Latest News

IMA-in hri kai enkawl te chhuahtir dan thlak duh mahse sawrkar in ala thlak duhlo

Indian Medical Association (IMA), Mizoram State Branch chuan COVID-19 hri laka dam tawh anga ngaih te enkawlna hmun atanga chhuah tir dan kalphung (discharge protocol) thlak tawh turin nawr mah se, Mizoram sawrkar in a chuan ala thlak duhlo tih an sawi.

India ram State hrang hranga COVID-19 hri kai enkawl dam zingah Mizoram dinhmun in hma a sawn hleih theihloh chungchangah Indian Medical Association (IMA), Mizoram State Branch President, Dr. Rosangluaia chuan COVID-19 hri vei dam tawh anga ngaih, Negative result nei tawhte nemngheta test nawn ngai tawh lova an chhuah tir zung zung thin, State dang tihdan kalphung chu Mizoram in a zawm ve loh avangin damchhuah dan/zat hi a tlahniam thei tak tak lo niin a sawi a. “Discharge protocol thlak a ngai a, Doctor-te phei chuan thlak turin kan nawr kan nawr tawh a. ‘Thlak tawh tur, thil tul a ni tawh lo’ kan tih pawhin sawrkar hian a la thlak lo mai mai a ni,” a ti a. “Chhuah dawna in test hi tangkai tawh lo kan ti a, mahse, mipui lam leh Task Force lam hian 'Test nawn leh loh chuan kan ngam lo' an tih tlat avang hian sawrkar hian a Protocol hi an la thlak lo a ni,” tiin Mizoram sawrkarin Discharge Protocol a la thlak mai loh chhan a sawi bawk.

Hri vei dam tawh te enkawlna hmun an chhuahsan dawna Rapid Test tih nawn hian za zela 50 vel chauh rintlak anga ngaih a nih thu pawh Dr. Rosangluaia chuan a sawi a, hemi avang hian test nawn chu thil tul ber nia an hriat loh thu sawiin, “Hemi a nih hi chuan positive ho khan tumah an kaichhawng chuang si lo a. Kan chhuah, dam tawh kan tihte hian midang, an chhungte leh thiante an kaichhawng tih hi khawi record-ah mah kan la nei lo. Chuvangin, test nawn kher ngai lova chhuah tir ngam lohna chhan tur a awm lo tih hi kan hnialna a ni,” a ti.

COVID-19 hri kai te hmuhchhuah an nih atanga ni 10 hnu-a test leh chuta negative result nei te chauh chhuahtir an ni chuan recovery rate a tihhniam phah nia sawiin, “Hei hi khawiah mah an tih ngai loh a ni,” a ti a. Ni 10 a nih hnu ah ni 3 chhung symptom an neiloh chuan Test nawn a ngai tawhlo tih chu State dang kalphung a nih thu Dr. Rosangluaia chuan a sawi bawk.

Comments

Chhiar Hlawhte