Posts

Showing posts from October, 2022

Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Serchhip District atanga SEDP dawng turte Bank Account-ah sum thun fel a ni tawh

Image
Serchhip District-a SEDP kalpuitu Department hrang hrangte chuan ruahman angin an Department hnuaia beneficiary te hnenah tanpuina an sem zo nia an hriat thu sawiin, Department thenkhat chuan beneficiary te hmalakna enfiah turin ruahmanna an siam mek.

Shalom Special School ten PTS Thenzawl an tlawh

Image
Serchhip-a Shalom Special School-a zirlaite chuan Inrinni khan Thenzawl leh a chhehvel te tlawhin Police Training School (PTS) Thenzawl a awm ten an thiamthil chi hrang te an lo entir bawk.

Covid hri leng dinhmun

Serchhip District-ah Inrinni leh nimin lamah COVID-19 hri kai hmuhchhuah leh enkawl dam chhinchhiah belh awm lovin nimin tlai thleng khan hri kai enkawllai mi 4 an la awm mek a ni. Mizoram pumah nimin khan hri kai chhinchhiah thar mi 5 awmin mi 5 te chhuahtir an ni a, nimin tlai thlenga Mizoram-a COVID-19 hri kai hmuh tawh chu 2,38,804 niin an zinga mi 2,38,038 te enkawl dam ni tawhin hri kai enkawllai mi 40 an la awm mek a, hri kai zingah Inrinni khan  Aizawl District-a mi pahnih boralin hri kai zingah mi 726 an boral tawh a ni.

YMA Football Tournament khel chhunzawm

Image
Serchhip-a Inter-Branch YMA Football Tournament khelh mek ah Inrinni khan khelh chhunzawm leh a ni.

Quiz Competition zofel ta

Image
Serchhip District Election Office leh Govt. Serchhip College-a Career Guidance & Counselling Cell leh Electoral Literacy Club tangkawp in an buatsaih SVEEP Serchhip District Inter School Quiz Competition 2022 chu Zirtawpni zan khan zawhfel a ni a, he Quiz Competition-ah hian District chhunga High School leh higher Secondary School 22 telin Millenium H/S Chhiahtlang leh Govt. JM H/S Serchhip te Final-ah an inhmachhawn a, Millenium H/S hian point 185 hmuin pakhatna an ni a, Govt. JM H/S hian point 155 an hmu bawk a ni. He Quiz Competition-a pakhatna hian lawmman ah Certificate, Trophy leh Rs. 10,000/- dawngin pahnihna hian Certificate, Trophy leh Rs. 7000/- an dawng bawk a ni.

Nakum-ah chawlh ni 26 awm

Mizoram sawrkar chuan nakum (2023)-a sawrkar Pisa chawlh tur tichhuakin sawrkar chawlh ni 26 a awm dawn a ni.

Lehkhabu Pho Runpui zofel

Mizo Writer Association (MWA) ten ziakmi te chawisanna tura kar hmasa Thawhlehni atanga Aizawl Vanapa Hall-a ‘Lehkhabu Pho Runpui’ an buatsaih chu inrinni khan zawhfel niin hemi hun chhung hian lehkhabu hralna atangin Rs. 9,09,350/- vel zet an hmu nia thudawn a ni a. MWA President R. Lallianzuala chuan he hun an buatsaih tlawhtu zinga a tam zawk te chu thalai rual, zirlai te an nih avangin an lawm hle tih a sawi a, tunlai thalaiten lehkha chhiar an peih tawh lo nia sawi thin chu hei hian a dik chiah lo tih a lantir ni-a an hriat thu a sawi bawk.

Nov. 5 thleng ngaihchan tum

Lunglei District chhunga kawngpui chhia te siamtha thuai tura nawrna awm mek chungchang ngaihtuaha Zirtawpni kalta tlaia Lunglei Sub-Hqrs. YMA leh PWD hotute Lunglei-a thutkhawm ah PWD hotute chuan kawngpui siamtha tura nawrna awm mekah kawng siamtu Bhavya Company chu November ni 5 thleng an hmalakna ngaihchan phawt an tum thu an sawi a, an ruahmanna hi Company hotute lehkha hmanga hriattir a nih tur thu sawiin, an ngenna anga hmalakna a awm lo a nih chuan Bhavya Company-in Mizoram Sawrkar hnena Security Deposit a dah hmangin kawngpui siam dan ngaihtuah an tum tih an sawi bawk.

World Record siam tum

Tourism Department, Mizo Zaimi Inzawm-khawm (MZI) leh Central YMA te tangkawp buatsaih tur, ‘A ruala tingtang perh tam ber’ (Largest Guitar Ensemble) World Record siam tumn aah tel duhte an inziaklut mek zel a, mi 7,500 tel turin ruahmanna (target) siam a ni. Tourism Department hotute sawi danin, November 17, 2022-a a ruala tingtang perh tam ber World Record siam tumnaah hian mi 7,500 tlin theih ngei an inbeisei a, ‘Insuihkhawm leh zai i rel ang u’ tih hla hmangin record siam tum a ni. Mizoram in International Tourism Mart 2022, November 16-18 chhunga AR Ground, Aizawl-a a thlen turah a ruala Guitar perh tam ber hmangin World Record hi siam tum a ni a, Tourism Department chuan YMA Branch tinte hnenah an huamchhunga Guitar neih zat hre tur leh October 20, 2022 ralhmaa report pe turin a lo hriattir tawh bawk.

MNF sawrkarna hnua 'Hun tha lo' a ni - Hmuaka

BJP Mizoram State President Vanlalhmuaka chuan, “MNF sawrkarna hnuaia kan awm lai hi 'Hun tha lo' a ni,” a ti.

Lok Ayukta kan ti chak dawn - ZPM Leader

ZPM Leader Lalduhoma'n Pathian leh mipui zarah an sawrkar a nih chuan Lok Ayukta an ti chak dawn ti sawiin, Chief Minister thlenga chhui theiin an siam dawn tih a sawi.

Kumin ah damdawi hmansual vangin mi 32 thi tawh

Kumin January atang Zirtawpni kalta (28.10.2022) thleng khan Mizoram-ah damdawi hmansual vangin mi 32 an thi tawh.

Khawnvartui man tlahniam ve leh hret

Mizoram hmun hrang hrangah khawvartui (SK Oil) man inang tlang lo mah se tlemin a man a tlahniam leh hret a, tun dinhmunah litre khat Rs. 83.40 atanga Rs. 88.72 inkar a ni.

Boruak muanawm tak hnuaia ramri chinfel duh

Tripura State-a Mizo inzawmkhawm pawl lian ber, Mizo Convention chuan Mizoram leh Tripura ramri chu boruak tha tak hnuaiah chinfel nise an duh thu an sawi.

Tuirial Airfield peng bula Oil Tanker kang-ah mi 4 thiin mi 14 an hliam; Motor dang 3 kangchhia

Inrinni kalta (Oct. 29, 2022) chawhnu lama Tuirial Airfield peng bula tuialhthei phurtu lirthei chesual chu kang zuiin mi 4 in nunna an chan bakah mi 14 ten hliam an tuar a, Motor dang pathum a kangchhe bawk.

Imphal - Aizawl Alliance Air Service hawng

Imphal (Manipur) leh Lengpui (Mizoram) inkara thlawk tur Alliance Air Service chu nimin khan biakhmuh theihna hmangin Union Civil Aviation Minister Jyotiraditya Scindia chuan a hawng.

Hrangturzo bial fang mek

Serchhip District-a Hrangturzo bial fang mektu ZPM Leader Lalduhoma chuan nimin khan Leng, Sailulak leh Mualcheng khua tlawhin Vantlang Inkhawm-ah thu a sawi a, an sawrkar huna thlai thar leina an sawi thin ah thlai thar zawng zawng an lei dawn loh thu leh an lei turah rate an sawilawk dawn thu sawiin, “A tam zawk erawh chu kan sawrkar hnuah kan puang dawn a ni,” a ti a. Crop insurance an hman dawn thu pawh a sawi bawk.

Unity Run buatsaih

Image
Tun thla ni 20-a rampuma Police Commemoration Day leh Police Flag Day pualin nimin zing khan Serchhip Police te chuan Serchhip P&E Veng-a Leisekawt Mual atanga Serchhip Bazar thlengin ‘Unity Run’ an buatsaih a, he hun hi Serchhip SP Stephen Lalrinawma chuan he hun an hman chhan te sawiin, he huna tel Police te fuihna thu a sawi bawk a ni. He hunah hian Nov. 29, 2007-a Chhatisgarh-a helho kut a boral ta Cons. Biakrotluanga (Serchhip Venglai) hriatrengna leh zahna lantir nan a chhungte hnenah thilpek an hlan bawk a ni. Poice Commemoration Day pual hian nimin vek khan Govt. Serchhip College-ah Sipai leh Police-a tang duhte tan hemi kawng zawh tura hriat tur pawimawh hrang hrang inzirtirna leh inhrilhhriatna neih a ni bawk.

Serchhip-ah PMFME Scheme chungchang leh hamthatna hmuh theih dan zirhona neih a

Image
Commerce & Industries Department, Lead Bank leh Mizoram State Rural Livelihood Mission (MzSRLM), Serchhip tangkawp buatsaihin nimin khan Serchhip-ah Pradhan Mantri Formalization of Micro Food Processing Enterprises (PMFME) Scheme chungchang zirhona neih a ni.

Govt. Lungpho H/S kum 50 tlin lawmna leh Exam Centre lawmna bialtu MLA hovin neih a ni

Image
Govt. Lungpho H/S in kum 50 an tlin lawmna leh High School Leaving Certificate (HSLC) Exam Centre thar an nih lawmna chu nimin khan neih niin bialtu MLA leh Assembly Deputy Speaker Er. Lalrinawma chuan a hmanpui a ni.

YMA Football Tournament-ah goal lut tam

Image
Serchhip Sports Complex-a Inter-Branch YMA Football Tournament chu nimin khan khelh chhunzawm niin match thum khelh ah goal 18 zet a lut leh a ni.

Treasury Officer sawn a ni

Serchhip-a Treasury Officer R. Lalhmachhuana chu Accounts & Treasuries-a Deputy Director hna chelh tura sawn niin I&WRD-ah FAO hna a chawlh khawp nghal dawn a, a aiawh tur hian Printing & Stationery-a FAO nilai Alvina Ramdinthari chu dah a ni bawk.

