Posts

Showing posts from July, 2024

THAT THEIHMIAHLOHNA BAWM -PARTY POLITICS

Image
THAT THEIHMIAHLOHNA BAWM -PARTY POLITICS - Rev. Dr. Zaichhawna Hlawndo

ASF vangin Vawk 20 thiin 57 suat belh leh a ni

Image
Serchhip District-a African Swine Fever (ASF) hri leng avangin nimin khan Vawk 20 a thi leh a, Serchhip-a VC Area tinah Vawk thi hi chhinchhiah a ni tawh a ni.

Two Wheeler Taxi Permit tam

Image
Mizoram pumah Two Wheeler Taxi Permit 5256 zet pekchhuah a ni tawh.

SAY ten hnatlang an nei

Image
Salvation Army thalai pawl, Salvation Army Youth (SAY) Serchhip Corps chuan tun thla ni 2-a Founders Day an lawmna kal zelah nimin July 17, 2024 khan Serchhip chhimlam kawt-chhuah, Sailiamkawn leh Mat lui (Thenzawl kai) inkarkawngpui dung-a bawlhhlawh chharfai hnatlang an nei a, Serchhip leh Mat lui nkar-ah hian bawlhhlawh paih ru engemaw zat awm thinin heng te hi SAY te hian chhar faiin a paihna tur hmunah an paih a ni.

Kawng siam hna zo hman lo

Image
Tunhnaia Serchhip IOC Veng atanga P&E Veng panna kawng, Addl. SP Quarters bula kawng chhuat la bal chu nimin atang khan PWD ten a siamthat hna thawkin kawng chhak lamah zauh a ni a, he hna hi nimin khan zawhfel hman a ni lo a, hei vang hian Vawiin hian chhunzawm leh tur a ni ang. Hetianga kawng siam hna thawh a nih leh dawn avang hian Vawiin lamah helai kawngah hian lirthei ke pali nei leh a aia lian kaltlang theih ala ni dawn lo a, Two Wheeler leh Three Wheeler te chu katlang theih a ni ang.

Central YMA in tlawh

Central YMA chuan Phunchawng-a Ruihhlo ngai te enkawlna hmun, Operation Kingdom Ministry (OKM) chu an tlawh a, a hungna tur an mamawh angin Rangva Bundle 10 an hlan nghal bawk. He hunah hian Central YMA Asst. Secretary Fabian Lalfakawma chuan thalai tam tak helai hmun a awm mekte chu ngaihtuahna thar pu chunga helai hmun an awm chhunga hun hmang tur leh an chhuah hunah pawh Ram leh hnam tana thahnemngai taka ke pen turin a chah a ni.

MZI in tanpuina an hlan

Mizo Zaimi Inzawmkhawm (MZI) chuan Cyclone Remal avanga chhiatna tuar te tana vehbur an khawn atanga an hmuh tlingkhawm Rs. 4,62,121/- chu nimin khan an semchhuak a. Salem Veng Branch YMA, Aizawl hnenah Rs. 50,000/- hlanin Melthum Branch YMA, Aizawl hnenah Rs. 2,15,000/-; Hlimen Branch YMA, Aizawl hnenah Rs. 1,57,121/- leh Aibawk Branch YMA hnenah Rs 40,000/- an hlan a ni.

Grape lei zo thei dawn lo

Kumin hian Hnahlan leh Champhai-a Grape chingtute tharchhuah Grape rah te chu Grape Growers Society ten an lei zawh theih hmel loh nia thudawn a ni. Hnahlan leh Champhai-a Winery enkawltute chuan kum kalta a Grape an lei atanga a tui an sawrchhuah thahnem tak hralh lohva a la awm avang leh a dahna tur an ngah tawk loh avangin an Society member te tharchhuah zawng zawng an lei thei dawn lo a. Champhai Grape Winery a sawr turin tunkar bul lam atang khan Grape rah lei tan a ni a. Nikum-ah quintal 1,069 an lei a, an beisei anga an hralhchhuah tam loh avangin zem ruak a tlem hle a ni. Champhai leh a chheh-velah kumin hian an Grape-te rah tha mah se, rial leh thli-in a tihchhiat nasat avangin an beisei ang Grape an thar thei dawn lo niin an sawi a, nikum erawh an phak tho an ring a ni. Tun dinhmunah Champhai Tlangsam Winery-ah hian Wine-a la siam loh Grape tui litre 1,30,000 bakah Wine-a siam tawh litre 9,000 vel a awm a ni.

Oil Palm herna enchhin a ni

Mamit District chhunga Tuidam khua ah Mamit District Cooperation Office huaihawtin Mamit District chhunga a hmasa ber atan Tuidam Oil Palm Farmer Cooperative Society Ltd. te tana Oil Palm Cooking Oil herna khawl enchhinna chu niminpiah khan neih niin Mamit-a MJA Member te leh Information Department hotute chuan he hun hi an telpui a. District Cooperative Officer Lalthangfala chuan report pe in he Oil Palm Herna khawl hian ni khatah Oil Palm quintal 10 a her thei a, ni khatah Oil Palm hriak litre 200 leh Oil Palm cake kg. 300 a herchhuak thei dawn a. He khawl bun nan leh a In sakna hian cheng nuai 22.50 hmanral a ni. He khawl hi hman a nih hunah chuan Oil palm chingtute hian tuna Oil Palm an hralhna aia a let thuma hlawk zawkin an Oil Palm te hi an hralh thei tawh dawn tih a sawi bawk. Tunah hian Mamit District chhungah Cooperative Society 115 an awm mekin, hmalakna hrang hrang kalpui mek a ni.

Lawngtlai District-ah Tuialhthei khuahkhirhna siam

Lawngtlai District Magistrate Cheemala Siva Gopal Reddy chuan Bharatiya Nagarik Suraksha Sanhita (BNSS) in thuneihna a pek hmangin Lawngtlai District-ah Tuialhthei khuahkhirhna thupek a chhuah a, Filling Station te chu tuialhthei a man bithliah aia sanga hralh chhuak lo turin a tih bakah Myanmar leh ramdangah sumdawnna kaihhnawihah tuialhthei pekchhuah remtih a nih loh thu leh Lawngtlai District chhungah dan lova tuialhthei lei leh phurh luh a khap a nih thu a tarlang bawk a ni.

‘Hripui leng kâra hmangaihna’ Lehkhabu tlangzarh

The Writer's Club leh Laisuih Zirbing Rûn tangdunin COVID-19 hri len laia Thawnthu tawi inziahsiak an buatsaiha a thazual 20 dah khawmna lehkhabu, ‘Hripui leng kâra hmangaihna’ tih chu nimin khan MJA President C. Lalrambuatsaiha'n Emerald Hotel Conference Hall, Aizawl-ah a tlângzarh.

RD Minister in MzSRLM SHG member te a kawm

Rural Development Department changtu Minister Prof. Lalnilawma chuan MzSRLM hnuaia SHG member te chu niminpiah khan biakhmuh theihna kaltlangin a kawm.

Nu ber mawhphurhna a pawimawh thu sawi

Sports Minister Lalnghinglova Hmar chuan chhungkua leh khawtlang tihhmasawnna kawng ah nu berte mawhphurhna chu mawhphurhna pawimawh berte zing ami a nih thu a sawi.

