Latest News

Chuhvel Thlam-ah ramri kan in Assam Police an kal

Mamit District chhunga Chuhvel leilet-a Thlam awm chu ngaimawhin nimin khan Assam Police te chuan Mizoram chhung an lut.

Tunkar tir, Thawhtanni khan Assam Police panga leh Civil mi 15 velin Chuhvel rama John Sapdinpuia Halliday leilet Thlam sak chu ngaimawhin an lo tlawh tawh a. Hemi tum hian buaina engmah siam lovin Assam ramri chinah Patrolling an neih thu an sawi a. Hei hi hriaiin Mamit DC, Dr. Lalrozama leh SP te chuan helai hmun hi an tlawh ve nghal bawk a ni.

Nimin khan ASI hovin Assam Police 10 vel chuan leilet Thlam hi tlawh lehin, Assam lam hi an thawk rip hle nia hriat a nih avangin Mamit District Bawrhsap, Dr. Lalrozama chuan hma a la nghal a. Karimganj DC leh SP te bepawpin hemi chungchang hi a sawipui nghal a. A tul ang zela ramri venhim hna kalpui nghal a nih thu Mamit atanga thudawnna chuan a sawi a. Mamit District Bawrhsap Dr. Lalrozama hmalakna in helai hmun hi Mizoram sipaite hian an awmchilh rih dawn niin thudawnna chuan a sawi bawk.

Mamit District Bawrhsap, Dr. Lalro-zama chuan Chuhvel khawtlang in Police te awmna tur chu nimin khan hnatlangin an sa tih a sawi a. Helai hmuna boruak awm mek hi Kawrthah SDO (Civil) leh Police hotuten an thithlai reng tih a sawi a. Mipuite chu chi-ai lo turin leh sawrkar hmalakna ngaichang tura ngenin, Hailakandi DC pawh lehkha a thawn tawh bawk a ni.

Leilet neitu John Sapdinpuia Halliday chuan, Assam Police te'n leilet an thlen rual deuh-thawha Mizoram ramri vengtu sipaite an lo thlen ve chiah avangin tui an in a, an kal leh nghal tih sawiin, tui in tur ringawta lokal an nih a rin loh thu a sawi a. Mi 10 bak hi chu a piah deuh ah an awm tih sawiin, engzat chiah nge lokal tih erawh a a hriat loh thu a sawi bawk.

Comments

Chhiar Hlawhte