COVID-19 hri kai pung hret

Serchhip District-ah COVID-19 hri kai pung leh hretin nimin tlai thleng khan hri kai enkawllai mi pali an awm leh tawh.

PWD-a SE nilai man a ni

Tun thla ni 25-a Cyclone Sitrang avanga sawrkar pisa zawng zawng chawlhna tur thupek, Deputy Commissioner, Aizawl District hming ziah hnan anga (forged signature) siam leh he lehkha lem Social Media-a thehdarh chungchang ah Cyber Crime Police Station-ah FIR thehluh niin he sawrkar lehkha lem (forged document) hi Lalsangliana, Superintending Engineer (SE), PWD, ITI Veng-a cheng siam a ni tih chhui chhuah a nih thu Police te chuan thuchhuah siamin an tarlang a. Amah hi man a nih thu leh Anticipatory bail hmanga chhuah a nih thu an tarlang bawk.

Wine zawrh/siam dil mek

Mizoram Liquor (Prohibition) Rules 2022 hnuaiah Grape Wine siam leh zawrh phalna nei duh tan dilna hun hawn mek a ni.

AIR DG leh MP (LS) inkawm

Zan khat riaka Mizoram-a rawn zin AIR Director General leh AIR (News) DG ni bawk Vasudha Gupta-i leh Mizoram Lok Sabha MP C. Lalrosanga te chuan inkawmna neiin he hunah hian Lok Sabha MP chuan Hmarchhak bial, a bik takin Mizorama AIR leh DDK hnathawkte harsatna chinfel dan ngai pawimawh turin a ngen a. Kaisanna mumal nei lo a rei tak tak hna lo thawk tawhte an kaisanna tur kawng dap vat a tul thu DG chu a hrilh bawk.

Edn. Minister in hmanpui

Mizoram Secondary School Teachers' Association (MISSTA) General Conference vawi 22-na chu nimin khan Aizawl Chanmari YMA Hall-ah neih niin School Education Minister Lalchhandama Ralte chuan khuallian niin a hmanpui a, hrilen laia zirna kalpuina ah kawng hrang hranga zirtirtute inpekna avanga lawmthu sawiin, Zirtirtu hna chu hna zahawm anih avangin zirtirtute chu an zahawmna vawng nung zel turin a fuih a, inpekna thar nen thawk a, hun vawng dik tur te, incheina lamah felfai taka inchei thin turte, Pathian rawngbawlna a ni tih hriaa naupangte pawh an nungchang thlenga ngaihven turte, zirlai zingah ruihhlo ti tan an awm thin avangin ruihhlo laka invenna lam zirtirna pawh pe taima turin a chah bawk. MISSTA hian Education Minister hi Secondary school tana a hnathawh avangin lawmthu sawina thuziak an hlan bawk.

CM in IMA Conf. hmanpui

Indian Medical Association (IMA) Mizo-ram State Branch chuan nimin khan Annual Conference vawi 45-na hmangin Chief Minister Zoramthanga chuan a hmanpui a ni.

COVID-19 hri kai enkawllai mi 43 la awm mek

Nimin tlai thleng khan Mizoram-ah COVID-19 hri kai enkawllai mi 43 an la awm.

HIV/AIDS chungchang inzirtirna neih a ni

Central YMA leh Mizoram State AIDS Control Society (MSACS) te bultuma HIV/AIDS hluar zel tur dona kawnga hmalakna, 'Zoram Harh Rawh Campaign' tih thupui hmanga Mizo Hnam Lam leh Zai intihsiakna buatsaih tur buaipuitute tan nimin khan Champhai-ah IV/AIDS chungchang inzirtirna leh hmalak dan tur sawihona neih a ni a. He hun hi Champhai DC James Lalrinchhana chuan hmanpuiin Lalchhuanawma, M&E, DAPCU-in kalkhawmte zirtirna a pe a ni.

Mizoram HSS Games vawi 19-na zawhfel a ni

Mizoram Higher Secondary School Games vawi 19-na chu nimin khan zawhfel niin Govt. JL Higher Secondary School chu an champion a ni.

Midang rinchhan lova kan dinchhuah a ngai - HM

Home Minister Lalchamliana chuan ram leh hnam humhalh turin mahni intodelh a, midang rinchhan lova kan dinchhuah a ngai tih a sawi.

Dan lova ramsa tawlh man Larsap an sawipui

Youth for Environment Justice Mizoram(YEJM) aiawhte chuan nimin khan Governor Hari Babu Kambhampati kawmin ramdang atanga ramsa tawlhruk te dan leh thupek kengkawhtu ten an lo man leh heng ramsate lo enkawl lailawkna kalpui dan chungchang te an sawipui.

ZPM Leader Lalduhoma’n Serchhip District-a Hrangturzo Bial khaw thenkhat a fang mek

Image
ZPM Leader Lalduhoma chuan Serchhip District-a Hrangturzo bial fangin kan ram hmelma lian ber chu eirukna a nih thu a sawi a, “Heng eiruk hmangte hi i hnawl i ngam tawh ang u,” a ti.

Serchhip District Boxing Championship zawhfel a ni

Image
Serchhip Boxing Hall-a khelh zawh tak ‘CK HYUNDAI Serchhip District Open Boxing Championship, 2022’ ah Serchhip chuan Medal la hnem berin an champion.

Thenzawl khawtlang tana hmalak dan tur sawiho

Image
Thenzawl khawtlang hmasawnna tur hrang hrangte chu niminpiah khan Thenzawl SDO (Civil) V. Lalmuanpuii hovin khawtlang hruaitu ten an sawiho.

Pathian chawimawina nei

Image
UPC (NEI) Serchhip Chanmari Kohhran chuan tunkar Thawhtanni atanga nimin thleng khan ruai siamin Pathian chawimawina hun an hmang.

YMA Rorel Inkhawm vawi 3-na neih niin Eirukna leh hlemhletna a reh theih nana hmalak rel a ni

Image
YMA General Conference neih loh kum-a neih thin YMA Rorel Inkhawm vawi 3-na chu nimin khan Thingsulthliah khelmual-ah neih a ni a, an thurel zingah 'YMA General Conference' tih chu 'YMA Inkhawmpui lian' tia thlak remtih niin Eirukna leh hlemhletna a reh theih nana chak zawka hmalak rel a ni.

Hri kai pakhat hmuh belh

Serchhip District-ah nimin khan COVID-19 hri kai mi pakhat hmuhchhuah belh leh niin hri kai enkawllai mi pahnih an awm mek a, hri kai hmuhchhuah thar hi Thenzawl khua niin heti hian Serchhip District chhungah Thenzawl leh Khawlailung-ah hri kai enkawllai an la awm mek a ni. Nimin tlai thleng khan Serchhip District-a COVID-19 hri kai hmuhchhuah tawh chu 14,609 niin an zinga 14,571 te chu enkawl dam an ni tawh a, hri kai zingah mi 36 an boral tawh bawk a ni.

Hnahthial-ah MCO hawn a ni

Tourism Minister leh Mizo Cultural Organisation (MCO) General Hqrs. President ni bawk Robert Romawia Royte chuan nizan hmasa khan Hnahthial Electric Veng Community Hall-ah Mizo Cultural Organisation (MCO) Sub-Headquarters Hnahthial a hawng a, MCO chu Society Registration nei, thiltum leh inkaih-hruaina fel tak neia ding anih thu sawiin, “Hnam nun leh zia chawisan leh venhim thu ah YMA te, MHIP te, MUP leh pawl dang kan nei tih kan hriaa, anni hmalakna leh MCO hmalakna hi thil kal dun tur, inpuitawn zela kalpui tur a ni a, kan tlawmngai pawl neihsa te hmalakna duh-khawp lohna a ni hran lo a ni,” a ti bawk.

Japan-a Nurse han zirho

Labour, Employment, Skill Development & Entrepreneurship Department chuan Mizo thalai ten Japan rama Nursing hna an thawh theihna turin Aizawl-ah Workshop an buatsaih a, he hunah hian Japan-a hnathawhna him leh rintlak taka thawh theihna turin Japan sawrkar leh India sawrkar-in inremna thuthlung an ziah thu tarlan niin hemi chungchanga hriat tur pawi-mawh hrang hrang leh hamthatna te tarlan a ni a, Nurse zirlai mi 100 vel zet an tel a ni.

AIR hotu in Aizawl a tlawh

All India Radio (AIR) Director General leh Director General (News) Dr. Vasudha Gupta chuan ni khat cham turin nimin khan Aizawl a rawn thleng a, AIR Aizawl-a Director (Engineer) DR. Lalropuia leh DD News Aizawl-a Director (News), Mangjangam Touthang bakah AIR leh Doordarshan hotu ten lo dawng-sawngin Radio hmunhma te an fanpui a, an harsatna leh mamawh hrang hrangte DG hnenah hian an lo thlen bawk a ni.

By-election ah ZPM chak

September ni 6, 2022-a Mizoram puma Local Council leh Village Council by-election neih ruala inthlang tur, rokhawlhna avanga inthlang ve thei ta lo Keifang Venglai Village Council-ah niminpiah khan VC by-election neih niin Seat 5 awmna ah ZPM Candidate mi 4 leh MNF Candidate mi pakhat tlantlin an ni.

Total Bandh neih tum

Hachhek Bial Kuhva Chingtu Pawl (HB-KCP) leh Hachhek Constituency-a NGO te nimin-a Kawrthah YMA Run-a thukhawm chuan Kuhva hralh chungchanga harsatna an neih te tun thlenga sutkian a la nih loh avangin Sawrkar laka lungawi lohna entirnan thla thar, Nov.1, 2022 atanga tiamchin awm lova Total Bandh neih an rel a. Cachar District lamah Mizoram tharchhuah Kuhva hralhna leh thiar velna tura ruahmanna siam fel a nih tawh laia Karimganj District lama harsatna la awm zel chu Sawrkar Official te hmalak chak tawk loh vangah ngaiin Oct. 31, 2022 zanlai thlenga sawrkar atanga thu lawmawm an hre lo a nih chuan Total Bandh hi kalpui an tum a ni.

DC in Retailer te endik

Sawrkar laipui-a Department of Food & Public Distribution hmalakna in India ramah Fair Price Shop (retailer te buhfai semna) 5000 vel tlawhchhuah runpui neih mek niin hemi den-chhen hian Aizawl DC Dr. Lalhriatzuali Ralte chuan nimin khan Retailer pathum te buhfai sem dan a endik a, Central lam atanga format duan sa hmangin Retailer ten buhfai leh thildang PDS kaltlanga mipui hnena sem hna an thawk tha em tih a endik a ni. Endikna hmunah hmunhma, Quality Control leh Service Delivery te pawh en nghal a ni a. Hmalakna turte pawh sawiho niin mipui tana hmuh awlsam turin Vigilance Committee Member list leh Complain thehluhna tur remchang siam turin Bawrhsap chuan retailer te chu a hriattir bawk a ni.