ZPM General Hqrs. hruaitute leh Val Upa Council bakah Legislature Party ten thutkhawm an nei

ZPM Val Upa Council, ZPM Legislature Party leh ZPM General Headquarters Elected OB te chu nimin khan Chief Ministers Conference Room-ah thukhawmin Party kal zel dan tur leh Sawrkar inrelbawl dan kawnga hmasawn zel dan tur an sawiho.

Churachandpur leh Aizawl inkara Helicopter

Churachandpur (Manipur) leh Aizawl (Mizoram) inkara Helicopter thlawhtir leh turin ruahmanna siam mek a ni a, tunkar Zirtawpni hian thlawh tantir theih beisei a ni.

Mizoram-a Myanmar raltlan awm mek te Biometric hmanga chhinchhiah hun tur pawtsei

Sawrkar laipui chuan Mizoram a raltlan mek Myanmar mi 33,800 chuangte biometric hmanga chhinchhiah hna kalpui tur hun chu December thla thlengin a pawtsei a. Tun dinhmunah Mizoram hmun hrang hrangah Myanmar atanga rawn raltlan hi mi 33,823 an awm mek nia hriat a ni.

Congress Block inthlang

Image
Serchhip Block Congress Committee chuan nimin khan Serchhip Hmar Veng YMA Hall-ah an hruaitu tur thlanna an nei a, President-ah Lalramnghaka Kawlni (Tuikhuah Veng); Vice President-ah R. Vanlaldula (Vengchung); Treasurer-ah F. Lalhmunliana (New Serchhip) leh MCC atan F. Malsawmtluanga (Leisang Veng) te thlan an ni a, he inthlanna hi MPCC atangin hruaitu ten rawn telpuiin Block huamchhunga Party mi thahnem tak an tel a ni.

Kal dan phung pangngai thlak danglama dan hnuaiah thlirna thar nen hmasawnna hnathawh a tul - DC Serchhip

Image
Serchhip District Bawrhsap Paul L. Khuma chuan Digital District leh Green District kalpui te chu Serchhip District-a a hmathlir a nih thu sawiin, kal dan phung pangngai thlak danglama dan hnuaiah vek ngaihtuahna leh thlirna thar nen District hmasawnna hnathawh tul a tih thu te a sawi.

ASF hri in ziaawm lam ala pan thei meuh lo

Image
Nimin khan Serchhip District-ah African Swine Fever (ASF) vanga Vawk thi 37 zet awm lehin Vawk 156 zet suat leh a ni a, Serchhip District-ah hian ASF hri leng hian ziaawm lam ala pan thei meuh lo a ni.

Dan thar pathum zirhona Serchhip-ah neih a ni

Image
District Hub for Empowerment of Women (DHEW) buatsaihin nimin khan Serchhip SP Conference Hall-ah WCD hnuaia thawktute leh Serchhip District Executive Force (DEF) te tan Criminal Law thar pathum zirhona neih a ni.

Kawng siam hna thawk dawn

Image
Tunhnia ruahsur nasa avanga Serchhip IOC Veng atanga P&E Veng panna, Addl. SP Quarters bula kawng chhuak tlabal siam hna chu Vawiin July 17, 2024 hian PWD ten an thawk dawn a. He hna hi chak zawka thawh a nih theih nan Vawiin hian  Serchhip Addl. SP Quarters leh Tlangnuam panna kawngpeng inkar-ah lirthei eng chi mah kal theih a ni dawn lo a ni.

MAP ten Training nei mek

Disaster Management and Rehabilitation Department leh 1st Bn Mizoram Armed Police in an buatsaih State Disaster Response Force te tana ni thum chhung awh tur chhiatrupna a lo thlen thulh a chhanchhuahna hna thawh dan tur zirna hun chu Aizawl Armed Veng-a 1st Bn. MAP Hqrs. ah neih mek a ni a, mi 33 ten training neiin Vawiin hian zawhfel tur a ni ang.

GST zirhona hun buatsaih

Taxation Department chuan nimin khan Saitual-ah sumdawngte leh Contractor-te tan Goods and Services Tax (GST) chungchang zirhona hun an buatsaih a, Saitual-ah hian nikum September 9 khan Deputy Commissioner of State Tax Office hawn niin Taxation Department chuan District hmansawn nan Tax Revenue chung-changah thahnem ngai takin hma an la mek a ni.

Operator sattu a puh man

Pathianni (July 14, 2024) tlai-a Lunglei Hrang-chalkawn-a Excavator Operator Mukesh Kumar Sahni (31) Gopalgandhi, Bihar; tuna Lunglei-a awm mek banrek-a sah saktu nia hriat Truck Driver Zoramdina, Durtlang Mual Veng chu nimin khan Lawngtlai-ah man a ni a. Thudawn danin Truck Driver hian a Motor tang nawrchhuak turin Excavator Operator hi a ti a, Operator hian Diesel a neih loh thu a sawi hnuah Driver hi thinrim in a banrek-ah hian a sah sak a ni.

Deptt. hmalakna inhrilhfiah

Lunglei District Bawrhsap R. Lalthazuala kaihhruaiin nimin khan Lunglei DC Conference Hall-ah a ni hnih nan Lunglei District chhunga Department hrang hrangte hnathawh leh dinhmun inhrilh hriat nana inkawm hona buatsaih leh a ni a, he hunah hian chawhma lamah Office 11 leh chawhnu lamah Office 22 ten an hmalakna leh an dinhmun te an tarlang a. Department-te harsatna hrang hrang chinfel dan tur leh tha zawka hna thawh dan tur rawtna hrang hrangte sawiho a ni bawk. He hunah hian Bawrhsap chuan sawrkar Department hrang hrangte nena thawhhona tha tak a awm theih nan Department hrang hrangte hnathawh kalphung, hmachhawp leh harsatnate hriatchian a mamawh thu a sawi bawk a ni.

LADC harsatna te thlen

Lai Autonomous District Council (LADC) a Chief Executive Member C. Lalmuanthanga chuan nimin khan Raj Bhavan-ah Governor Dr. Hari Babu Kambhampati chu hmuin, LADC harsatna leh mamawh hrang hrangte a thlen a. LADC CEM chuan Gazetted post appointment leh LADC Fund hmuh, Non-Salary chungchang te, kum 20 liamta atanga Vawiin thlenga an dinhmun tlangpui te Larsap hi a hrilh a. Larsap chuan Nodal Department District Council & Minority Affairs (DC&MA)-ah felfai zawk a kalpui a nih theih nan thlen thin ni se a duh thu a sawi a. Department atanga harsatna a awm loh chuan dan ang taka kalpui thin a nih tur thu a sawi bawk.

MSPMC Team-ten sawrkar hmalakna enfiah zel

Mizoram State Project Monitoring Committee chuan niminpiah khan Aizawl khawpui chhunga sawrkar hmalakna hnuaia hnathawh mek pathum (3) te chu a hmunah kalin an enfiah.

Kuhva rah tawlhtute mit siai khum ah ZPM puh

MNF party chuan ZPM Sawrkarin Kuhva rah tawlhtu an party mite laka mit an la siai khum zel chu bansan thuai se an duh thu an sawi.

