Latest News

Mizoram-ah Cancer damdawi man tlawm chahchhuak

Cancer enkawlna damdawi man tlawm chu Mizoram-ah lei theih tura chhawpchhuah a ni ta a, he rate mil hian Medical Reimbursement Bill pawh siam a ni tawh dawn a ni.

Mizoram State Health Care Society-a Principal Chief Executive Office sawi danin Mizoram State Cancer Institute (MSCI) Indoor Pharmacy, Administrative Building, Zemabawk-ah Cancer enkawlna damdawi man tlawm hi lei theih niin District Hospital leh damdawi In dangten an mamawh dan angin MSCI atang hian an la chhawng thei bawk anga. Mimal damdawi zuarah erawh chuan heng damdawi man tlawm te hi zawrhchhuah a ni dawn rihlo a ni. Heng damdawi te hi Mizoram-a kan hman than Company tha leh rintlak a ngaihte hnen atanga man tlawm zawka mipuite lei theih tura chahchhuah a ni tih a sawi bawk.

Hei bakah hian Finance Department in Notification a lo chhuah tawh angin Sawrkar hnathawk MR, Health Care Scheme leh AB PM-JAY-ah te Cancer enkawlna damdawi man tlawm rate ang chauh zelin inenkawlna senso (Medical Reimbursement claims)-te chu approve tawh tur a ni a. Hei hian Cancer enkawlna damdawi chi 47 leh Albumin infusion a huam anga, heng baka inenkawlna damdawi erawh chu a rate pangngai angin approve a ni ang. Rate tlawm mila bill approve hi July, 2021 china inenkawlna bill turte ah hman tan a ni dawn a ni. Cancer enkawlna damdawi man tlawm rate mila Sawrkar hnathawk MR, Health Care Scheme leh AB PM-JAY bill pek chhuah kawngah Sawrkar damdawi In leh Private damdawi In in danglamna a neilo tih a sawi bawk.

Comments

Chhiar Hlawhte