Latest News

In lama hri kai enkawl vilna tur Apps thar tlangzarh

COVID-19 hri kai zinga mahni In lama inenkawl (Home Isolation) online hmanga vilna tur ‘Nishtha Teletrack’ application chu nimin khan Health Minister, Dr. R. Lalthangliana chuan a tlangzarh.

Video Conferencing kaltlanga Nishtha Teletrack tlangzarhtu Health Minister Dr. R. Lalthangliana chuan Mizoram leh India ram pumah COVID-19 Second wave nasa taka buaipui a lo ngaih tak avangin damdawi In bakah Covid Care Center leh 4C-ah te inenkawl a ni a, heng inenkawlna hmun bakah hian mahni In lamah mi thahnem tak an inenkawl mek bawk a, sawrkar laipui phei chuan inkaihhruaina an tihchhuah thar berah COVID-19 hri kai zinga symptom neilo te leh symptom na vak lo (mild symptoms) neite chu In lamah inenkawl tur a rawn ti tawh nghe nghe a, inenkawlna hmun tura ruat bikah te hi chuan a hlawma awm an nihna avangin Doctor leh Nurse te tan vil a harsa lova, In lama inenkawl (home isolation) te hi inkalchilha in vil a hautakin a buaithlak thu sawiin, Nisha Teletrack a awm takah hi chuan thil tih a awlsam tawh dawn a ni, a ti.

COVID Helpline Doctor Duty ten Home Isolation-a awmte mumal zawka an enkawl theih nan National Health Mission (NHM) chuan JHPIEGO nen tangkawpin Technology hmanga In lama damlo hri kai enkawl mek te uluk zawka an vil theih nan ‘Nishtha Teletrack’ hi a duang chhuak a, The United States Agency for International Development (USAID) in hemi atana senso zawng zawng hi an tum a, ‘Nistha Teletrack’ hi Mobile leh Web-Based application niin thla 3 chhunga hman atan ruahman phawt a ni a. He Teletrack Application hmang hian COVID damlo te chu COVID helpline atangin call an ni thin anga, damlo mamawh dan azirin online-Teleconsultation hmanga doctor duty te rawn theih an ni dawn a ni.

Doctor rawn mai bakah hian Dietician-in ni bik ruatah ei leh in lam chungchang Counselling a pe anga, rilru lam Counselling pawh a ni ruat bikah Clinical Psychologist ten an pe thin dawn bawk a. Damlo Smartphone hmangte chuan he Teletrack Application hi download in nitin an dinhmun - khawsik zat, SpO2 leh a tul dangte an upload thei ang a, chu chu COVID helpline atangin Teletrack dashboard atangin a vil theih dawn a. Emergency thilah pawh damdawi In lama in refer ngaite a hriat zung zung theih dawn a, State-in Data Monitoring System tha tak kan neih theih phah mai bakah damlo te tan a tangkai hle tura beisei a ni.

Health Minister hian he hmalakna hi nikum January thla a USA-a a zin tuma John Hopkins Programme for International Education in Gynaecology and Obstetrics (John Hopkins University Affiliate (Jhpiego) hotu nen thawhdunna an lo sawi tawh rahchhuah a nih thu a sawi bawk.

Comments

Chhiar Hlawhte