Health Care chungchang MPCC in an thlen

Mizoram Pradesh Congress Committee (MPCC) Treasurer Dr. Lalmalsawma Nghaka leh MPCC hruaitu thenkhat chuan nimin khan Mizoram Health Care Society (MHCS) Chief Executive Officer (CEO) Dr. Biakthansangi hmuin Mizoram Health Care tawp ta chungchang leh mipui ten harsatna an tawh chungchang te an sawipui a, Health Care Scheme thar a awm hma tal an lo in enkawl lai lawk theih nan a ruahmanna siam sak tul an tih thu te an thlen bawk a ni. He hunah hian Dr. Biakthansangi chuan Health Care ruahmanna thar hi October thla chung ngeia kalpui an tum thu leh a hlui pawh engemaw chen extend chungchang an ngaihtuah thu Congress party hruaitute hi a lo hrilh ve bawk a ni. 

ZPM in thubuai pathum CBI chhui tir turin an ngen

ZPM Legal Department chuan Lokayukta-a case pending mek te chu CBI chhui tura hlan turin Mizoram Lokayukta-ah ngenna an thlen.

Myanmar-a hralh tur nia hriat Diesel man leh

Central Young Lai Association (CYLA) in dan kalha Myanmar a Diesel leh Petrol hralh a nih loh nana hma an lakna kal mekah niminpiah khan YLA Diltlang Sub-Hqrs. chuan lirthei pahnih atangin Diesel barrel 19 an man a, Diesel hi Lunglei atanga phurh niin, Chawngte paltlangin Diltlang lamah kalpui a ni a, YLA Duty ten lo manin Myanmar-a hralh tur ngei a ni tih YLA hruaitute chuan an sawi a ni. Hetihlai hian nizan hmasa khan Siaha-a dah tur Diesel phur Tanker pahnih chu venhimna hnuaiah chhuah a ni thung a, heng te hi an lehkha te uluk taka enfiah a nih hnuah Myanmar lama chhehrelh tur ni theia ngaih a nih loh vangin chhuah a ni a. Engemaw palhah heng Diesel phur Tanker te hi an dahna hmun an thlen hma a khawih chingpen palh hlauhthawn thilah venhimna hnuaiah kaltir niin Lawngtlai Police ten Kawlchaw thleng an veng a, Kawlchaw atangin Kawlchaw-a Police duty ten Siaha thlengin an hruai leh a ni.

Leiba vangin policy kalpui vut vut thei lo

Chief Minister Lalduhoma chuan leiba chinfel ngai a tam avangin an policy-te a kalpui nghal vut vut theih loh tih a sawi.

Bairabi leh Sairang inkar-a Rel kawng siam mek Mizoram Lok Sabha MP in a hmunah a tlawh

Bairabi leh Sairang inkar-a Rel kawng siam mek chu nimin khan Mizoram Lok Sabha MP Richard Vanlalhmangaiha chuan tlawhin he hna thawh meka hmasawnna leh hnathawh tawh chin leh hmabak la awm te a enfiah.

Serchhip MNF East Block ten hruaitu tur an thlang

Image
Serchhip East Block MNF te chuan nimin khan kum 2024-2026 chhunga hruaitu tur thlanna neiin President-ah C. Lalrinfela chu thlantlin a ni.

Vawk thi la awm belh zel

Image
Nimin khan Serchhip District chhunga khua leh Veng 6-ah ASF vanga Vawk thi 64 zet a awm leh a, Thenzawl-ah Vawk 38 thiin North Vanlaiphai-ah 13, Lungchhuan-ah 6, East Lungdar-ah 4 leh Serchhip Vengchung-ah pakhat te thiin Leng khua ah Vawk thi chhinchhiah thar a ni ve leh bawk a, Leng khua ah hian Vawk thi 2 a awm a ni. Nimin vek khan Veng leh khua 12-ah vawk 83 zet suat leh a ni bawk a, Lungchhuan khua ah Vawk suat tam berin 30 zet suat a ni a, Leng khua ah Vawk 11 suat a ni bawk. Heti hian nimin thleng khan Serchhip District-ah ASF vanga Vawk thi 1311 tling tawhin Vawk 3328 zet suat a ni tawh bawk a ni.

Siaha-ah kawngzawh

Siaha College Vaih 3-a cheng T. Linda (47) chu a pasal T. Beihrualy (45) in tunhnaiah kut a thlak avanga a hliam tuar lova a boral avangin nimin khan Siaha-ah Mara Chano Py (MChP), Mizo Hmeichhe Insuihkhawm Pawl (MHIP) leh Lai Women Association (LWA) te chuan T. Linda thlavang hauhna kawngzawh an huaihawt a. Rorum taka hmeichhiate chunga kutthlak avanga thihna thleng thin chu thleng tawhlo se an duh tih an sawi a ni.

Deptt. hmalakna sawiho

Lunglei District Deputy Commissioner R. Lalthazuala kaihhruaiin nimin khan Lunglei DC Conference Hall-ah Lunglei District chhunga department hrang hrangte hna thawh leh dinhmun inhrilhhriat nana inkawm hona buatsaih a ni a. He hunah hian Bawrhsap chuan Lunglei District chu Mizoram-a District lian ber dawttu a nih angin a enkawlna kawngah sawrkar department hrang hrangte nena thawhhona tha tak neih a pawi-mawh dawn thu a sawi a. Department hrang hrang hnathawh a inang lova, chu'ng ah chuan department-te dinhmun leh harsatnate inhriatpui tawn a, langtlang leh tha zawka hna thawh a nih theih nan hma lak a tul thu a sawi bawk a ni.

Kum 2022 hnu lamah ruang chhar 135 zet awm tawh

Kum 2022 atanga kumin April thla tawp thleng khan Mizoram-ah mipa ruang chhar 126 leh hmeichhe ruang chhar 9, a vaiin 135 a awm tawh.

Land Comtt. in ngaihtuah

Champhai Town Land Committee chu nimin khan District Collector mawhphurhna la mektu Addl. DC K. Zorammuana hovin Champhai DC Conference Hall-ah an thukhawm a. He hunah hian Champhai khawpui Veng 16 atangin House Pass, Periodic Patta leh Land Lease dilna lut 278 a luh thu tarlan niin heng te hi House Pass 163, Periodic Patta 5 leh Land Lease 4 te a ni a. Land Revenue & Settlement Department zir-chianna leh record neihte behchhana Champhai Town Land Committee-in ngun taka dilna lutte hi a ngaihtuah hnuah dilna 271 zawk chu pawm a ni a.  Dilna dang 7 te erawh chu document thehluh kim loh  avang te, Land Committee in a pek theih chin aia zau a nih vang leh ramri tihchian a ngaih avangin ngaihtuah that tura dah an ni.

Damdawi In tha ah tling leh

India ram Hospital tha bik tehna, NQAS Certification chu Mizoram-a District Hospital pathum - Civil Hospital Aizawl, Civil Hospital Lunglei leh Champhai District Hospital bakah Urban Primary Health Centre pakhat, ITI UPHC te hnenah hlan a ni a, heti hian Mizoram-ah NQAS Certified facility pariat a awm ta a ni. National Health Mission (NHM) Mission Director Dr. Eric Zomawia chuan Mizoram-ah India ram-a damdawi In tha bik a thlanchhuah a awm zel chu mellung pawimawh tak a nih thu sawiin, hetiang ang hlawhtlinna neih anih theihnana thawktu zawng zawng te inpekna leh thawhho thatna te avangin lawmthu a sawi a ni. 