COVID-19 hri kai enkawllai 41 la awm mek

Mizoram pumah nimin tlai thleng khan COVID-19 hri kai mi 41 enkawl an la awm.

Champhai DC in Zawlsei leh Khuangthing a tlawh

Champhai District Bawrhsap James Lalrinchhana chuan nimin khan Zawlsei leh Khuangthing khuate tlawhin VC leh NGO hruaitute nen inkawmna an nei a. Bawrhsap chuan khawtlang hruaituten sawrkar hmunhma cheibawl leh enkawl kawnga neitu thinlung an pu thin chu fakawm tiin, thawhhona tha tak vawngnung zel turin a fuih a. Zirna ti hmasawn turin District Education Committee-in hma a lak chhoh mek zel thu pawh sawiin, District chhunga zirna In hrang hrangte a tahtawl a tlawh zel tum a nih thu a sawi bawk. Bawrhsap hian Govt. Fair Price Shop-te tlawhin buhfai neih dante, buk dan leh quality-te, sem chhuah dan leh e-POS Machine hnathawh dante a enfiah a, Antyodaya Ana Yojana (AAY) hamthatna dawngtute pawh a kawm nghal bawk.

SEDP dawngtute pawisa chhuhsak niin sawi

Mizoram Pradesh Congress Committee (MPCC) chuan SEDP Rs. 25,000/- dawngtute pawisa engemaw zat chu MNF ten an chhuhsak niin an sawi.

Draft Mizoram River Protection Bill thlirhona nei

Mizoram chhunga lui humhalhna tur Dan duan chhin, Draft Mizoram River Protection Bill chu nimin khan Agriculture Minister C. Lalrinsanga hovin thlirho a ni.

Education Minister hovin Zirlaite Ni hman a ni

Mizo Zirlai Pawl (MZP) Assembly Vawi 66-na leh Zirlaite Ni ni bawk chu nimin khan School Education Minister Lalchhandama Ralte hovin Darzo tlang Liandala Run-ah hman a ni.

Dengue vangin mi 2 thi tawh

Mizoram-ah kumin chhungin Dengue vanga thi mi 2 chhinchhiah an awm tawh a, hetihlai hian kumin chhunga Dengue vei hmuhchhuah zawng zawng zat chu 372 a tling tawh.

Serchhip District-a Zirlai naupangte eitur tha pekna tur leh Sports zirna kalpuina tur Minister in a hawng

Image
School Education Minister Lalchhandama Ralte chuan Serchhip District chhung thingtlang khuaa ‘Free Morning Nutrition Programme for School Children’ kalpui tur leh Pilot Project-a ‘Grassroots Level Sports Development Programme’ kalpui turte chu nimin khan Serchhip-ah a hawng.

YMA Football Tournament khel chhunzawm

Image
Serchhip Sub-Hqrs. YMA buatsaih Inter-Branch YMA Football Tournament chu nimin khan Serchhip Sports Stadium-ah khelh leh niin match 3-ah goal 18 zet a lut.

Bialtu MLA in MLA Fund hman dan ah lawmthu sawi

Image
Serchhip bialtu MLA Lalduhoma chuan Serchhip bial chhunga MLA Fund hmanga tha tak taka hna thawh a ni chu lawmawm a tih thu a sawi.

Serchhip District-ah Bawng lakluh khap a ni

Image
Bawng ke leh ka na hri a leng mek nia hriat a nih avangin Myanmar leh Champhai District atanga Bawng lakluh khapna thupek nimin khan tihchhuah a ni.

Hri kai awm belh lo

Nimin khan Serchhip District-ah COVID-19 hri kai hmuhchhuah leh enkawl dam an awm belh lova, hri kai enkawllai mi pakhat awmin Khawlailung khua a ni. Nimin tlai thlenga Serchhip District-a COVID-19 hri kai hmuh tawh chu 14,608 niin an zinga 14,571 chu enkawl dam an ni tawh a, hri kai mi 36 an boral tawh a ni.

Intihsiakna neih hun sawn

Central YMA leh Mizoram State AIDS Control Society (MSACS) thawhdunna anga Zoram Harh Rawh-Campaign puala YMA Branch te tana Mizo Hnam Lam leh Zai hmanga intihsiakna thla thar Nov. 7 atanga Serchhip-a neih tura ruahman chu Buh seng lai a nih avang leh Zirlaite Exam neih hun nen a inrual avangin Nov. 24 leh 25, 2022 khian neih tura sawn a ni a, he intihsiakna a tel tur Branch te tan pawh Nov. 18, 2022 thleng in hriattir theih a ni ang. Tarlan tawh angin he intihsiakna ah hian Mizo Lam pahnih, Cheraw leh Khuallam bakah Pipu zai hmanga intihsiakna neih tur niin a titha te chu State Level intihsiakna December thla a neih turah an tel leh dawn a ni.

MPYCC in vanduaithlak ti

Congress Thalaite chuan Chief Minister Zoramthanga’n Champhai Grape Winery tlawha Grape wine hralhna chungchangah, “Project mumal tak siamin hma kan la ang,” tih a la sawi chauh chu vanduaithlak an tih thu thuchhuah siama tarlangin, Grape chingtute hmakhua tih tak takna nena an beihpui lohzia tilangtu leh hmui chauha kut hnathawktute hmangaih thin tih an inpuanna nia an hriat thu an tarlang.

BJP in Committee din thar

BJP Mizoram Pradesh chuan Central atanga PM SVANidhi chungchanga thu an hmuh angin PM SVANidhi State Implementing Committee chu BJP State Vice President JB Rualchhinga kaihhruaina hnuaiah an din a, PM SVANidhi kaltlanga eizawnna bultanna atana Bank Loan la duh te an awm anih chuan BJP State Office ah ngaihven turin an in hriattir nghal bawk tih nimin khan thuchhuah siamin an tarlang.

YMA Rorel Inkhawm nei dawn

YMA General Conference neih loh kuma neih thin YMA Rorel Inkhawm vawi 3-na chu Vawiin hian Thingsulthliah Khelmual-ah neih a ni dawn a, chawhma dar 10:30-ah tanin tlai dar 4:00 thleng rorelna neih tura ruahman a ni a, zan lamah Vantlang Inkhawm neih nghal tur a ni ang. He hunah hian lawmman hrang hrang semna neih nghal a ni bawk ang.

Community Centre hawng

Saitual District chhung Khawkawn khuaa BADP sum cheng nuai 20 senga Community Centre sak chu nimin khan HRD Board Vice Chairman leh Lengteng Bialtu MLA ni bawk L.Thangmawia chuan a hawng a, he Centre hi mikhual riah nghal theih nana duan niin Khaw-kawn hi Inter-State Border(Manipur) a awm a nih avangin hetiang neih hi a pawimawh hle tih a sawi a, cheng nuai 20 senga hlawkna um lova khawtlang hmangaihnaa he Centre tha taka satute chungah lawmthu a sawi bawk.

Pineapple Wine Rules duh

Sialhawk khua chuan Lakhuihthei atanga sum tam zawk an lakluh theih nan Mizoram Sawrkar chu Champhai leh Hnahlan Grape chingtute tan Grape Wine siam a phalsak angin Pineapple Wine Rules siam sak ve se an duh tih tun thla ni 10 khan Excise and Narcotics Minister, Dr. K. Beichhua hnenah an thlen a. Sial-hawk VC Vice President, J. Rampanmawia sawi danin, Sialhawk leh a chhevel khua ten eizawnna atana an hman ber Lakhuihthei hi Kg. khat cheng 10 zelin an hralh thin a, a man hi a tlawm avangin an thar tam ang hu-in sum an lakluh chu a tam tawk thei lo a. Kumin hian Lakhuihthei hi quintal 16,200 vel an thar a, heta tang hian cheng nuai 200 vel an leichhuak a, Mizorama Lakhuihthei thar chhuah zawng zawng atanga zaa 67 vel chu Sialhawk khua atanga thar a ni.

COVID-19 hri kai enkawllai 39 la awm mek

Nimin tlai thleng khan Mizoram-ah COVID-19 hri kai enkawllai mi 39 an la awm.

Khawzawl DC Office sak mek CM in a tlawh

Khawzawl DC Office sak mek chu nimin khan Chief Minister Zoramthanga chuan a hmunah kala enfiahin hmalakna dangte a enpui bawk.

Kum 60 tlin lawmna Chief Minister in a hmanpui

Niminpiah khan Govt. Vengthlang Middle School, Champhai ten an kum 60-na, Diamond Jubilee lawmin he School Headmaster hmasa ber leh tuna Chief Minister Zoramthanga chuan khuallian niin a hmanpui a ni.

Kawngpui tha neih dan tur hi kan hria - PC Party

PC Party chuan nimin khan Aizawl-a an Office-ah Mizoram kawng chhe chungchang sawihona neiin he hunah hian an Party President Vanlalruata chuan, “Kawngpui tha neih dan tur hi kan hria a ni,” a ti.

MZP Assembly vawi 66-na Minister in hmanpui

Mizo Zirlai Pawl (MZP) Assembly vawi 66-na Darzo khuaa neih mek chu nimin khan bialtu MLA leh Higher & Technical Education Minister Dr. R. Lalthangliana chuan khuallian niin a hmanpui.

Governor leh Health Official ten Health Department hnuaia hmalakna thlirho

Mizoram Governor Hari Babu Kambhampati leh Health Department hotulu te chu nimin khan Raj Bhavan-ah inkawmin Health Department hnuaia Healthcare Service hrang hrangte kalpui mek a nih dan te leh tha zawka kalpui a nih theih dan turte an sawiho.

Serchhip-a YMA Football khel tan

Image
Serchhip Sub-Hqrs. YMA buatsaih YMA Branch 32 telna Inter-Branch YMA Football Tournament chu nimin khan khelh tan a ni.

Serchhip-ah Ruihhlo dona atana buatsaih 'Inter-Branch YMA Football Tournament' khelh tan a ni

Image
Serchhip Sub-Hqrs. YMA in ruihhlo dona atana buatsaih 'Inter-Branch YMA Football Tournament' chu nimin khan Serchhip Sports Complex-ah khelh tan a ni.

