Latest News

ASF vanga Vawk thi an awm zel avangin MLA Fund atangin Vawk phumna tur laih a ni

Serchhip District-ah African Swine Fever (ASF) hri leng avanga Vawk thi an la awm belh zel a, hei vang hian Bialtu MLA, Lalduhoma’n MLA Fund a ruahman atangin Vawk phumna tur nimin khan laih a ni.


Serchhip-a AH&Vety Department chhinchhiahna atanga a lan danin nimin-a Report-ah Serchhip District-a ASF hri lenna hmunah Vawk thi 28 lai a awm belh leh a, heng Vawk thi zinga 19 te hi Thenzawl ami niin New Serchhip leh P&E Veng-ah Vawk pathum ve ve a thi leh bawk a, Chhiahtlang-ah Vawk pahnih thiin Keitum-ah Vawk pakhat a thih belh leh bawk a ni. Heti hian Serchhip District-a ASF hri lenna hmuna Vawk thi chu 572 ni tawhin Vawk thi tamna ber New Serchhip-ah Vawk 233 a thi tawh a, Serchhip P&E Veng-ah 124, Thenzawl-ah 89, Chhiahtlang-ah 93, East Lungdar-ah 51, Keitum-ah 11 a thi tawh a ni.

Hetihlai hian ASF hri lenna hmun-a la puan loh ah pawh Vawk thi hi la awm belh zelin nimin report-ah Vawk thi 35 lai chhinchhiah thar a awm leh a, Serchhip Kawnpui North Area ah Vawk thi 15 lai awm lehin Field Veng-ah 6 lai a awm bawk a, Chhing-chhip Mualpui-ah pawh Vawk thi 8 lai a awm leh bawk a ni. Heti hian Serchhip District chhunga khaw 22-ah chhan hriatloh a Vawk thi 182 lai a awm tawh a ni.

Hetianga Serchhip District-a ASF hri leng avanga Vawk an thih belh zel avang leh Vawk thi te hi damdawi nen-a sawngbawl hnuah phum tura tih a nih avangin bialtu MLA, Lalduhoma chuan MLA Fund atanga Rs. 50,000/- pe in Vawk phumna tur hmun neilo te tana Vawk phumna tur hi nimin khan Mualvawm-a AH&Vety Department ram, Slaughter House awmna ah laih a ni a. Tunhnaia AH&Vety Department leh Town chhunga VC aiawhte thukhawm chuan Vawk thi te hi Vawk neitute ram-ah phum tura tiin ram neilo tan VC in ruahmanna siamin, VC in hmun remchang an neilo a nih chuan Slaughter House ram-ah hian phum turin ruahmanna an lo siam tawh a. Hemi ang hian helai hmunah hian Vawk thi 11 phum a ni tawh tih Serchhip CVO, Thangzadinga chuan sawiin, tunah hian Vawk thi hi ziaawm chho mai tura an beisei thu leh chuti ni lova Vawk hi ala thih belh zel a nih chuan a tul angin Vawk phumna tur hi laih zel a nih tur thu a sawi a, nimin khan Vawk thi phumna tur khur 21 chu laih a ni.

Comments

Popular News (Last 30 Days)