CESJ ten Bawrhsap te hnenah lehkha an thawn

Centre For Environment and Social Justice (CESJ) Mizoram chuan Vawk hri, African Swine Fever (ASF) vanga Vawk thi sawngbawl chungchang ah Mizoram District tin Bawrhsap te lehkha thawnin, khua leh Veng tina Vawk vulh zawng zawngte Village Council emaw, Local Council emaw te hriatpuinain registration kimchang taka tih vek ni se an ti a. Vawk thi reng reng chu VC emaw LC te emaw hriatpui loha phum leh tihral phal loh nise an tih bakah Record te a inmil em tih enfiah fo nise an duh thu te an thlen a ni.

Vaivakawn - Zohnuai lei tlahniam a hmunah tlawh

Aizawl Vaivakawn atanga Zohnuai panna kawng lei tlahniam avanga harsatna thleng chu nimin khan Minister ten a hmunah tlawhin an enfiah.

Mumbai-a Mizoram House satu sawrkar in thlak a tum

Kum 2013 atanga Navi Mumbai-a Mizoram State Guest House & Emporium sak hna chu tun thlenga zawh ala nih loh avangin a satu tur a thara ngaihtuah a ni dawn.

Aizawl-a thlai thar man to chhan a phurh man to vang

Mizoram Chamber of Commerce & Industries (MCCI) zirchianna a a landanin Aizawl-a thlai thar man to chhan chu a phurhna man to vang a ni.

MNYF ten ‘Dawt Hal Programme’ siam an tum

MNF Thalai President leh MLA Robert Romawia Royte chuan ZPM Sawrkar hotute dawt sawi hrang puangchhuak turin ‘Dawt hal Programme’ an siam tur thu a sawi.

Zirlaibu la dawng kim lo School 1270 an la awm

Mizoram chhungah Samagra Shiksha hnuaia zirlaibu a thlawn a sem la dawngkimlo School 1270 an la awm.

Sawrkar in a sum neih ang angte Revenue thawkchhuak zawnga hmang turin a kalpui zel

Local Administration Department (LAD) changtu Minister C. Lalsawivunga chuan sawrkar in a sum neih ang ang te Revenue thawkchhuak zawnga hmang turin a kalpui zel tih a sawi.

MMFSL chhunga sum tih chingpenna thubuai ah Police ten Chargesheet an thehlut tawh

Mizoram Police chuan Mahindra & Mahindra Financial Services Ltd. (MMFSL) chhunga sum tih chingpenna lian ber, North East States pum tuamtu chu chhui chhoh zel a ni tih sawiin, Assam leh Mizoram chhunga mawhphurtute pawh an nih tawh thu leh Chargesheet thehluh a nih tawh thu an sawi bawk.

Assistant Sub-Inspector of Police (Ministerial) hnaruak

Image
 No.A.12011/14/2024-MPSC(DR-II) MIZORAM PUBLIC SERVICE COMMISSION Mizoram New Capital Complex, Aizawl Advertisement (Group ‘B’ Non-Gazetted Post) No. 4 of 2024 – 2025 Dated Aizawl, the 4th July,2024

ASF vangin kumin ah Vawk 1247 a thi tawh

Image
Nimin July 14, 2024 thleng khan Serchhip District-ah African Swine Fever (ASF) vangin Vawk 1247 thi tawhin Vawk 3328 suat a ni tawh bawk.

Tang tlanchhuak enkawl mek

Image
Tunhnaia Serchhip District Jail atanga tlan-chhuak an man leh tak Lalnunnema chu Serchhip District Jail-ah enkawl mek niin Bail tuma buaipui mek a ni.

Lirthei lian tlan dan siam

Image
Serchhip atanga Hnahthial panna kawngpui chu Hnahthial paltlang tur lirthei lian tan chhun lamah tlan khap rih a ni.

UPC (NEI) ten zirhona nei

UPC (NEI) General Sunday School leh National Tobacco Control Programme (NTCP) tang-kawp chuan Inrinni khan Thenzawl Field Veng-a UPC Biak In-ah ‘Zuk leh hmuam that lohna’ tih leh ‘Sunday school pawimawhna’ tih thupui-ah hmangin Training an nei a, Serchhip atangin NTCP a thawktu ten Vaihlo that lohna leh a khapna chungchang zirtirin Evan R. Lalbiakfela, Treasurer, General Sunday School in Sunday School pawimawhna te a zirtir bawk a ni.

Harvest Festival Sunday

The Salvation Army, India Eastern Territory huamchhunga mi te chuan nimin Pathianni khan ‘Harvest Festival Sunday’ an hmang a, ‘Malsawmtu hnena lawmthu sawi’ tih chu thupui ah hmangin thlai thar thawhlawm lakkhawm a ni. Salvation Army te hian kum 1890 Favang atang khan he Ni hi an hmang tan a ni.

Missionary Retreat nei

Synod Mission Board buatsaih North East Region Missionary Retreat vawi 5-na chu nimin Pathianni hmang khan Bawngkawn Presbyterian Kohhran Biak In-ah neih a ni a, 'Chanchin Tha hril' tih chu thupui ah hmangin hmarchhak bial-a Mission Field pasarih-ah hian Missionary 612 an thawk mek a ni.

YMA in raltlan tanpuina hlan

Central YMA chuan Berawtlang-a Manipur raltlan hnuchham enkawlna ah Inrinni khan ei tur leh mamawh dang Rs.50,000/- hu an hlan a. Tunah hian Hnuchham enkawlna ah hian naupang 24 leh thawktu 4 an awm mek a ni.

Thla 5 chhunga In chhia 2206

Thla nga kalta, January, 2024 atanga May 31,2024 inkar chhung khan Mizoram-ah khuarel chhiatna chi hrang hrang - thlipui, kangmei, leimin leh tuilian vanga In chhia 2,206 a awm a awm thu Disaster Management & Rehabilitation Department SPIO chuan zawhna chhangin a tarlang a, khuarel chhiatna thleng zingah thlipui tleh vanga In chhia 1,797, leimin vanga chhia 318, tuilian vanga chhia 49 leh In kang 42 an awm a. Hemi hun chhung hian kangmei vanga thi mi pahnih leh leimin vanga thi mi 31 an awm niin a tarlang bawk. Zawhna chhangin SPIO chuan khuarel chhiatna a lo awmin sawrkarin an In leh lo chhiat dan kimchang Zonal Officer kaltlangin an thehlut a, SDRF norms angin tanpuina/chhawmdawlna pek thin an ni.

Godrej hmalakna sawidun

Inrinni khan Chief Minister Lalduhoma leh Godrej Group President Rakesh Swami te chu Mumbai-ah inkawmin Mizoram-a Godrej Agrovet te hmalak theihna an sawidun a, heng zingah hian tuna Bukvannei-a an Oil Palm Mill tihchangtlun chungchang te, Mizoram-a Godrej Samadhan Center kalpui ve chungchang te, Oil Palm Plantation neituten thlai dang; Sawhthing, Aieng, Hmarcha leh a remchang dang nena chin pawlha (intercropping) hlawk zawka hna an thawh theih dan tur te a tel a ni. Rakesh Swami hian Mizoram-ah Sapthei processing te, Fish feed te, Fertilizer te, Poultry farm leh Frozen Food te, Sahbon leh Glycerin thlenga a siamna an bun theih a beisei thu Chief Minister hnenah hian a thlen a. An hmalak theihna te en turin a Group hnuaia business hrang hrang hruaitute nen August thlaah Mizoram rawn zin an tum a ni.

