Latest News

MLA Fund hmanga Ambulance lei awmna hrelo?

MNF Thorang Block I leh II te chuan an bialtu MLA, Zodintluanga MLA Fund hman danah Thorang Bial chu engah mah a ngailohzia leh a hmuhsit zia a lang chiang niin an sawi.

Nimin a thuchhuah an siamah heng MNF Block pahnih te hian Bialtu MLA Zodintluanga Ralte chuan Thorang Bial MLA Fund hmangin Ambulance pahnih (2) a lei ngei tih 2019-2020 MLA Fund hmanna RTI Act, 2005 zawhna chhannaa a lang niin an tarlang a. Ambulance pakhat zawk hi Lunglei Civil Hospital-ah a pe tih hriat a nih thu leh Ambulance pakhat zawk Rs. 19,20,949/-a a lei chu khawiah nge a awm tih hriat a ni ta lo tih an tarlang a. An hriat chhun erawh chu Ambulance hi Thorang Development Committee-ten MLA Fund an lakchhuah hmangin lei ngei a nih thu leh he Ambulance hi tuna ISUZU V-CROSS, Private Registration Zodintluanga Ralte (MZ-01-T/8276) hi a nia hriat a ni tih an tarlang a. “Chuvangin Pu Zodintluanga Ralte hian MLA Fund a hmanna point 1 lek kan tarlan atang pawh hian Thorang Bial hi engah mah a ngailohzia leh a hmuhsitzia a lang chiang em em a ni,” an ti.

MNF Thorang Block I leh II te chuan kumin June 3 khan Thorang bial chhung Thenhlum khuaah Covid-19 hri kai hmuhchhuah thar a nih thu pawh tarlangin, Bunghmun 4C-a dah tura ruahman niin, Thenhlum VLTF leh Bunghmun PHC-a Doctor-te inbiain Covid patient hian ama Scooty-in Bunghmun 4C hi a pan ta niin an sawi a. “Tuna Ambulance leina (RTI Act,2005 hmanga zawhna July, 2020 chhanna) Thorang Development Committee hmanga an sum lakchhuah Rs. 19,20,949/- hian Ambulance hi lei tak tak ni se, Bunghmun PHC leh Lungsen PHC hian Ambulance tha a nei anga, tuna Covid Patient-ah hian buaina a awm lo ang,” an ti bawk.

Comments

Chhiar Hlawhte