Latest News

Development-a thuthluang tur an ni lo tih sawi

MNF Party chuan Covid hripui leng karah pawh Sawrkar chu Development hnathawh ah a thuthluang mai tur a ni lo tih an sawi.

Nimin a thuchhuah an siamah MNF Party chuan khawvel pum huapin COVID- 19 hripui lengin ram zawng zawng a tibuai a, harsatna namenlo a thlen mek tih an sawi a. Lockdown boruak karah pawl thenkhat leh mi thenkhat ten, sawrkarin ram hmasawnna tura a hmalakna tihthuanawp tuma sawi sawpin, a beidawng zawnga mipuite zirtirna thu an thehdarh chiam chiam niin an sawi a. “Development Board-te thiat vek mai tur tih te, kan Subordinate Service Board (MSSSB) thiat mai tur tih te, Raw chi supply Tender pawh thiata tihtawp vek mai tur tih te, hmanna tur bik awm thil danga hman thianglo pawhpen theih loh han che hlek ti lo tura inkhapbeh tumna te leh sawrkar che thei lova siam tum ang hrima a eng akima tihmualpho tumna ang hrima thu thehdarh a tam ta hle,” an ti.

MNF Party chuan hripui leng karah pawh nise, kan ram roreltu sawrkar chuan hripui do hneh dan tur pawh ngaihtuahin, a remchang thei apiangah ram development hna pawh a thawk tel zel tur a ni tih chu an ngaihdan a ni tih an sawi a. State dangte pawhin harsatna karah a theih ang anga thawkin an bei hram hramin Sawrkar laipui pawhin a theih ang ang hmasawnna hna thawh zel tumin hma a la hram hram zel a ni tih hriain, thenawm ramte mit hmuhah beidawng hmel kan put loh nan ngaihtuahna puitling tak nen inlungrualin hma i la zel zawk ang u, an ti bawk.

Comments

Chhiar Hlawhte