State Level Cooperative Development Council din dawn

Cooperation Minister PC. Vanlalruata’n hun reilote ah State Level Cooperative Development Council din a ni dawn tih a sawi.

Mizoram-a Jail hrang hrang ah tang mi 1782 an awm mek

Mizoram-ah Jail tang mi 1,782 an awm mek a, Lung In thenkhatah tang awm thei tur zat bituk aia tam an awm mek thu Prison Department hotute chuan an sawi.

Sawrkar in power man cheng vbc. 211 ba; Nikumah sawkarin power man-ah vbc. 163 hloh

Mizoram sawrkar chuan June 14, 2024 thleng khan Power leina man ba cheng vbc. 211.15 a nei a, pawisa bat zat hi che ve rengin nikum chhunga power atanga sawrkar hloh hi vbc. 163.91 nia chhut a ni.

Bairabi leh Hortoki inkarah Rel a tlan tawh

Bairabi atanga Hortoki inkar chu Rel tlan thei turin peihfel (complete) a ni tawh a, Commission of Railway Safety (CRS)-in Safety Certificate a pek hunah mipui hman/chuan theih tura hawn a ni ang a. Hetihlai hian Bairabi - Sairang Rel kawng chu July, 2025-ah peihfel beisei a ni.

Central YMA in Cyclone Remal tuartute hnenah tanpuina cheng nuai 56 chuang an sem

Central YMA chuan Cyclone Remal avanga chhiatna tawkte tanpuina tur sum leh pai an hmuh te chu Inrinni khan Aizawl atangin an semchhuak a, he hunah hian mimal leh pawl hrang hrang hnenah cheng nuai 56 chuang zet an semchhuak a ni.

Baktawng Cluster-a Pangang khawitute hnenah Solar-Electric Bulb leh Solar light sem a ni

Image
Solar Electric Light Company (SELCO) te chuan Serchhip Sericulture Department hnuaia Baktawng Cluster huamchhunga Pangang thar rang chi (Eri) khawi/vulhtute hnenah nizung chakna thahrui hmang Solar-Electric Bulb leh Solar light hrang hrangte nimin khan sem a ni.

Bawrhsap hovin Land Committee thutkhawm neih a ni

Image
Serchhip Town Land Committee chu nimin an Chairman leh District Bawrhsap Paul L. Khuma hova thukhawmin In hmun leh Huan Pass dilna lut te an ngaihtuah.

Serchhip-a VC Area 5 Vawk hri lenna hmunah puang

Image
Serchhip khawpui chhunga VC Area panga (5) te chu Vawk hri lenna hmun, Infected Area-ah puan a ni.

SAY ten thisen Unit 35 pe

Image
Salvation Army thalai pawl, Salvation Army Youth (SAY) Central South Division chuan nimin khan Serchhipn Blood Bank-a dah turin thisen Unit 35 an pe a, thisen petute hi mipa 27 leh hmei-chhia 8 an ni. SAY Central South Division-ah hian Serchhip CO Bial leh Thenzawl CO Bial te bakahm Chhiahtlang Corps ten thisen hi an pe a, Serchhip Blood Bank-ah kalin thisen hi an pe a ni.

2 Wheeler Taxi rawng inang

State Transport Authority thutkhawm kumin June 13-a neih chuan Mizoram-a Two Wheeler Taxi te tan rawng inang (Prescribed Colour) neih tha a ti a. Two Wheeler Taxi rawng chungchanga rawtna thehlut duh apiang te tan Secretary, State Transport Authority Office, Vanapa Hall bulah August 16, 2024 aia tlai lovah thehluh theih a ni ang. Rawtna thehlut te chuan mahni hming, address leh contact number chiang taka ziakin, rawtna sample, colour (4 angles) a print thehluh tur a ni.

Session nei turin ko

Larsap Dr. Hari Babu Kambhampati chuan thla thar, August ni 20, 2024 atanga tan turin Mizoram Legislative Assembly Session 8-na thutkhawm vawi 3-na a ko a, chawhma dar 10:30-ah thutkhawm hi tanin Session chhunga tihtur kimchang chu Speaker hova Business Advisory Committee (BAC) thukhawmin an la rel dawn a. Assembly hotute sawi danin BAC hi Assembly Speaker Lalbiakzama kaihruaiin an thukhawm thuai dawn a ni.

Police ten damdawi man tam

Khawzawl leh Champhai Police tangkawp chuan nimin khan Champhai atanga Aizawl pan lirthei pakhat atangin Methamphetamine hi Kg 115.55 zet an man a, heng damdawi te hi pack khat-ah 10,100 zel awmin a vaiin pack 106 a ni a, mum 1,70,600 zet a ni. Tun tum hi Mizoram-ah hetiang damdawi tum khata an man tam ber tum niin cheng vbc. 32.11 man vel nia chhut a ni a, a neitu leh Motor neitu nia hriat Lalrintluanga, Champhai Vengsang nia insawi chu man nghal a ni.

MYC Chairman nen inkawm

National Skill Development Corporation a State Engagement, Masotmi Zimik chu nimin khan Mizoram Youth Commission (MYC) Chairman Office-ah lengin MYC Chairman Malsawmzuala Ralte nen an inkawm a, Mizo thalaite Japan a hnathawka an kal theih dan tur sawiin, NSDC hnuaiah Training Centre, Greater Noida-ah neiin, chutah chuan Japan a hnathawka kal turte training an pek thin thu leh an hnathawhna tur Japan company te nen an interview hmasa vek thin tih a sawi a, a zirchhuakte chuan Japan-ah hna an hmu nghal thin tih a sawi bawk. MYC nen thawhho a, Mizo thalai pawl 12 pass emaw, Nursing a degree neite Japan-a hna thawk thei tura hmalak tum a ni.

Hna hauhsak loh an thlen

Mizoram Ex-Services League Headquarters hruaitute chuan Sipai pension tana sawrkar hna Reservation chungchangah nimin khan Home Minister K. Sapdanga chu a Pisa-ah an hmu a. Mizoram Ex-Services League hruaitute chuan MPSC in Assistant Sub-Inspector of Police post 20 a lak turah Ex-Servicemen te tan Reservation siam a nilo chu pawi an tih thu leh, sawrkar in dan a siam anga an chanvo an chan theihna atan hmalak pui turin Home Minister hi an ngen a. Home Minister chuan Sipai pension te chu ram tana an thawhna te an hriat reng thu leh an chanvo an chan theihna atan theihtawp chhuah a hma a lo lakpui tur thu a lo hrilh a ni.

Sawrkar tharin kuthnathawktute chawikan a ngaipawimawh ber - Agriculture Minister

Agriculture Minister PC. Vanlalruata chuan sawrkar tharin kuthnathawktute chawikan a ngaipawimawh ber niin a sawi.

Thapui thawha Mizoram Health Care System siamthat a ngai - Health Minister

Health Minister Lalrinpuii chuan Mizoram Health Care System chu thapui thawha siamthat a ngai tak meuh niin a sawi.

