Laboratory building sa tan turin ruahmanna siam

Health Minister Dr. R. Lalthangliana chuan Lunglei Civil Hospital compound-ah Laboratory building changtlung tak, RT-PCR khawl pawh dah tel theihna tur sak hna thawk turin hmalak tan a nih thu a sawi.

Nimin-a SAD Conference Hall-a Contact Tracing chungchang sawihona ah he thu hi sawiin Health Minister Dr. R. Lalthangliana chuan Lunglei Civil Hospital Compound-ah Laboratory changtlung tak, Mizoram chhim lam District pali ten tangkai taka an hman theih tur sak tumin sawrkarin cheng nuai 781 man DPR a siam tih a sawi a, Chief Minister Zoramthanga’n D.O letter nen NEC leh DoNER Ministry ah a umzui bakah amah ngei pawhin a chhu zui reng tih sawiin, he Laboratory sakna tur hi engtikah nge kan hmuh theih dawn tih a la hriat chiah rih loh laiin Chief Minister hmalakna leh thahnemngaihna zarah Mizoram sawrkar chuan a building sak hna tan nghal turin ruahmanna kan lo siam fel tawh a ni, a ti a. Laboratory building sakna tur hmunhma leh a building sak dan tur drawing ruahman sa vek ni tawhin Architect leh Engineer ten hma an la nghal a ni, a ti bawk.

Health Minister chuan Laboratory building changtlung tak a awm chuan natna hmuhchhuah hma kawnga Mizoram chhim lamin harsatna tam tak kan tawhte kan sukiang thei dawn tih sawiin, Chief Minister in ruahmanna a siam hi a lawmawm takzet a ni, a ti bawk.