Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Chanchin thar thenkhat :

H&TE Minister in ngen

Higher & Technical Education Minister Dr. R. Lalthangliana chuan nimin khan Mizoram University Vice-Chancellor leh Mizoram chhunga College hrang hrang Principal te hnenah lehkha thawnin kum 2021-2022 Academic Session atan seat siam belh turin a ngen a. He lehkha a thawn ah hian H&TE Minister chuan hripui leng vangin khawvel pum ah harsatna kan tawh thu sawiin, kum kalta lamah pawh hripui avanga zirlai Mizorama rawn haw tangkhangte tana seat siam belh tura a ngenna an tihhlawhtlin sak avangin lawmthu a sawi a. Kumin ah pawh hripui leng avangin zirlai HSSLC leh Degree Course hlawhtling taka zir zo te zingah kum danga phai lama zirna sang chhunzawm tur ang chi a ngaih zirlai thahnem tak chu chhuak thei lovin hun khirh tak an tawng mek tih sawiin, Zirlaite hmakhaw ngaia a theih ang anga zirlaiten zirna sang zawk an chhun-zawm theihna tura seat siam belh dan tur kawng dap turin a ngen bawk a ni.


NSUI in sawrkar an ngen

National Students' Union of India (NSUI) Mizoram State chuan June 18, 2021-a Mizo-ram Board of School Education (MBSE)-in Higher Secondary School Leaving Certificate (HSSLC) Result a tihchhuah takah Govt. Mizo Higher Secondary School, Aizawl-a zirlai naupang 23 te chu an zirtirtu ten an Internal Mark te MBSE lamah an thehlûh (submit) loh avangin an Fail nia hriat a ni tih an tarlang a. Hetiang a zirtirtute inthlahdah avanga zirlai ten an tuar chu an ngai thutak hle tih sawiin, he thil hi a rang lama chingfel tur leh a mawhphurtu zawng chhuaka, a tul anga Action la nghal turin Sawrkar thuneitute an ngen thu an sawi bawk.


CMRF-a sum dinhmun

COVID-19 hri leng dona tura Chief Mini-ster's Relief Fund for COVID-19 a sum lut chu nimin thleng khan Rs. 26,95,47,863/- a tling tawh a, tunah hian Rs. 25,24,94,470/- hmanral ni tawhin sum hmanloh Rs. 1,70,53,393/- ala awm bawk.


MSU in FIR an thehlut

Mizo Students’ Union (MSU) General Hqrs. chuan MSU hming hawha dan phal loh thil phurtute lakah nimin khan Aizawl Police Station-ah FIR an thehlut. MSU thuchhuah in a tarlan danin heng dan phalloh thil phurtute hian khaw kar kawng leh Duty Check Post-ah zirlai pawl in raltlan tanpuina a pek tur hmalakna anga sawiin, dan phal loh thil hi an lo phur niin an sawi a. June 21, 2021 khan Farkawn khawdai ah Assam Rifle ten lo manin, hetianga raltlan tanpuina denchhena dan phal loh thil phurtu an mante chu na taka hrem an nih ngei an phut thu an sawi a. MSU chuan sawrkar phalloh thil phurh chu a duh ngai loh thu leh, MSU hming hawha dan phalloh thil phurh chu a ngai thutak hle tih an sawi bawk.


Thlalak thehluh theih

Information & Public Relations Department chuan ‘Mizoram Calendar 2022’ a hman turin Mizoram lanna thlalak mawi leh hlutawm te thehlut turin thlalak lama tui mi leh a duh apiangte a sawm a. Thlalak hi RAW format-a thehluh tur niin RAW a thla la thei lo tan original jpeg image of TIFF-a thehluh tur a ni a. Thlalak khawih danglam (edit) chu pawm a ni dawn lo thung. 

Thlalak te hi August ni 15, 2021 thleng Directorate of Information and Public Relations Department, Treasury Square-ah thehluh theih niin tunlai boruakah chhuahvah a harsat leh a buaithlak avangin Department e-mail diprmizoram@gmail.com-ah pawh thawn theih a ni anga. Thlalak thehluttute hian Thlalak hming (Caption), thla latu Hming, Khua, Veng leh Phone no. an tilang ngei ngei tur a ni.


Ambulance Driver tanpui

AMC Ward-XIV Councillor Ramthanzauvi chuan Aizawl Civil Hospital-a Ambulance driver te chu an hnathawhna ah fak leh chawimawi an phu tih sawiin, nimin khan Ambulance driver mi 17 te chu tanpuina atan Rs. 1000/- theuh a hlan.


Tui chawina pe turin phut

ZPM East Lungdar Unit chuan nikum (2020) a COVID-19 hrileng avanga Lockdown neih lai, March-April khan an khua chu Tui-ah an harsa hle nia sawiin, mimal thahnem ngai Motor nei leh driver ten mipuite hnenah a thlawnin Tui an sem niin an sawi a. An dinhmun hriain bialtu MLA, Lalchamliana hmalakna leh remruatna in motor neituten khawtlang mamawh zual phuhruk turin tui hi man neia chawi chhunzawm zelin an tui chawi man zawng zawng hi Rs. 5,30,000/- a nih thu leh hei hi Vawiin thlenga pek an la ni lo chu hriatthiam harsa an tih thu an sawi a. Thingtlang miharsa zawk te tui chawina bill hi pe thuai turin Mizoram sawrkar an phut thu an sawi bawk.


BJP ten TNT Camp an tlawh

BJP Mizoram Pradesh chuan nimin khan an President, Vanlalhmuaka hovin tunhnaia COVID-19 hri kai thahnem tak hmuhna hmun, Thutak Nunpuitu Team (TNT), Zuangtui chu an tlawh a, Oxygen Concentrator, Alu, Dal leh Steamer te pein, Vanlalhmuaka chuan TNT a Covid vei mek te chuan damna an chan leh thuai theih nan Mizoram mipui, Kohhran ho ten kan tawngtaipui reng a, Pathian in damna a pek leh vat ka beisei a ni, a ti. He hunah hian TNT Director, H. Vanlaldika chuan an mamawh em em, Oxygen Concentrator, Steamer bakah ei leh in tur an pek te avangin lawmthu a sawi bawk a ni.


Dampa Tiger Reserved-a ramsa kaptute man an ni

Dampa Tiger Reserved chhunga Dan phalloh a ramsa chi hrang hrang kaptu mi 4 te chu man niin thubuai siamsak an nih hnuah Jail-ah khung an ni. Andermanik khaw mi 5 te chuan June 9 khan Dampa Tiger Reserved Core chhungah Hauhuk nufa, Ramsial patuai leh Sazuk kapin Dampa Tiger Reserved-a thawktute chuan an Silai leh an ramsa kah, Sarep kg. 50 chuang nen an man a, an zinga mi pakhat chu kum tlinglo a nih avanga man lovin midang 4 te chu manin thubuai siam sak an ni a, niminpiah khan Mamit District Court-ah hruai niin Mamit District Jail-ah dah nghal an ni.

Supply Chain duan sak turin sawrkar phut

MPCC Communication Department chuan nimin khan thuchhuah siamin, ni 60 chuang inkharkhip kalpui tawhin a bikin thingtlang lama loneitute a nghawng na zualin, an thlai thar hralhna mumal a awm loh avangin harsatna an tawk mek tih an sawi a. Fur thlai thar hun vanglai taka thingtlang loneitute'n an tharchhuah sum-a an chantir theihnan sawrkar chu a rang thei ang bera thlai thar Supply Chain mumal tak duan sak tura an phut thu an sawi bawk.

Comments

Chhiar Hlawhte