Minister in zirlaite a fuih

Sports & Youth Affairs Minister Lalnghing-lova Hmar chuan Zirlaite chu Pathian tih leh taima taka lehkha zir tura fuihin, Zirlaibu mai bakah hriatzauna dangte pawh bih tam turin a chah bawk.

Hmarchhak hmasawnna chu sawrkar laipui ngaih pawimawh ber a ni - MoS for Minority Affairs

Union Minister of State for Minority Affairs, George Kurian chuan hmarchhak hmasawnna chu sawrkar laipui ngaih pawimawh ber a nih thu a sawi a. Mizoram-a ASF hri leng mek chungchangah Vawk te chu suat an nih hmaa sawrkar an hrilh ngei a nih chuan zangnadawmna an dawn tur thu a sawi bawk. 

Serchhip-ah dan kalha naupang chhawrluih an awm leh awm loh enfiah hna thawh a ni

Image
Serchhip District Bawrhsap kaihhruainaa din, District Task Force on Child and Adolescent Labour chuan nimin khan Serchhip khawpui chhung hmun hrang hrang tlawhin dan kalha naupang chhawrluih, Child Labour an awm leh awm loh an enfiah a, Vawiin hian chhunzawm leh tur a ni ang.

Serchhip District-ah ASF vanga Vawk thi 24 a awm belh

Image
African Swine Fever (ASF) vangin nimin khan Serchhip District-ah Vawk thi 24 a awm belh leh.

Serchhip DCSO sawn a ni

Image
Serchhip-a District Civil Supply Officer (DCSO) mawhphurhna la mektu Vanlalhriata chu FCS&CA Directorate-ah Asst. Director hna chelh tura sawn niin Asst. DCSO hna chelh mektu R. Zirliana pawh Kolasib-a DCSO hna chelh tura sawn a ni bawk a. Serchhip-a DCSO hna chelh tur hian FCS&CA-a Deputy Director nilai Lal-hmuakliana chu dah a ni.

Cooperation Minister zinchhuak

Cooperation Department changtu Minister PC. Vanlalruata chuan zan hnih riaka Champhai District tlawh turin nimin khan Champhai a thleng a, nimin khan Champhai District Cooperation Office leh NABARD-a DDM Office te a tlawh hnuah Champhai Town Multipurpose Cooperative Society (CTMCS) te enkawl Champhai Higher Secondary School leh Ministry of Tribal Affairs sum cheng vbc. 6.2 hmanga CTMCS ten an sak mek Tribal Girls Hostel te chu a hmunah a tlawh bawk. Cooperation Minister chuan sawrkar laipui leh Mizoram sawrkarin Cooperative Society-te tihhmasawn an ngaihpawimawh thu sawiin, Society-te tihchak chu Mizoram sawrkar thar thil tum lian ber pakhat a ni, a ti bawk.

ZORO aiawh ten sawichhuak

Tun thla ni 8 atanga Vawiin thleng awh tur UN Expert Mechanism on the Rights of Indigenous People Session vawi 17-na chu Switzerland khawpui Geneva-ah neih mek a ni a, ZORO pawh UNO hnuaia tualto hnamte inziahluhna, United Nations Permanent Forum for Indigenous Issues (UNFPII)-a affilliated member a nih angin ZORO Western Zone President Lalnunfela Chawngthu, KH. Vanlalruati Serchhip leh Lalruatpuii Cira ZORO Consultant Switzerland te chu ZORO aiawh hian an tel a. Niminpiah khan thusawina hun pek niin hetah hian ZORO aiawhte hian nikum February thla atanga Manipur Zofaten buaina an tawh chungchang chu an sawichhuak a ni.

Dan thar opathum zirho

Misual leh dan bawhchhiate hremna dan thar (Major Criminal Law) 3 tun thla ni 1 atanga hman tan- Bharatiya Nyaya Sanhita (BNS), Bharatiya Nagarik Suraksha Sanhita (BNSS) leh Bharatiya Sakshya Adhiniyam (BSA) chung-chang zirhona chu nimin khan Aizawl-ah thuthar thehdarhtute pualin neih a ni.

Zu leh a kaihhnawih man tam

Mizoram Police te leh Excise & Narcotics Department te chuan June 2024 chhung khan Rakzu litre 4762.3 zet manin Zu zuar mi 478 leh zurui mi 93 an man a, hemi hun chhung hian Zu bilhlai Tin 9911 tihchhiain Zu sakna Bel 52 leh lirthei 13 an man bawk a ni. June thla chhung vek khan Sapzu (IMFL) um puitling 360 zet manin a chanve um 755 man a ni bawk a, Beer um 18 leh Canned Beer 473 manin Fruit Wine litre 173 leh BEDC litre 344 an man bawk a ni. Heng bakah hian ram-pawn atanga lakluh Zu um 13 manin Canned Beer 1980 leh Wine litre 122.4 an man bawk.

Chief Minister rawn bia

Union Home Minister Amit Shah chuan nimin zing dar 9:00 khan Chief Minister Lalduhoma chu Telephone-a rawn biain thil pawimawh an sawidun a. Tunhnaia Delhi-a Chief Minister a zin lai khan Union Home Minister hi a zinchhuah ve avangin an inhmu thei lova, hei vang hian Cyclone Remal chhawmdawlna leh Raltlan chhawmdawlna bakah Assam Rifle sawnchhuah chungchangte lehkha thehlutin heng lehkha te a hmuh veleh Chief Minister hi a rawn bia a ni. Home Minister hnenah hian Chief Minister chuan Assam Rifle sawn-chhuahna tura Mizoram sawrkar, Assam Rifle leh Central sawrkar te inremna, Memorandum of Understanding hun engemawchen Home Ministry in an kawl tawh chu tun dinhmuna mutan nia a ngaih thu a lo sawi a, Home Minister hian Hapta khat chhunga tihfel a tum tur thu Chief Minister hi rawn hrilhin, Cyclone Remal chhawm-dawlna leh raltlan tanpuina te hi an rawn pechhuak dawn tih a hrilh bawk a ni.

RMIS (NEC) kalpuina turin Computer semchhuak

Rural Development Department chuan North Eastern Council hnuaia Rural Monitoring & Information System kalpui nana Computer set leh hmanraw dang an dawn te chu nimin khan an semchhuak.

DIET Lunglei in an kum 50 tlinna an lawm

District Institute of Education and Training (DIET), Lunglei chuan nimin khan an kum 50 tlinna, Golden Jubilee an lawm a, he hun hi Lunglei High Powered Committee (HPC) Vice Chairman V. Malsawmtluanga chuan khuallian niin a hmanpui a ni.

Aspirational District, Mamit-a hmalakna thlirho

Sawrkar laipui Ministry of External Affairs-a Director M. Keivom chuan nimin khan Mamit tlawhin Aspirational District, Mamit hnuaia hmalakna leh hmasawnna hrang hrangte Department hotute nan an sawiho.

