Latest News

World Environment Day denchhenin Thenzawl DFO huamchhung ah thingtiak phun

Inrinni kalta June 5 khan khawvel pumah ‘World Environment Day’ hman a ni a, Serchhip District-ah pawh hmun hrang hrangah he ni pual hian hun hman niin Thenzawl Forest Division huamchhung hmun hrang hrangah he ni pual hian thingtiak phun a ni.


Kumin-a World Environment Day-ah hian thupui (theme) atan 'Ecosystem Restoration' tih chu hman a ni a, Thenzawl DFO hnuaia Range hrang hrangte chuan anmahni huamchhung theuh ah thingtiak phunna hun atan hmangin Thenzawl DFO Complex-a hun hmanna ah Margareth Lalramchhani, DFO Thenzawl chuan kumin-a he ni thupui hian khawvel-a thilnung hrang hrang te kan in mamawh tawnna (ecological Balance)-ah a chhe lai bik awm siamtha tura hmalak chu a tum bulpui a ni tih a sawi a, hemi kawngah hian thingtiak phun chu a pawimawh thu a sawi bawk.

World Environment Day pual hian Thenzawl DFO Office-a thawktute chuan an Complex-ah thingtiak an phun bakah Serchhip Range chuan Thenzawl leh Serchhip inkar kawngpui kamah thingtiak an phun a. Buarpui, Mual-thuam leh Chhingchhip Range te pawhin an huamchhung ah thingtiak hi an phun bawk.

World Environment Day hi kum 1974 khan khawvel pumah hman tan a ni a. He ni hi kumtin khawvel ram hrang hrangah thing leh mau hlut zia leh tangkai zia hriatchhuah lehna ni atan te, ramngaw enkawl leh chhawr tangkai dan inzirtirna ni atan te, thing phun ni atan leh, mihring leh nungcha te tana ramngaw tangkaina leh pawimawh zia inzirtirna ni atan te hman thin a ni.

World Environment Day pual hian Mizoram-a Horticulture College awmchhun, Central Agricultural University, Imphal hnuaia mi Thenzawl Vengthar-a College of Horticulture-a Zirtirtu, Staff leh zirlaite pawhin hun hmangin, an College Compound-ah thingtiak an phun bawk a, Forest Department atanga an hmuh thingtiak chi hrang hrang an phun bakah tlai lamah World Environment Day pual hian Google Meet (Virtual meeting) neiin, Thenzawl Forest Division-a DFO, Margareth Lalramchhani chuan telpuiin thu a sawi a. College of Horticulture, Thenzawl-a zirlaite puala Banner siam leh Mobile Photography Competition an siam lawmman semna Assistant Professor, R. Lalrinfeli'n a hmang bawk a ni.

Comments

Popular News (Last 30 Days)