Serchhip District Boxing Championship khelh tan a ni

Image
Ni hnih chhung awh tur Serchhip District Boxing Championship-2022 chu nimin khan Serchhip Boxing Hall-ah khelh tan a ni.

Thenzawl-ah Ar note sem

Serchhip District-a FOCUS ten Ar leh Artui a intodelhna tura hma an lakna kal mekah nimin khan AH & Vety Department kaltlangin Then-zawl-a chhungkaw 60 te hnenah Ar note 20 theuh leh Ar chaw kg. 2 theuh bakah Ar tui leh a chaw pekna bawm te an sem leh a, hemi hmalam hian Serchhip-a Veng hrang hrangah hetiang hi an lo sem tawh bawk a ni.

Thing tlu in In delh chhia

Nizan hmasa-a thli tleh ah North Van-laiphai Rahsi Veng-a VL. Ruata te chenna In chu an In bula Fartuah kung tlu in a delh a, mihring thi leh hliam an awm lo thung.

Hri kai enkawllai 1 la awm

Nimin tlai thleng khan Serchhip District-ah COVID-19 hri kai enkawllai mi pakhat a la awm.

AMC BOC thutkhawm nei

Aizawl Municipal Corporation (AMC) rorelna sang ber, AMC Board of Councillor (BOC) Meeting chu nimin khan neih niin an AMC chu mihring cheng nuai 3 an chuan tak avanga Corporation-a hlankai a nih angin AMC-a Councillor tih chu Corporator tia thlak rel a ni a, AMC area zauh a nih theihna tura hmalak rawtna pawmin, Bawngkawn to Chanmari kawng ‘Laldenga Road’ tia puah an remti bawk.

Unau thattu a puh man tawh

Kumin September 11-a Aizawl Vaivakawn Zohnuai Four Lane bula unau mipa pahnih thattu a puh chu Police ten manin thubuai an siamsak a, Central Jail-ah dahluh an ni tawh.

YMA in ngaihchan zui rel

Nizan hmasa-a Lunglei Sub-Hqrs. YMA Executive Committee thukhawm chuan Aizawl-Thenzawl-Lunglei kawngpui siamthat phut nana tun thla ni 18-a No Vehicle Day an hman chuan awmzia a neilo nia an hriat thu an sawi a, kawng siam chungchangah hian tun thla ni 31 thleng ngaichang lehin a mawhphurtute atanga thu leh hla engmah hriat a nih loh chuan kawngpui tha an nei theih nan an thiam anga hmalak nise an ti bawk.

SSU ten khawmpui an nei

Zirlai mahni-a inchawmte pawl, Students' Self Support Union (SSU) chuan niminpiah khan Hnahthial-ah General Assembly vawi 35-na hmangin H&TE Minister Dr. R. Lalthangliana chuan khuallian niin a hmanpui a, an thurel zingah zirlai harsate puala Bank Account hawn chu telin, Intodelh kawnga ram leh hnam in hma a sawn theih nan, khaw intodelhte hnenah sawrkarin lawmman a siam theih nana hmalak te a tel a ni,

Thli in chhiatna thlen

Nizan hmasa khan Cyclone Si-trang si per nia hriat in Mizoram hmun hrang hrang nuaiin chhiatna thleng hriat tur a awm nual.

Hliappui kum 50-na lawm

Saitual District-a Hliappui khua chuan nimin khan an khaw kai thar kum 50-na (Golden Jubilee) chu Hliappui Community Hall-ah an lawm a, he hun hi bialtu MLA leh Human Resource Development Board Vice Chairman L. Thangmawia chuan khuallian niin a hmanpui a, Hliappui khua in kum 50 a tling ta chu a lawmpui thu sawiin, “He Golden Jubilee hi inngaihdam tawn nan hmang ila, midang ngei leh huat deuhte kan lo nei a nih pawhin Jubilee pualin i ngaidam ang u,” a ti bawk. He hunah hian bialtu MLA hian Golden Jubilee lungphun hawngin Jubilee Souvenir a tlangzarh nghal bawk.

Tualte khua ah Tomato Festival hman a ni

Khawzawl District-a Tualte khua chuan nimin khan ‘Tomato Festival’ an hmang a, he hun hi Deputy Chief Minister Tawnluia chuan khuallian nia hmanpuiin Tomato sawrna khawl bun chu a hawng bawk.

Higher Secondary School Games neih tan a ni

Mizoram Higher Secondary School Games vawi 19-na chu nimin khan Aizawl khawpui chhung hmun hrang hrangah neih tan a ni.

CM in Keilungliah Dam Reservoir a tlawh

Image
Chief Minister Zoramthanga chuan nimin khan Champhai khawpui kianga lui luang Keilungliah-a tuikhuah mek, Keilungliah Dam Reservoir chu a tlawh.

MPTA in zirlai naupang 19 tanpuina an hlan

Mizoram Primary Teachers' Association (MPTA) chuan Endowment Fund atangin nimin khan zirlai naupang 19 te hnenah tanpuina Rs. 5000/- theuh an hlan.

Kum 2023 MLA thlanah ZPM-in a hlangin Kalphung thar sawrkar siam kan tum - K. Sapdanga

ZPM Working President K. Sapdanga chuan kum 2023 MLA thlanah ZPM-in a hlangin ‘Kalphung thar sawrkar’ siam an tum thu a sawi.

Political Party hrang hrangte remtihnaa hming sign-in Grape Wine Rules a lo piang - Chief Minister

Chief Minister Zoramthanga chuan Mizoram in Grape kan tharte atanga siamchhuah Grape Wine chu dan ang thlapin kalpui a ni ta tih sawiin, “Political Party hrang hrangte remtihnaa hming sign thlapin Grape Wine Rules hi alo piang chhuak ta a ni,” a ti. 

Vawiin ah YMA Football khel tan dawn

Image
Serchhip Sub-Hqrs. YMA buatsaih Inter-Branch YMA Football Tournament chu Vawiin hian Serchhip Sports Complex-ah khelh tan a ni dawn ta.

Serchhip District mi pahnih thlang

Image
November 6, 2022 atanga Shillong-a khelh tur North East Olympic U-17 Women Football-a Mizoram aiawh turin Serchhip District atangin mi pahnih thlan an ni.

Pandal sak hnatlang nei

Image
Serchhip Leisekawt Mual-a SAY Congress neihna tur Pandal sak hna chu ngawrh taka thawh chhunzawm mek zel a ni a, nimin khan Serchhip Vengchung Pastor Bial Kohhran Pavalai Pawl te chuan an bialtu Pastor, Rev. Lalremruata hova hnatlang neiin Pandal sak hna thawh mek hi an pui a, he hunah hian mi 70 chuang an thawkchhuak a, nimin vek khan Serchhip Hmar Veng Branch KTP te pawhin Pandal sak hna thawh mekah hian hnatlang neiin mimal a Pandal sak hna thawk tura thawkchhuak mi engemaw zat an awm bawk a ni. He Pandal sak hna thawh mekah hian tunah hian a chuang zar zawh thawkhat niin Pandal dung tluana a zauhna tur pawh tihfel a ni tawh a, a bang pin hna leh Stage siam hna te thawh mek niin pawl leh Kohhran dang ten hnatlang in an pui chho mek a ni.
Image
Serchhip Sub-Hqrs. YMA hnuaia Sub-Hqrs. Anti-Drug Squad (SADS) te chuan nimin khan hnatlang neiin ruihhlo (Heroin No. 4) dapchhuah hna an thawk.

Boxing inelna nei tan dawn

Serchhip District Boxing Championship chu Vawiin atang hian Serchhip Boxing Hall, New Serchhip-ah neih a ni dawn a, Serchhip District chhung khaw hrang hrang atangin Boxer mi 60 chuang tel tura beisei niin tukin hian an Weight lak a ni dawn a, chawhma dar 11:00 ah inhnek tan theih beisei a ni. Serchhip District Boxing Championship hawnna hi Vawiin tlai dar 3:00 hian neih tura ruahman niin bialtu MLA Lalduhoma chuan khuallian niin a hawng dawn a ni.

Hri leng ziaawm mek zel

Serchhip District-ah nimin khan COVID-19 hri kai hmuhchhuah leh enkawl dam an awm belh lova, kar hmasa Ningani hnu lamah hri kai hmuh thar leh enkawl dam an awm belh leh rih ta lo a, hri kai enkawllai mi pahnih awm mekin heng mite pawh hi an chhuak leh thei dawn hnai tawh nia hriat a ni.

Total Bandh tihtawp a ni

Lungsen khawtlang in Govt. Lungsen H/S-a Science leh Mathematics zirtirtu nghet dah phut kal zelah nimin zing dar 5:00 atanga naktuk Nilaini thleng Total Bandh neih an tum chu nimin-ah mipuiin an zawm that avang leh  Govt. Lungsen H/S-a zirtirtu nghet dah tur ruahman fel a nih tawh thu hriat a nih avangin nimin tlai dar 5:00 khan tihtawp a ni a, hemi hmalam hian School Education Director chuan boruak muanawm taka a kal hunah Order tihchhuah a nih tur thu a sawi nia thudawn a ni bawk.

Maxi Cab service loh rel

Nimin zing khan Chawngte leh Lunglei inkar kawngpui chu Chawngte atanga km 2 velah lirthei kaltlang theihloh khawpin kawng a chhia a, hei vang hian khualzin phur lirthei te chu tlan thei lovin an let leh vek a, Maxi Cab neitute chuan kawng siamthat a nih hma loh chuan helai ah hian service tawh loh nise an ti a ni. Chawngte Maxi Cab Welfare te hian an hrasatna hi SDO (C) hnenah ziaka an thlen thu leh, a tul ang a hma lakpui turin Chawngte Group YMA te hnenah an thlen thu an sawi bawk.

Anganwadi building hawng

Aizawl Tuikual South Anganwadi Center No. 1 sak thar chu nimin khan bialtu MLA leh I&PR Minister Lalruatkima chuan a hawng a, Nu raipuar leh naupiang enkawl a, naupang enkawltu Anganwadi kan ngaih pawimawh zel a tul thu he hunah hian a sawi bawk. Tuikual South Anganwadi Centre No. I building hi kum 2005 atanga sak tan a ni a, Lalruatkima hian MLA Fund Rs. 3,50,000/- pein he sum hmang hian sak zawh a ni.

