk a, May thla chhunga hri kai hmuhchhuah zinga za zela 69.62 te chu Aizawl District-a hri kai hmuhchhuah an ni bawk.

Hetiang hi Mizoram dinhmun a nih avangin State Spokesperson on COVID-19 chuan Lockdown lai a ni emaw, ni lo emaw, dawr hmun leh punkhawm theihna hmun, sa leh chawhmeh dang leh mamawh leina ah fimkhur a tul takzet tih sawiin, mahni inchhung khurah pawh uar lehzual a fimkhur a tul bakah Colony a ni emaw, Compound khat a ni emaw, thenawm intlawh-pawh loh hun a ni tih a sawi a. Zuk leh hmuam leh chawhmeh insuah thlengin insum a ngaih thu pawh sawiin, “Thil inban tawm leh mi khawih hnu khawi atang te, khuh leh tawng per te atanga COVID-19 hi awlsam taka kai theih a nih avangin heng lakah hian fihlim hram tur a ni,” an ti.

Hei bakah hian Vaccine la tawh te pawhin midang, kan chhung leh khat, then leh rualte kan la kai theih fo avangin a hrik kai lo tura COVID Appropriate Behaviour - Mask a hmui hmai tha taka tuam te, midang hnaiha awmloh te, kut tihfai that leh in chibai thlenga ti lova fimkhurna kalpui tur a ni tih thu a sawi bawk.

Comments

Chhiar Hlawhte