MSPMC in hnathawh mek pahnih enfiah leh

Mizoram State Project Monitoring Committee chuan Aizawl Tuikual North-a NEC sum hmanga Multi Utility-cum-Community Centre sak hna thawh mek leh NeSIDS sum hmanga MINECO-a State Resource Centre for HIV/AIDS sak mek te chu nimin khan a hmunah an enfiah a, Multi Utility-cum-Community Centre hi cheng nuai 299.91 senga sak niin Nodal & Executing Department hi UD&PA a ni a, M/S. Risors Associate, Zarkawt chu Contractor a ni. State Resource Centre for HIV/AIDS hi Estimate Amount chu cheng vbc. 4 niin Lalnunmawia, Bungkawn chu Contractor a ni thung a, MSPMC team te hian a Plan anga sak a ni em tih uluk takin an endik a. A hna hi 65% zawh tawh a ni a, a hna hi a tha thawkhat hlein an hria a, ruahman ang taka a puitlin theih nan hmalak zui dan tur hrang hrangte an sawipui bawk a ni.

Zakapa Fanai nun behchanna siam Film tlangzarh

Mizo lal huaisen Zakapa Fanai nun behchanna docu drama film siam chu nimin khan Social Welfare & Tribal Affairs, Women and Child Development enkawltu Minister Lalrinpuii chuan a tlangzarh.

Mizoram Lokayukta kut phuar sut turin CM ngen

Congress Party chuan ZPM sawrkar chu Mizoram Lokayukta kut phuarah puhin, an kut phuar sut turin Chief Minister an ngen.

Pu Buanga lehkha leh sulhnu pawimawhte hlan

INTACH Mizoram Chapter chuan Pu Buanga (JH. Lorrain) lehkha leh sulhnu pawimawh te chu bu pali (4)-ah siamin, Mizoram Sawrkar leh Kohhran leh Zirna In Archive/Library a dah turin nimin khan an hlan.

ASF hri ala darh zau zel

Image
Serchhip District chhunga Lungchhuan khua ah ASF vanga Vawk thi awm ve lehin Serchhip District-a Veng leh khua 26-ah ASF vang hian kumin ah Vawk 1139 zet a thi tawh a ni.

HSLC leh HSSLC Compartmental Exam result chhuak

Image
Mizoram Board of School Education (MBSE) chuan HSLC leh HSSLC Exam-a buatsaih hnua Compartmental & Improvement Examinations a buatsaih result chu nimin khan a tichhuak.

Deptt. hmalakna sawifiah

Image
Serchhip District chhunga Head Office ten an Department kaltlanga hmalakna, hmachhawp leh ruahmanna an siam te Powerpoint presentation hmanga sawifiahna hun chu nimin atang khan Serchhip DC Meeting Hall-ah Bawrhsap Paul L. Khuma hovin an nei a, tun thla ni 18 thleng khian a indawtin he hun hi an hmang dawn a ni.

YMA kum 75 tlinna lawm

Mamit District- awm Bawngthah Branch YMA chuan an kum 75 tlin lawmna hun nimin khan hmangin Dampa Bialtu MLA Lalrintluanga Sailo chuan khuallian niin a hmanpui a, YMA chu tanpui ngaite tanpuitu pawl ropui tak a ni tih sawiin, YMA ten hma an lakna ah hnathawka penchhuah aiin a ti thei nia an hriatte hnena an dil chhuah chu a tam zawk mah mah em tih a ngaihtuah thin thu a sawi bawk. Bawngthah Branch YMA hi kum 1949-a din kha niin tunah hian Member 339 an awm mek a, Mipa 176 leh Hmeichhia 163 niin Life Member 7 an awm bawk a. An Branch atang hian hruaitu hlun chawimawina dawng tawh mi pathum an awm bawk a ni.

MFM in tanpuina hlan

Mission Foundation Movement chuan Hlimen-a Cyclone Remal-in In leh lo a tihchhiat chhungkua 21 te chu Relief Camp-a Insakna atan bungrua leh eitur nimin khan an hlan a, tanpuina hi North Eastern Development Finance Corporation Ltd (NEDFi) ten an CSR Fund MFM kaltlang an pek a ni a. Shuttering Board 142, Rangva Bundle 90 leh eitur buhfai bag 40, Dal bag 40, Alu bag 40 leh thildang a mamawhtu chhungkua te tan an hlan a ni. Nimin a thilpek hlanna hun hi Adviser to Chief Minister TBC. Lalvenchhunga leh AMC Corporator Dr. C. Malsawmtluangi te chuan an telpui bawk a ni.

Draft Electoral Roll tarchhuak

Aizawl Municipal Area huamchhunga Ward No. VI-a Corporator John Zosangliana Ralte chu a boral avangin he Ward-ah hian by-election neih a ni dawn a, hemi atan hian nimin khan Draft Electoral Rolls tarhchuah niin Inthlanna neih hun tur chu a hrana la puan leh tur a ni ang. AMC Ward No. VI hian Chanmari West, Edenthar leh Hunthar te huamin, Polling Station 10 a awm a, Draft Roll-ah hian Vote nei thei 9846 awmin tun thla ni 31-ah Final Electoral Roll chu tarchhuah a ni ang.

MYC in tanpui dawn

Tunhnaia UPSC Prelims Exam paltlang Mizo thalai 8 zinga Aizawl-a awm remchang mi pahnih te chu nimin khan sawm an nih angin Mizoram Youth Commission (MYC) Chairman Pisa-ah lengin thawktute nen an inkawm a. MYC Mission UPSC hnuaiah heng Mizo thalai Prelims paltlang te hi a tul ang apianga hmalak pui a, tanpui ni se tih a nih angin MYC chuan UPSC Mains Exam atana an inbuatsaihna turah Test series an mamawh ang apiang a lei sak ang a, a remchan angin kar tawpah MYC Office-ah test an nei thin dawn bawk a ni.

LADC Dy. Chairman thlang

Lai Autonomous District Council (LADC) Emergency Session neih mekah a ni 3-na, nimin khan LADC Deputy Chairman thlanna neih niin Tuithumhnar bialtu MDC H.Lalmuansanga chu chuhtu awm lova thlantlin a ni a. Deputy Chairman thlanna neih a nih dawn hian Eptu lam ZPM MDC te chu House atangin an chhuak thung a, Opposition Leader K.Hre Kung chuan nimin khan thuthar thehdarhtute kawmin Deputy Chairman thlanna nei tur chuan hriattirna chhuah leh inthlan hun inkarah ni hnih tal a tla tur a ni tih dan dinglai a awm laiin, hmanhmawh leh chawpchilh takin, lehkha pawh eptu member ten an hmuh kim hmaa Deputy Chairman thlanna neih a ni chu LADC Dan dinglai palzutna nia an ngaih vanga House chhuahsan an nih thu a sawi a ni.

Kolasib Bawrhsap thar in MJA te a kawm

Kolasib District Bawrhsap thar Robert C Lalhmangaiha chuan nimin khan MJA Kolasib District OB te leh DIPRO Kolasib te kawmin thil tul paiwmawh hrang hrang an sawiho a. He hunah hian Bawrhsap thar chuan MJA te chu an mawhphurhna a san zia sawiin, District timawitu leh Mizoram mithmuh a District pho chhuaktu langsar tak an nih avangin an hna chu pawimawh takzet tih a sawi a. Kolasib chu Mizoram kawtchhuah a nih angin District pawimawh tak a nih thu pawh sawiin, ramri buaina neuh neuh te pawh a awm thin avangin MJA, khawtlang hruaitute leh NGO-te nen pawh thawhhona tha an neih a pawimawh thu leh an finchhuah thin pawh a mamawh zel dawn tih a sawi bawk a ni.