PHE-a PE ten lawmthu sawi

Public Health Engineering (PHE) Department hnuaia Provisional Employee (PE) te chuan an hlawh lak tur an lak kim lohna Arrear an dil chungchangah PHE Department changtu Deputy Chief Minister Tawnluia’n an harsatna tawh te a ngaihtuah sak avanga an pu te hnen atanga an arrear hi pek theih an nih tur thu an dawn avangin an lawm hle tih an sawi a, sawrkar leh an Department hotute chungah an lawm hle tih pawh sawiin, mipuite tana thahnem ngai taka thawk chhunzawm zel turin an in chah bawk.

Champhai-ah CM lo hmuak

Chief Minister Zoramthanga chuan ni khat cham turin nimin khan Champhai thlengin District Bawrhsap James Lalrinchhana leh Head of Office bakah tlawmngai pawl hruaitute'n Circuit House-ah lo hmuak in inkawmna hun an hmang a ni. Chief Minister chuan amah lo hmuaktute chu chibai bukin, khawtlang mipuite leh sawrkar hnathawkte chu hmathlir tha tak nen Champhai hmasawnna tura thawk zel turin a chah a. Cham-phai pawimawhna chu Agriculture leh Horticulture lam - buh, thei leh thlai tam tham taka tharchhuah a nih thu a sawi a. Pawisa tam tak lakluh theihna turin leilet zau tak an neih chu hmang tangkai a, humhalh a hmasawn zel a nih theih nan hmalak chhunzawm nise a ti a ni.

ZORO in Aizawl-ah UNO Day pualin hun an hmang

ZORO General Hqrs. chuan nimin Oct. 24, 2022 khan United Nations Organization (UNO) Day pualin Aizawl-a MZP Conference Hall-ah hun an hmang.

Congress in lungphum phum tawh tih hlawhtlin tum

Mizoram Pradesh Congress Committee (MPCC) chuan Pathian leh Mizoram mipuite zarah sawrkarna an siam leh a nih chuan MNF sawrkarin lung a phum ve ringawt, tih hlawhtlin ngaihna an hriat lohte chu tihhlawhtlin leh vek an tum thu an sawi.

Nakum inthlan ah Pathian leh mipui zarah MNF a sawrkar leh ngei dawn - Dr. R. Lalthangliana

MNF Adviser leh Health Minister Dr. R. Lalthangliana chuan nakum inthlan ah Pathian leh mipui zarah Zoramthanga kaihhruai MNFchu a sawrkar leh ngei ngei dawn niin a sawi.

Vawiin atanga Mizoram luhna kawngpui Kolasib District-a danpin tum thulh lailawk a ni

NHIDCL ten Fourlane laih an tumna a ram neitu, Land Owners Association Kolasib District ten zangnadawmna an lak tur an lak thuai theih nana nawr nan Vawiin atanga NH. 306 kawngpui dan an tum chu Kolasib DC John LT. Sanga hova meeting an neih hnuah thulh rih an remti a, tun thla ni 31 thleng Sawrkar an ngaichang dawn.

2nd SIDBA Inter Club Tournament-ah New Serchhip Badminton Club an champion

New Serchhip Badminton Club buatsaih 2nd SIDBA Inter Club Tournament 2022 chu Inrinni zan khan khelh zawh niin New Serchhip Badminton Club chu an champion.

Hri kai leh dam thar awm lo

Inrinni leh Pathianni-ah Serchhip District-a COVID-19 hri kai chhinchhiah thar leh enkawl dam chhinchhiah belh an awm lova, nimin tlai thleng khan Serchhip District-a COVID-19 hri kai enkawllai chu mi pahnih la niin hri kai hmuh tawh zawng zawng chu 14,607 an ni a, an zinga mi 14,569 te enkawl dam an ni tawh a ni.

National inelna a tel turin Marian H/S naupang thlang

Kumthar January 27-31 chhunga ‘National Children's Science Congress’ neih tura Mizoram atanga tel tur Child Scientist thlanchhuah zingah Marian H/S Serchhip-a zirlai pakhat chu a tel.

Mipuite fimkhur turin chah

Mizoram-ah tunkar Nilaini (Oct. 26, 2022) thlengin thli leh ruah thawk theih dinhmun ah a din avangin mipuite chu fimkhur tura chah an ni. Regional Meteorological Centre, New Delhi leh State Meteorological Centre, Govt. of Mizoram in a tihchhuah angin Bay of Bengal chhim chhak lama cyclone insiam mek chuan Mizoram chu naktuk, October 25, 2022-ah thli in a hrut ve thut theih ah dah niin October 25, 2022 hian darkar khata kilometer 45 - 65 vela na in thli hi thawk tura ngaih a ni a, he cyclone avang hian Vawiin atanga naktip, Nilaini thleng hian ruah tam tak sur thei a ni bawk a. Cyclone chungchang ah hian mipuite chi-ai lo tura hriattir an nih rualin cyclone thleng thut palh thei leh chhiatna thleng theite laka fimkhur tura hriattir an ni.

East Tuipui bial-ah Bawng natna a leng mek niin hria

Tunlai hian Champhai District-a East Tuipui bial khaw hrang hrangah ranpui, a bikin Bawng natna chi khat Foot and Mouth Disease (FMD) natna a leng mek nia hriat a ni.

Hri kai enkawllai 52 awm

Nimin khan Mizoram-ah COVID-19 hri kai mi 4 chhinchhiah belh awmin hri kai enkawllai te zingah mi 7 te chu anmahni enkawlna hmun atanga chhuahtir an ni thung a, heti hian nimin tlai thleng khan Mizoram-a COVID-19 hri kai hmuh tawh chu 2,38,746 niin an zinga 2,37,971 chu enkawl dam an ni tawh a, hri kai zinga za zela 99.68 te enkawl dam ni tawhin hri kai enkawllai mi 52 an la awm a, hri kai zingah mi 723 an boral tawh a ni.

Tang tlanchhuak la man lo

October 13, 2022-a Champhai District Jail-a tang tlanchhuak Myanmar lam mi 3 Thangsiankhaia, Thinglei; Zamlamsum, Thinglei leh Thangkhawmuana, Darkhai te chu man an la ni lova, heng mi te hi Methaphetamine leh Heroin kaihhnawiha man niin ND&PS Act leh Foreigner Act hnuaia thubuai nei an ni a, Court-ah hruaia an inlan zo chu an pathum hian an tlanchhuak nia thudawn a ni.

Total Bandh huaihawt dawn

Lungsen Joint NGO Coordination Committee tenn Lungsen H/S-a Science leh Mathematics zirtirtu nghet dah phuta sawrkar an ngenna kalzelah an lo ruahman lawk tawh angin Vawiin atanga tunkar Nilani thleng khian an khua ah Total Bandh an huaihawt dawn.

Lunglei kawng Sample enfiah

Aizawl leh Lunglei inkar kawng, Lunglei Road Division-I huamchhunga kawngpui chhiat dan dik tak zirchiang tura PWD Engineer-In-Chief in Study team a din te chuan kawng chhiatna hmun 17 ah sample la tawhin Lunglei-a an Laboratory-a an endik chinah Soil quality chhe lutuk a awm loh thu leh Kawng siamthatu ten Lung thaa pawm Sentetzel atanga lak an hmang tih an sawi a, heng hmun 17 a sample an lak zingah hian Kawngpui chunglang siamna, WMM sample pathum telin, a bak zawng chu Kawngpui hnuai lama Lei awmdan zirchianna tura Lei lak chhuah te an ni tih an sawi a. Tuna an endikna chu Laboratory pakhata endik chauh a la ni tih sawiin, Aizawl lam Laboratorya an endikna result nen khaikhin a tul thu leh result a inan loh viau chuan endik that a tul tur thu an sawi bawk. 

NH. 54 danpin tintuah zel

Vairengte-Kawnpui inkar kawngpui sial meka ram neitu, Land Owners’ Association, Kolasib District chuan zangnadawmna hmuh vat an duh thu sawiin, an harsatna tawhte chinfel vat a nih theih nan Vawiin October 24, 2022 thleng ngaihchan ni se an ti a, huntiam ral hnuah thu lawmawm a awm loh chuan National Highway dan an tum. Vairengte leh Kawnpui inkara Land Owners Assn. Joint Meeting tunhnaia neih chuan July 8, 2022-a CALA Kolasib District Account-a ram neite chanvo tur zangndawmna lut tawh, sem loha awm chu sem vat a nih theih nan te, state sawrkarin Forest Department kaltlanga harsatna an siam chu pawi an tih thu leh company-ten hnathawh bul an tan theihna tura sawrkar auh eih nan hetiang hian ruahmanna an siam a ni.

Sawrkar-na kan chelh ve tawh dawn - BJP President

BJP Mizoram Pradesh State President Vanlalhmuaka chuan nakum 2023 MLA General Election neih hnuah chuan sawrkar-na an chelh ve tawh dawn niin a sawi.

H&TE Minister in hriselna ngai pawimawh turin chah

Higher & Technical Minister Dr. R.Lalthangliana chuan, “Mihring hi kan hrisel loh chuan sum leh pai ngahin awmzia a nei lo a ni,” a ti.

Tuichawngchhuah atanga sawn te dinhmun thlirho

Dan lova din khua Tuichawngchhuah khua atanga sawnchhuah chhungkaw 49 te dinhmun leh hmalak tul te chu Lunglei District Level Screening Committee on Unauthorized Settlement chuan an ngaihtuah.

Raltlan chungchang US State Department sawipui

USA-a zin mek Central YMA leh Central YLA hruaitute chuan Zirtawpni khan Myanmar atanga Mizoram-a raltlante chungchanga an hmalakna leh tanpuina awm theite Bureau of Population, Refugees & Migration (PRM), US State Department chu Washington DC-ah an sawipui.

MNF Party hi din a nih tirh atangin Pathian a innghat tlat a ni - Zoramthanga

MNF President Zoramthanga chuan MNF Party chu din a nih tirh atangin Pathian a in nghat tlat a ni tih sawiin, “Pathian leh kan ram tan tiin a lungphum pawh phum a ni,” a ti.

Naktuk atangin Lehkhabu pho runpui nei dawn

Mizo Writers Association (MWA) leh Art & Culture Department tangkawp chuan naktuk, October ni 25 atanga Oct. 28 chhung hian Aizawl-a Vanapa Hall-ah lehkhabu pho runpui an buatsaih dawn.

