BJP in Coronavirus do dan tur a ni lo tih sawi

BJP Mizoram Pradesh chuan mipuite pawisa thawh leh tha leh zung thawh tura phuta mipui chanvo awmchhun tura Party mi leh sa in vulh bik chu Coronavirus do dan tur a ni lo tih an sawi.

Nimin a thuchhuah an siamah BJP Mizoram Pradesh chuan Covid-19 hripui 1st Wave leh 2nd Wave leng mek karah Central sawrkar chuan State tin sawrkarte sum leh pai, damdawi leh bungrua tinreng thleibik neilovin a tanpui tih an sawi a. Heti chunga Mizoram State sawrkarin Mizo mipuite hripui leng min hmachhawnpui danah Lockdown hmanga mipui khung leh hrek behna ringawt hmachhuanna chu WHO, Union Home Ministry, Union Health Ministry leh Indian Council of Medical Research (ICMR) Operational Guideline kalhmang a nih loh thu leh Mizoram sawrkar chu mithiam (Expert) te leh mipuite thawhhopui theih tura inherrem vat a tul nia an hriat thu an sawi a. Tuna mipuite pawisa thawh leh tha leh zung thawh tura phut a, mipui chanvo awmchhun tura Party mi leh sa in vulh bik chu Coronavirus do dan tur a ni lo, an ti a ni.

MNF sawrkar chuan Covid hrileng kum khat hnuah Budget vawi thumna a pass tih pawh sawiin, hripui dona kawng nilo-a State sum leh pai khawhralna te kalpui tawhlo tur leh State dang te tih angin Budget Re-Apropriate turin sawrkar chu thurawn an pe bawk.