KVK Chawnhu-ah Hmazil chi thar tharchhuah a ni

KVK Chawnhu, Lawngtlai District chuan Mizoram-a a vawikhatna atan Hmazil Arka-siri (Cantaloupe) chu hlawhtling takin Lawngtlai District Chawnhu-a an hmunpui-ah an tharchhuak.

Hmazil enchhinna a bultumtu ber KVK Chawnhu-a Horticulture Subject Matter Specialist, Dr. Vanlalliani chuan tuna Hmazil an chin chhin chu a vawikhatna-ah an hlawhtlin mai loh thu a sawi a, ruahtui tlak loh lai a chin chi niin, kar kalta-a an seng tak hi kumin March thlaa an chin a nih thu a sawi bawk.

Dr. Vanlalliani chuan tun tuma Hmazil an tharchhuah chu Mizoram-a Hmazil chin thin ang aiin a tlangpuiin a pum a te a, a lian pawl chu Kg.1 leh tlem bak a ni lova, thianho leh chhungkua a vawi khat a ei zawh tham mai a nih vangin, ei sen loh dahthat ngai ang chi a awm lem lova, a pum te deuh phei chu mahni a ei zawh theih mai te a ni hlawm tih a sawi a, a thlum tha in thlai leh thei vawnthatna khawl tello pawhin ni sawm (10) chhung thleng te pawh a vawnthat theih tih a sawi bawk.

Hetiang Hmazil chi hi Mizoram-ah hmuh mai tur a la awm lova, tuna KVK Chawnhu in an chin hi Indian Institute of Horticultural Research, Bangalore atanga an lak niin, hetia an tharchhuah atang hian a chi hi lakchhuah mai theih a ni. KVK Chawnhu-a Sr. Scientist & Head Dr C. Lalfakawma chuan loneitute hnenah a chi pawh engemaw zat an pekchhuah tawh thu leh, kumthar lamah chuan nasa zawka ching pung tura bul an tan theih a beisei thu a sawi bawk.