Thla khata ZMC enkawlna senso nuai 438.22 vel; ZMC tan NMC-ah recognition dil mek a ni

Zoram Medical College (ZMC)-a Medical College bik enkawlna atana thla khata Mizoram sawrkar senso chu chawhrualin cheng nuai 438.22 a tling a. Hetihlai hian Central sawrkarin ZMC a la anih chuan faculty tam zawk leh MBBS seat tam zawk hawn theih beisei a ni.

Serchhip-ah Police an Duty laia hmelma kut-a thi te zahna leh chawimawina hun hman a ni

Image
India rama Police an Duty laia hmelma te kut tuara boral te hriatrengna leh zahna hlanna ni, ‘Police Commemoration Day’ chu nimin khan rampumah hman niin Serchhip-ah pawh Addl. SP Saidingliana Sailo MPS hovin urhsun taka hman a ni.

Serchhip-ah Project Himna Madat kaltlangin Vaihlo, zu leh ruihhlo thatloh zia inzirtirna neih a ni

Image
Nimin khan ‘Project Himna Madat’ Serchhip District leh Govt. Serchhip College-a Drug Awareness Club buatsaihin vaihlo, Zu leh ruihhlo thatloh zia inzirtirna hun hman a ni.

Assam Rifles ten thisen pe

Image
Serchhip-a Battalion hmunpui nei 8th Assam Rifles te chuan nimin khan Serchhip Blood Bank-a dah turin thisen Unit 9 an pe a, thisen petute hi mipa vek niin Serchhip Blood Bank-ah kalin thisen hi an pe a, thisen petute zingah hian Battalion Commandant Col. J. Mutum SM pawh a tel a ni.

Anganwadi Workers tana training buatsaih zofel

Image
Serchhip District chhunga Anganwadi Workers te tana Serchhip DIET ten Early Child Care and Education chungchang zirhona tun thla ni 11 atanga an buatsaih chu nimin khan zawhfel a ni.

PIL thehluh tur thlawp

Image
JAC on Serchhip District Hospital Site te chuan nimin khan Serchhip Kawnpui VC Hall-ah Serchhip khawchhung (Town ni lo)-a VC leh NGO hrang hrangte kokhawmin Serchhip Hospital a hmun ngaia sak that a nih theih nana Gauhati High Court a PIL thehluh an lo tum chungchang ah zau zawka inrawnkhawmna an nei a. He huna tel te chuan JAC ten Gauhati High Court-a PIL File an tum chu tha tiin a tawp thlengin an thlawp tlat dawn tih Resolution an pass a, PIL File-na atan hian a tul dan a zirin khawtlang huapin thawhlawm khawn nise an ti bawk. JAC hruaitute chuan sawrkar-ah Peoples Representation thehluh phawt a ngai nia sawiin, hei hi kar hnih nghah leh tur niin an sawi a ni.

NSS te Pandal sak ah hnatlang

Image
Govt. Higher Secondary School Serchhip NSS Unit-a Volunteer te chuan nimin khan Van-tlang tana thil tha tihna ni, Social Works Day hmangin Serchhip P&E Veng-a Leisekawt Mual ah hnatlang an nei a, thla thar mai-a Serchhip khua in Salvation Army thalai khawmpui lian, India Eastern Territory (IET) Salvation Army Youth (SAY) Congress a thlen tur atana Pandal sak hna thawh mekah hna tul leh pawimawh chi hrang hrang thawhpuiin bungraw thiar leh Mual chhung thenfai hna bakah Mual sir vela hnim tihfai ngai hrang hrangte an tifai a, he hunah hian NSS Volunteer mi thahnem tak leh Programme Officer te an thawkchhuak a ni.

Hri kai hmuh belh awm lo

Serchhip District atanga Sample enfiah te zingah nimin khan COVID-19 hri kai hmuh belh an awm lova, nimin tlai thlenga Serchhip District chu 14,607 niin an zinga 14,569 te chu enkawl dam an ni tawh a, hri kai hmuhchhuah atanga za zela 99.73 te chu enkawl dam ni tawhin hri kai enkawllai mi pahnih an la awm a, Mualcheng khua ve ve niin hri kai zingah mi 36 an boral tawh bawk a ni. Mizoram-ah nimin khan COVID-19 hri kai chhinchhiah thar mi 9 awmin hri kai zingah mi 5 te anmahni enkawlna hmun a\anga chhuah tir an ni bawk a. Nimin tlai thleng khan Mizoram a COVID-19 hri kai hmuhchhuah tawh chu 2,38,731 niin an zinga 2,37,954 te chu enkawl dam an ni tawh a, hri kai enkawllai mi 54 la awmin hri kai zingah mi 723 an boral tawh a ni.

MNF kum 60 tlin lawmna nei

MNF Diamond Jubilee Celebration Committee chuan nimin khan an Chairman Vanlalzawma hovin Aizawl Press Club-ah thuthar thehdarhtute an kawm a, Pathian kaihhruaina hnuaiah Mizo National Front (MNF) chuan nikum October 22 khan kum 60 tlingin, a lawm hawnna hi Vanapa Hall-ah ropui taka an neih thu leh Vawiin October ni 22, 2022 hian a kharna hun, Vanapa Hall ah hman a ni dawn tih an sawi a. MNF Diamond Jubilee puala hma an lakna leh a lawmna an neih hrang hrangte pawh an tarlang bawk a ni.

Bawng phurhsawn khap rih

Tunhnaiah Bawng atangin ran natna, Foot & Mouth Disease (FMD) vei hmuhchhuah a nih avang leh Champhai District-a Myanmar ramri hnaih khaw thenkhatah he natna vei ni a rinhlelh bawng hmuh an nih avangin Champhai District Magistrate chuan Champhai District chhungah Bawng phurh sawn/khawih chet rih loh tur a nih thu thuchhuah siamin a tarlang a. Hri kai lo ni a hriatte pawh hmundangah phurh sawn khap tlat a nih thu he thuchhuah ah hian tarlan a ni bawk.

President rawn zin dawn

India President Droupadi Murmu thla thar November thla khian Mizoram a rawn tlawh dawn a, tun tum hi President a nih hnua a rawn zin vawi khatna tur niin President a rawn zin dawn avang hian Governor Hari Babu Kambhampati chuan November ni 4, 2022 (Friday) khian zing dar 9:00 atanga tan turin Eighth Legislative Assembly Special Session a ko a, hemi chungchang ah hian Mizoram Legislative Assembly Secretariat chuan niminpiah khan hriattirna a chhuah tawh a ni.

Supply Minister in hmanpui

Kolasib bialtu MLA leh Supply Minister K. Lalrinliana chuan nimin khan Kolasib I&PR Conference Hall-ah Kolasib Writers Club buat-saih Annual Magazine tlangzarhna hun a hmanpui a, hmanlai atang tawh a thu ngaihnawm, thu ril leh thil pawimawh tak tak ziakmi ten ziaka dah that nachang an lo hriat avangin tun thlengin hun kal tawh chanchin pawimawh tak tak kan zirin kan hriat phah theih thu a sawi a, Ziak a thil dahthat, enlet tur awm thin chuan tul lo a inhnial buaina te a pumpelh phah tir thin thu a sawi bawk. Kolasib Writers Club Annual Magazine 'Parfung' hi phek 222 a chhah niin ziaktu 23 te thuziah a tel a, he hunah hian Zairemchhunga, Bahzar Editor hnenah 'TS Luaia Award' hlan a ni bawk.

MSU ten Governor an kawm

Mizo Students' Union (MSU) General Hqrs. hruaitute chuan nimin khan Raj Bhavan-ah Governor Hari Babu Kambhampati chu hmuin Zirlaite puala hmalakna pawimawh tak tak an neih chungchang te leh an hmachhawp thenkhat te an hrilh bakah MSU hmachhawp zinga pawimawh tak - Mizoram chhunga zirlaite puala Cultural Exchange Programme, Expedition Tour leh Exposure Tour buatsaih chungchanga rawtna an neih te an theh lut a. Governor chu theihtawp chhuahpui turin an ngen bawk. He hunah hian MSU hruaitute hi an President Samuel Zoram-thanpuia hovin an tel a ni.

Police Sports Meet kharna Home Minister in hmanpui

Tun thla ni 17 atanga neih Mizoram Police Sports Meet vawi 20-na chu nimin khan zawhfel niin Home Minister Lalchamliana chuan he Sports Meet kharna hun hi a hmanpui a ni.

Sinlung Hills Council Cultural Meet nei

Art & Culture Department leh Sinlung Hills Council-te tangkawp buatsaihin nimin khan Zawngin khua-ah Cultural Meet neih a ni a, he hun hi Art & Culture Department Director R. Hmingthanzuala chuan khuallian leh Ricky Lalremsanga, Executive Member, Sinlung Hill Council in khual zahawm niin an hmanpui a ni. He Cultural Meet-ah hian Zawngin, Suangpuilawn 'N', Luangpawn leh Suangpuilawn khua atangin Cultural Troupe-te an tel a. Zawngin khua hi 'Puma' zai lo chhuahna niin 'Puma' zai lam hmuhnawm tak an entir bawk.

‘Zoram zalên nân hming ka sign’ lehkhabu tlangzarh

Information & Communication Technology Minister Robert Romawia Royte chuan nimin khan Zoramthanga lehkhabu ziah, ‘Zoram zalên nân hming ka sign’ tih chu a tlangzarh.

MBSE in JEE-Advanced a inziaktling te lawmpui

Mizoram Board of School Education(MBSE) chuan India rama exam ngaihsan hlawh leh harsa ber pawla chhal ngam, Joint Entrance Examination (JEE)-Advanced-a inziaktling Mizo naupang 5- Simon Lalremsiama Shangpliang, St. Paul’s HSS; Gabriel Vanlalbera, St. Paul’s HSS; Lalchhanhima, St. Paul’s HSS; Vanlalmuanpuia, St. Paul’s HSS leh Malsawmzuala Khiangte, National Public School, Guwahati-te hnenah lawmpuina hun nimin khan MBSE Office, Chaltlang-ah an hmang a, he hun hi Human Resource Develepment Board Vice Chairman L. Thangmawia MLA leh C. Lalduhkima, Training & Placement Officer, Higher & Technical Education (Technical Wing) te bakah MBSE Officer leh Staff ten an hmanpui a ni. JEE Exam hi JEE-Mains leh JEE-Advanced-ah te then a ni a, JEE-Advanced hi India rama Engineering College tha bera sawi, Indian Institute of Technology (IIT)-a luh theihna tura entrance exam a ni.

