RT-PCR building tur sak hna PWD kutah dah a ni

Health Minister Dr. R. Lalthangliana chuan Civil Hospital Lunglei Compound-a Laboratory Building, RT-PCR khawl pawh bun theihna tur sa tura hmalak tan mek chu PWD kuta dah a nih thu sawiin, PWD chu contractor tur an nih thu leh tunah chuan pawisa hmanna tur a la awm loh thu a sawi bawk.

He Laboratory building sakna tur atan hian sawrkar chuan cheng nuai 781 man DPR a siam a, hei hi NEC leh DoNER lamah thehluh tawh niin Chief Minister Zoramthanga pawhin D.O Letter in a umzui tawh thu Dr. R. Lalthangliana chuan a sawi a, mahse, pawisa hi sanction hun tur hriat ala ni lova, Mizoram sawrkar chuan he hna hi a thawk tan nghal tawh thung a ni.

Tunhnaia MINECO-a Contact Tracing chungchang sawihona ah Laboratory building chungchang hi a lo sawi chhuak tawh a, hemi tum hian Dr, R. Lalthangliana chuan, “He Laboratory sakna tur hi engtikah nge kan hmuh theih dawn tih a la hriat chiah rih loh laiin Chief Minister hmalakna leh thahnemngaihna zarah Mizoram sawrkar chuan a building sak hna tan turin ruahmanna kan lo siam fel tawh a ni,” a ti.