Serchhip-a Youth Centre sak mek ah hna thawh tur zatve aia tam thawh zawh a ni tawh

Cheng vbc. 3 senga Serchhip Darnam Tlang-a ‘MYC Youth Centre’ sak hna chu chak taka thawh chhunzawm mek niin tunah hian hnathawh tur atanga a zatve aia tam an thawh zawh tawh thu leh huntiam a thlen hma ngeia sak zawh theih ngei an inbeisei thu hnathawktute chuan an sawi bawk.

Serchhip Darnam Tlang-a MYC Youth Centre sak mek hi nimin khan LENKAWL chuan a hmunah tlawhin hnathawktute chuan an hnathawh mek dinhmun te an lo hrilhfiah a. Cheng vbc. 3 senna tur MYC Youth Centre sak mek hi nikum February thla atang khan hna thawh tan niin kum 3 chhunga zofel tura tih a ni a, Brilliant Consultancy chuan a sak hna hi thawkin he hna viltu John Vanlalfaka chuan tun dinhmun ah an hnathawhna kawngah harsatna liantham an tawklo tih sawiin, amaherawh chu Lockdown kalpui mek a nih avang leh hmun khat ah hnathawktu tam tak bun theih a nih loh avangin an duh anga hna an thawh sawt theihloh thu a sawi a. Tunah hian sawrkar in a phal ang zat thawktu indaha hna hi an thawh chhunzawm mek thu sawiin, harsatna dang in a tlakbuak a nih loh chuan kum thum a tlin hmaa an thawh zawh ngei an beisei thu leh tunah hian hnathawh tur atanga zaa 60 vel an thawh zawh tawh thu a sawi bawk.

MYC Youth Centre sak mek chungah hian Electric hruipui a kaltlang avangin harsatna lian vaklo an tawk tih he hna thawktute chuan an sawi a, hei pawh hi P&E Department lam te nen indawrna neiin Building chungah hian ban dang dah tura ruahmanna siam a nih thu leh tunah hian hei hi buaipui mek a nih thu a sawi a, rei vaklo ah zawhfel a nih tur thu a sawi.

Brilliant Consultancy hotute chuan an hnathawh mekah hian ram leh khawtlang tana rotling ngei tur hnutchhiah thei turin an theihtawp in hmanrua pawh an uluk ve thu pawh sawiin, amaherawh chu Lockdown avanga an bungraw lakna thin Dawr te khar a nih thin avangin hemi kawng ah hian harsatna tlem tlem an tawh thu an sawi bakah an hmanraw lak zingah pawh a thalo te chu an hnawl zel thu a sawi a. An hnathawhna-ah khawtlang mipuite pawhin tha taka an thlawp thu sawiin, an chungah pawh an lawm hle tih a sawi.

Serchhip Darnam Tlang-a Youth Centre sak mek hi NEDP/SEDP sum atanga sak niin Mizopa chhiara chhawng thum-a sak tur a ni dawn a, a dung ft. 100 a vang ft. 85 a ni anga, Motor dahna tur te, Chowkidar Quarters te, Mikhual 20 thlen theihna Room pahnih, Committee Room leh Indoor Volleyball Court te a awm tura duan a ni.