Hripui avanga vaibelchhe sang thum chuang kan hmuh tak loh awm - Chief Minister

Chief Minister Zoramthanga chuan Sawrkar laipui atanga sum kan hmuh thin, Budget-ah pawh telh vek tawh hripui avanga vaibelchhe sang thum chuang kan hmuh tak loh thu a sawi.

Inthlan buatsaih ngam lo ah ZPM-in sawrkar puh

ZPM Party chuan Zemabawk Local Council thiah taka inthlanna neih hun a ni tawh chunga inthlanna la buatsaih a nih lo leh Lunglei Municipal Council-a inthlan a an buatsaih har lutuk chu an hriatthiam loh thu an sawi.

Hri leng-a ZMC-a thawktute inpekna fakawm ti

Health Minister Dr. R. Lalthangliana chuan Covid hri len laia ZMC-a thawktute inpekna leh thawhrimna chu fakawm a tih thu sawiin, “An entawn tlak takzet a ni,” a ti.

Serchhip-ah YMA Branch 32 te inelna tur Inter-Branch YMA Football Tournament khelh a ni dawn

Image
Serchhip Sub-Hqrs. YMA buatsaih Inter-Branch YMA Football Tournament chu tun thla ni 25 atang khian Serchhip Sports Complex-ah khelh a ni dawn a, nizan khan he Tournament Kick-Off Programme chu hman a ni a, thla thar November 11, 2022-ah zofel tura ruahman a ni.

Leisekawt Mual-ah Pandal sak hna thawk mek

Image
Kumin November 18-20 chhunga Serchhip in Salvation Army thalai khawmpui lian, India Eastern Territory (IET) Salvation Army Youth (SAY) Congress a thlen tur atan Pandal sak hna chu ngawrh taka thawh mek a ni.

MJA ten DTO an kawm

Image
Mizoram Journalists’ Association (MJA) Serchhip District Member te chu nimin khan Serchhip-a District Transport Officer (DTO) Office-ah lengin DTO nen inkawmna an nei.

Police Commemoration Day

India rama Police an Duty laia hmelma te kut tuara boral te hriatrengna leh zahna hlanna ni, Police Commemoration Day chu Vawiin hian rampumah hman a ni leh dawn a, Serchhip-ah pawh tukin dar 6:30 hian Serchhip Police Station Complex-ah he ni pual hian hun hman a ni ang.

COVID-19 hri kai 2 hmu leh

Serchhip District-ah ni hnih chhung COVID-19 hri kai enkawllai an awm loh hnuah nimin khan hri kai mi pahnih hmuhchhuah leh an ni a, heng hri kai hmuhchhuah te hi Mualcheng khua ve ve niin Serchhip District-ah hri kai enkawllai mi pahnih an awm leh ta a. Serchyhip District atanga COVID-19 hri kai hmuhchhuah tawh zawng zawng pawh 14,607 an tling ta a ni.

NH. 54 helna cheithat tum

Serchhip leh Keitum inkar National Highway-54 laihzauh leh siamthat hna thawh mekah helai kawng hi lirthei hrang hrangte tana kaltlang a harsat thin avangin Sailiamkawn atanga Lengte ram kaltlanga Dawngzawng-a chhuak kawng chu lirthei kaltlang theih tura siamthat a ni dawn nia thudawn a ni a. Hemi atan hian henglai hmuna ram nei te chu an ram chin kawng satfai tura tih niin kawng chhuat siamrem hna hi kawng siam hna thawktu Company ten an thawk dawn a ni.

Online in Learner License

Lirthei khalh tura Driving License mamawhtu te'n awlsam zawka Online kaltlanga an dil theih na tur duanfel niin Adhaar Card bakah Voter ID/Birth Certificate hmang pawhin a dil theih a ni dawn a, he Sotfware hi Oct. 28, 2022 atangin Live-a deploy tawh tur anih avangin Oct. 24, 2022 atangin DTO Office hrang hrangah Offline Mode hmanga Learner License dil thin chu tihtawp rih a ni ang a, Software hi siamfel hman anih chuan thla thar November 1, 2022 atangin mipuite tan Online-in Learner License dilna hi kalpui tan tum a ni a, Learner License dil tur chuan transport.mizoram.gov.in-a online services-ah luh tur a ni ang.

ZPM in Tamdil an tlawh

ZPM hruaitute chuan kumin chhunga cheng nuai 19.72 senga cheithat Tamdil chu nimin khan an Vice President Lalthansanga (Chatea) hovin an tlawh tih sawiin, cheng nuai 19.72 zet sen a ni chungin inkalpawhna Step/Approach alleyway te a khi/khawk nasa em em a, Boat hman theih pakhat mah awm lovin a chhe fai vek bawk a. Cottage/khualbuk pakhat hluihlawn niin pakhat phei chu balcony a khi nasa in hlauhawm hle bawk tih an sawi a, Cafeteria/Hall darthlalang keh te pawh a la awm niin an sawi. Helai hmuna hnathawktu ban a nih hnuah a aiawh turin chawkidar dah a nih thu leh Khualchhawn dah tel a nih loh avangin hnamdang khualzin ten tawng chungchang ah harsatna an tawk tih a taka an hmuh thu an sawi bawk.

MNYF ten thutkhawm nei

MNF Thalai, Mizo National Youth Front (MNYF) Hqrs. chuan nimin khan Aizawl-ah Extended Meeting neiin Mizo thalai leh zirlaite tan tangkai zawka MNYF-in hma a lak theih dan tur te, rampum huap MNF thalai intawh-khawmna Aizawl a buatsaih tum chungchang leh Party tana tangkai zawka MNYF kal chhoh zel dan tur bakah Diamond Jubilee kharna inkhawm neih tur thlirlawkna hun te an hmang a ni. He hun kaihruaitu MNYF President L. Thangmawia chuan kum 2023 inthlanpui neih turah Pathian hruaina a kum 60 chuang mipuite tana lo ding tawh MNF Party chu Pathian in sawrkarna hun a la pek belh ngei dawn niin a sawi a ni.

Hri kai enkawllai 50 awm

Nimin khan Mizoram-ah Sample 244 enfiah niin heng atang hian COVID-19 hri kai mi 13 hmuh belh leh an ni a, Sample enfiah atanga chhutin za zela 5.33 te chuan hri an kai a ni. Nimin khan hri kai enkawl mi 8 te chhuahtir an ni ve leh a, heti hian nimin tlai thleng khan Mizoram-a CO-VID-19 hri kai hmuhchhuah tawh chu 2,38,722 niin an zinga 2,37,949 te enkawl dam an ni tawh a, hri kai zinga za zela 99.68 te enkawl dam ni tawhin hri kai enkawllai mi 50 an la awm a ni.

Career Forum thutkhawm nei

Mizo thalaite Competitive Exam hrang hranga hlawhtlin theih nana din Lunglei District Career Forum chu nimin khan Lunglei DC Conference Hall-ah District Bawrhsap Kulothungan A hovin an thukhawm a, he Forum in a tum ber chu Lunglei thalai te zirna lama hma an sawn theih nan leh inelna lam an tui theih nana Awareness tam zawk pek bakah mithiam ten College leh School hrang hrangah zirtirna pek tum te a nia. Thalai ten State Level Exam hrang hrang an hmachhawn a tling thei khawp chherchhuah leh thalaite heti lama tui te chu an mawmawh te tum sak tum niin he hmalakna a thawhho tlan dan turte sawiho a ni bawk.

PHE-a PE te an lungawi lo

Public Health Engineering (PHE) Department hnuaia Provisional Employee (PE) te chuan an hlawh tur an lak kim lohna (Arrear) chungchang ah a rang thei ang bera pek ve an duh tawh thu tun thla ni 1-a thuchhuah siama an tarlan chu nimin thleng khan pek an la ni lo tih thuchhuah siamin an tarlang leh a. Department dang zawng zawnga PE te chu Arrear hi pek an ni vek tawh thu pawh an thuchhuah ah hian tarlangin, District hrang hranga hruaitute leh Division hrang hrang atanga Member te niminpiah-a Joint Meeting chuan thla thar Nov. 4 ralhma ngeia ngaihtuah saka thuthar lawmawm an hmulo a nih chuan a tul anga hmalak a ni ang an tih thu an thuchhuah ah hian an tarlang bawk.

Champhai-ah Police ten Heroin man tam

Mizoram Police Champhai District-a thawktute chuan niminpiah zing atanga darkar 24 chhungin Khankawn leh Tuipui area huam chhung hmun 3-ah Heroin kg. 5 leh gram 688 zet an man a, heng an ruihhlo man te hi Iternational Market-ah cheng vbc. 28 chuang man niin heng thil kaihhnawih ah hian mi 5 man an ni bawk.

Aizawl Mission Veng kum 125 Exhibition nei tan

Aizawl-a Mission Veng chuan an Veng kum 125-na an lawmna neih mek pualin nimin atang khan Mission Veng Kohhran Gospel Centenary Building-ah ‘Mission Veng 125 Exhibition’ an nei. He Exhibition-ah hian thlalak hlui leh bungraw hlui chi hrang hrang pholan a ni a; thlalak 500 vel leh bungrua 39 phochhuah a ni. He Exhibition hi a duh apiang tan tlawh theih a ni a, tlawh turin Mission Veng khawtlang chuan mi tin an sáwm bawk a ni. Mizoram-a Sap Missionary hmasa Rev. FW. Savidge (Sapupa), Rev. JH Lorraine (Pu Buanga) leh Rev. DE Jones (Zosaphluia) te chu October 23, 1897 khan Thingpuihuan Tlang (MacDonald Hill) atangin tuna Mission Veng-a Banglapui hmunah hian an insuan a, an insuan ní chu Mission Veng din tan ní-ah pawm a ni a. Zosaphluia hi hun rei tak Mission Veng-ah a awm zui a, Sapupa leh Pu Buanga te erawh chuan December 31, 1897 khan Mizoram an chhuahsan thung a ni. Mission Veng kum 125 lawmna hi September 8, 2022 khan hawn a ni a, hawn a nih atangin kawng hrang hrangin an lawm tawh

Vehicle Inspection and Certification Centre sakna turin Minister in lungphum a phum

Transport Minister TJ. Lalnuntluanga chuan nimin khan Hlimen a Transport Department ramah Vehicle Inspection and Certification Centre (I&C Centre) sakna tur lungphum a phum.