Tlawng lui-a Vawk thi paih thu ah FIR thehlut

Nimin zing khan Hortoki bul Tlawng lui-ah Tlawng hnar lam atanga Tui in a len Vawk thi ruang hmuh a ni a, Vawk thi hi kar kalta tawp lamah pawh hmuh anih tawh thu Hortoki Vawk Vulh Association President Zoramthara chuan a sawi a ni.

Model Village-a hmalak dan thlirhona hun hmang

Mizoram-a Member of Parliament (MP) pahnih ten Model Village atana an thlan khaw pahnih-a hmalak dan tur sawihona neih a ni. Sansad Adarsh Gram Yojana (SAGY) hnuaiah hian Rajya Sabha MP K. Vanlalvena chuan Phase V-ah Ratu khua chu Model Village atan thlangin Lok Sabha MP hlui C. Lalrosanga khan Phase-IV hnuaiah Muallungthu khua chu a lo thlang tawh bawk a. Ratu khua ah hian hmasawnna hna hrang hrang 32 chu Department sawm chuangin an thawh turin Village Development Plan hnuaiah dah niin chung zinga 18 chu zawhfel tawh a ni a. Muallungthu khua ah hian Village Development Plan hnuaia hnathawh tur hrang hrang sawmnga chuang duanchhuah atangin 71% zawhfel tawh a nih thu District Level Committee on SAGY thutkhawm ah hian tarlan a ni.

MZP in UG Result chhuaka tithate an chawimawi

Mizo Zirlai Pawl (MZP) General Hqrs. chuan Mizoram University in Under Graduate (UG) result tihchhuaha Arts, Science, Commerce leh Home Science Stream Gold Medalist te lawmpuina hun nizan hmasa khan an buatsaih.

Mizoram-a Green-Ag cum Green Landscape Information Platform (GLIP) hmalakna thlirho a ni

Nimin khan Agriculture Minister PC. Vanlalruata hovin a Pisa-ah Global Environment Facility kaltlanga Green-Ag cum Green Landscape Information Platform (GLIP) hnuai a hmalakna en ho a ni.

PUC in zirlai titha chawimawi

Pachhunga University College (PUC) chuan nimin khan PUC Multipurpose Auditorium-ah zirlai titha chawimawina leh kal tharte lawmna hun hmangin Higher & Technical Education Minister Dr. Vanlalthlana chuan khuallian niin nia a hmanpui bakah Jeje Lalpekhlua MLA chu khual zahawm a ni bawk.

MPCC in General Consent pe tha leh turin Chief Minister hnenah ngenna an thehlut

Mizoram Pradesh Congress Committee (MPCC) chuan ZPM sawrkarin CBI hnena General Consent a pek tunhnaia a hnuhkir leh chungchang ah Chief Minister hnenah ngenna thehlutin inthlan hmaa an intiam ang ngei a General Consent pe tha leha an ngen thu leh an phut thu an sawi.

Kawlphetha chungchanga Mizoram mamawh hrang hrangte Power Minister hnenah thlen

North Eastern Region Power Minister Conference chu niminpiah khan Guwahati-ah neih niin Mizoram P&E Minister F. Rodingliana chuan Mizoram in kawlphetha-a intodelh tura a hmalakna kawnga mamawhte leh harsatna a neih te a thlen.

Serchhip District-ah Child Adolescent Labour leh Child Trafficking kaihhnawih thubuai ala awm lo

Image
Nimin khan Serchhip-ah Dan kalha naupang kumtling lo hnathawka chhawrluih leh naupang hralha sumdawn (Child Trafficking) khapna chungchang inzirtirna hun chu buatsaih a ni a, he hunah hian hetiang kaihhnawih thubuai hi Serchhip District-ah ala awm loh thu tarlan a ni.

Serchhip DDMA in Baktawng Chan In-a khuarel chhiatna tuartu chhungkuate chhawmdawlna hlan

Image
Tunhnaia ruahpui nasa tak sur avanga khuarel chhiatna thlenga Serchhip District chhung Baktawng Chan In-a chenna In chhuahsan chhungkaw pasarih te hnenah Serchhip District Disaster Management Authority chuan niminpiah khan tanpuina sumfai an hlan.

Serchhip-ah GST chungchang inzirtirna neih a ni

Image
Taxation Department buatsaihin nimin khan Serchhip District chhunga sumdawng te tan 'Goods and Services Tax' (GST) chungchang inzirtirna neih a ni.

Vawk thi 60 zet awm belh

Image
Nimin khan Serchhip District-a khua leh Veng 14-ah ASF vanga Vawk thi 60 zet chhin-chhiah belh leh a ni a, Vawk thi tamna ber Thenzawl khua ah Vawk 24 zet thi lehin North Vanlaiphai-ah 11 a thih bakah Baktawng-ah 4, Keitum-ah 3, Chhiahtlang leh East Lungdar-ah pahnih ve ve leh Chhingchhip, Khumtung leh Hriangtlang ah pakhat theuh a thi a, Serchhip Chanmari Veng-ah 6, Vengchung-ah 2 leh New Serchhip South, Field Veng leh Kawnpui North-ah pakhat theuh an thi bawk. Nimin khan Serchhip District-a Veng leh khua 10-ah Vawk 132 suat ni bawkin heng zinga 79 zet chu North Vanlaiphai-a suat an ni a, heti hian kumin hian Serchhip District-ah ASF vanga Vawk thi 1087 awm tawhin Vawk 2907 suat a ni tawh bawk a ni.

Mumbai City-ah Serchhip tlangval

Image
Indian Super League (ISL) Champion Mumbai City chuan Punjab FC-in an chhuah zalen Serchhip tlangval Daniel Lalhlimpuia an lalut ta.

Serchhip District Jail tlawh

Image
Nimin khan Inspector General (IG) of Prison Mizoram R. Vanlalsawta chuan Chhiahtlang-a Serchhip District Jail chu tlawhin he Jail tang te dinhmun a enfiah bakah fuihna thu a sawi a. Hemi hnu hian Serchhip District Jail Conference Room-ah thawktute nen inkawmna hun hmangin he hun hi District Jail Superintendent C. Lalbiaktluanga chuan a kaihruai a, an hnathawh dan hrang hrang leh hmasawn zel dan turte an sawiho bawk.

Kilometer pawm tur sawiho

Image
National Highway-54 Serchhip leh Aizawl inkar laihzauh leh siamthat a nih hnuah he kawng thui zawng hian Maxi Cab chuanman chungchang a nghawng avangin nimin khan Serchhip District Transport Officer Vanlaldika kaihhruaina in a Pisa-ah Serchhip Maxi Cab Owner’s Association leh Serchhip District Consumers Association hruaitute chuan hemi chungchang hi an sawiho a. He hunah hian he kawng thui zawng sawi hrang hrang awmin tunhnaiah kawng laih avanga tihtawi tem awm bawk mah se KM 112 tih chu PWD in Official-a an pawm ala nih avangin Serchhip leh Aizawl via Seling Road chu KM 112-ah la pawm nise an ti a. Hemi ang hian Maxi Cab chuanman pawh hi lak tur niin STA in rate a siam ah Metalled Road-ah km khat ah Rs. 3.50 a ni a, Rs. 392 tur niin Rs. 400/-ah chawhrual ni tura ngaih a ni.