'Mizo Tawng Ziah Dan' lehkhabu tlangzarh a ni

Mizoram Board of School Education (MBSE) buatsaih 'Mizo Tawng Ziah Dan' Fourth Edition 2022, (Revised & Enlarged) chu nimin khan School Education Minister Lalchhandama Ralte chuan a tlangzarh.

Aizawl-ah 'College Hmasawnna Hnatlang' neiin inremna neih a nih hnuah zirlaite an tindarh

Mizo Students Union (MSU) huaihawtin nimin khan Aizawl-a Vanapa Hall kawt-ah College zirlai thahnem tak chuan Admission leh Tution Fee sawrkar-a chhunluh duh loh lantirin 'College Hmasawnna Hnatlang' an nei.

Serchhip-ah Vaimim lei mek

Image
Serchhip-a Agriculture Department-a thawk te chuan kumin a kuthnathawktute Vaimim thar an lei tan mek tih sawiin, heng atang hian Ran-chaw siam leh tum a nih thu an sawi.

UD&PA in inzirtirna nei

Image
Serchhip-a UD&PA Department chuan an Department hnuaia Family Oriented SEDP-a tanpuina dawng turte tan nimin khan an Office Conference Hall-ah hnathawh dan tur inzirtirna leh inhrilhhriatna hun an buatsaih a, an Department hnuaiah hian SEDP Trade pali (4) awmin beneficiaries 49 an awm a, an Signature pawh lak sak nghal an ni bawk.

NCC in thisen Unit 22 pe

Image
Govt. Serchhip College-a National Cadet Corps (NCC) te chuan Serchhip District Hospital Blood Bank-a dah turin nimin khan thisen Unit 22 an pe a, thisen petute hi Mipa 15 leh Hmeichhia 7 niin Serchhip Blood bank-ah kalin thisen hi an pe a ni. Nimin-a Govt. Serchhip NCC ten thisen an pek hi NCC Army Wing in kum 75 an tlin lawmna puala pe an ni.

KVK-a thawktu siksawi

Tunhnai khan Mizoram District thenkhata Krishi Vigyan Kendra (KVK) Senior Scientist & Head leh SMS te chu an awmna hmun siksawi a ni a, hemi ang hian KVK Serchhip (North Vanlaiphai)-a Senior Scientist & Head Dr. T. Vanlalngurzauva chu KVK Lunglei (Hnahthial) a awm tura sawn niin KVK Champhai (Khaw-zawl) atangin Dr. Henry Saplalrinliana chu aia awm tura rawn dah a ni a. KVK Serchhip (North Vanlaiphai)-a SMS (Agril. Extention) Vanlalruali pawh KVK Mamit (Lengpui)-a awm tura sawn niin KVK Siaha atangin C. Rachael, SMS (Plant Protection) chu KVK Serchhip (North Vanlaiphai)-a awm tura rawn dah a ni bawk.

COVID-19 hri kai thar awm lo

Nimin khan Serchhip District-ah COVID-19 hri kai hmuhchhuah an awm belh lova, hri kai enkawllai an awm loh avangin ni hnih chhung hri kai enkawllai an awm lo ta a ni. Serchhip District-ah hian hri leng in ziaawm lam a pan rih niin a lang a, Sample enfiah zat pawh tlahniam zelin Sample test-na hmun bik hawn thin pawh tunah chuan kalpui a ni tawh rih lo nia thudawn a ni.

Hri kai enkawllai 45 awm

Nimin khan Mizoram-ah COVID-19 hri kai mi 15 chhinchhiah thar leh awmin nimin khan hri kai enkawllai mi 13 te anmahni enkawlna hmun atanga chhuahtir an ni leh bawk a. Mizoram-ah hri kai enkawllai mi 45 an awm mek a ni. Nimin thleng khan Mizoram-a COVID-19 hri kai hmuh tawh chu 2,38,709 niin an zinga mi 2,37,941 te chu enkawl dam an ni tawh a, hri kai zingah za zela 99.68 te enkawl dam an ni tawh a ni.

Scho pekchhuah thuai duh

PC Party chuan Sawrkar laipuiin Zirlaite Scholarship sum Mizoram sawrkar kuta October ni 4, 2022-a a hlan tawh pekchhuah a nih thuai theih nana chak taka hmalakna kalpui turin thuneitute an phut thu nimin khan thuchhuah siamin an tarlang a. Hamthatna sum kan dawn turte hrek khawtlai sak thin kan nih avanga nawr luih kher ngai sawrkar kan hrawn thin chu khamawm an tih thu an tarlang bawk. 

State Level MSME Summit

Mizoram sawrkar leh Confederation of Indian Industry (CII) te buatsaih ni hnih (2) awh tur State Level MSME Summit chu nimin khan Aizawl a Millenium Centre chung zawl-ah neih tan niin Commerce & Industries Minister Dr. R. Lalthangliana chuan a hawng a, MSME hnuaiah Scheme thar tha tak a lo chhuak tih Minister chuan sawiin, a inkaihhruaina (guidelines) pawh India hmarchhak mil tura siam tura an lo nawr tawh angin an rawn duan thu leh he Scheme thar hnuaiah hian a tui mite tan tih theih thil tha tak tak a awm thu a sawi a. Heng te hi MSME website msme.gov.in/-ah lutin a zirchian theih reng thu pawh sawiin, entrepreneur ten an tih theih tur lo zirchiang sela, theihtawp chhuah an tum a nih phawt chuan sawrkar ang leh Minister a nih ang pawha tanpui a inhuam thu a sawi bawk.

Cancer tam chhan chhui tul ti

Parliamentary Standing Committee on Health and Family Welfare ruat thar hnua thutkhawm hmasa ber chu nimin khan New Delhi-ah neih a ni a, he hunah hian Mizoram Lok Sabha MP C. Lalrosanga chuan Mizoram leh hmarchhak bial State dangah te Cancer natna vei an tam thu sawiin, chiang taka a chhan chhuichhuah leh a invenna lamte inzirtir nasat a tul thu a thlen a. He zirchianna atan hian hma la turin Parliamentary Committee chu a ngen a ni. Lok Sabha MP chuan mithiamte chhui danin rilru lam natna vei pawh Manipur-ah an tam ber laiin Mizoram-ah pawh an tam a ni tih a sawi a. Hetiang enkawlna hmun, Mental Health Institute 47 awmna State te zingah Manipur leh Mizoram an lan ve loh avangin heng State-ah te pawh hian rilru lam natna enkawlna hmun bik din ve ngei turin Sawrkar Laipui a ngen nghal bawk. He thutkhawmna ah hian ram-chhunga hriselna lam thu hrang hrang sawiho a ni. Union Health and Family Welfare Minister Mansukh Mandaviya chuan he hun hi telpuiin he Committee a thu ngaihtuah te leh me

Lunglei-ah Southern Data Centre hawng

Irrigation & Water Resources Deparment changtu Minister C. Lalrinsanga chuan nimin khan Lunglei Chanmari-ah Southern Data Centre cum Executive Engineer's Office a hawng.

Mizoram kuhva thar State pawnah kalpui thei lo

Myanmar kuhva vangin Mizoram a tharchhuah kuhva te chu State pawnah thawnchhuah theih a ni lo a, hei vang hian kuhva huan siama eizawng chhungkaw tam takin harsatna an tawk mek.

Hmasawnna ruhrel bunna thlan uluk a ngai - DM&R Minister

Disaster Management & Rehabilitation Department changtu Minister Lalchamliana chuan hmasawnna tluantling leh rotling nei tur chuan hmasawnna ruhrel bunna hmun thlan uluk leh fimkhur a ngaih thu a sawi.

World Cancer Congress-ah NHM Mizoram hotu tel

Niminpiah (Oct. 18. 2022) atanga Vawiin thleng hian Geneva, Switzerland-ah khawvel pum huap Cancer khawmpui lian 'World Cancer Congress' chu neih niin NHM Mizoram-a Mission Director Dr. Eric Zomawia pawh a tel a ni. World Cancer Congress hi UICC (Union for International Cancer Control, Geneva) huaihawt niin khawvel hmun hrang hrang atangin Cancer lama inhmang delegates 2000 zet an kal a. Dr. Eric Zomawia hi Mizoram Population Based Cancer Registry ah Principal Investigator ni lai a ni a, WHO in Cancer Research buaipui tura a din, International Agency for Research on Cancer ( IARC), Lyon te nen research ti ho mekin an research hi Chhul hmawr (cervix) Cancer venna tura pawimawh leh tha HPV Vaccine chungchang a ni a; Research Paper an tichhuak tawh a, chung an hmuhchhuah zingah chuan HPV Vaccine vawithum pek thin chu vawihnih a tha tawk e tih niin khawvel ram zawng zawngin HPV Vaccine hi vawihnih an pek phah tawh a ni.

Aizawl-a Customs Division hotute ten Governor kawm

Customs Division, Aizawl hotute chuan nimin khan Governor Hari Babu Kambhampati kawmin Customs Division hnathawh dan te, an hmalakna leh harsatna hrang hrangte an hrilh.

CM in Workshop a hawng

Chief Minister Zoramthanga chuan Aizawl Sustainable Urban Transport Project (ASUTP) chungchanga ni khat awh Workshop chu nimin khan a hawng.

Kumin-a hunpui lo thleng turah halpuah leh halmawi hrang hrang khapna kalpui leh dawn

Home Minister hova sawrkar mi pawimawh te nimin-a thukhawm chuan Krismas, Kumthar leh Puja (Diwali leh a dangte) lo thleng turah Halpuah, Halmawi, Silailem mu nei chi leh Sky Lantern khap tlat nise an ti.

Thawktute thahnem ngaihna a zarah AYUSH pawimawhna leh tangkaina kan hmu chho zel - Health Minister

Health Minister Dr. R. Lalthangliana chuan Mizoram-ah thawktu tlemte in thahnemngai taka an thawhna a zarah AYUSH pawimawhna leh tangkaina kan hmu chho zel tih sawiin, Mizoram-a ramhmul damdawi tam tak awm te eizawnna atana hmanga siamchhuah neih belh zel dan ngaihtuaha hmalak nise a duh thu a sawi.

Kumin June 18 hnu lama a vawi khatna atan Serchhip District-ah COVID-19 hri kai enkawllai awm rih lo

Image
Kumin June 18 hnuah Serchhip District-ah COVID-19 hri kai enkawllai an awm lo leh ta a, nimin khan Serchhip District-a COVID-19 hri kai enkawllai mi pakhat chu amah enkawlna hmun atanga chhuahtir niin COVID-19 hri leng hian ziaawm lam a pan zel niin a lang.