Mizoram-ah hri kai mi 312 hmuh belh leh an ni; Nimin ah nunna chan mi 4 an awm

Mizoram-ah COVID-19 hri kai thar an la pung chho mek zel a, niminpiah khan Sample 3933 enfiah niin hri kai 312 hmuhchhuah an ni.

Niminpiah khan ZMC Laboratory-ah Sample 1489 enfiah niin heng atang hian hri kai mi 47 hmuhchhuah an ni a, hri kai hmuhchhuah te hi taksa-a hri kai lanchhuahna neilo hlir an ni. Heng hri kai hmuhchhuah te hi Aizawl Veng hrang hrang ami te niin hri kai tawh nen inkawmhnaihna neih avanga In lama inkhunghrang te an ni hlawm.

Niminpiah khan District hrang hranga TrueNat Laboratory-ah Sample 183 enfiah niin hri kai 4 hmuhchhuah an ni a, an vai hian taksa a hri kai lanchhuahna neilo niin Siaha District-ah hri kaina hriatloh mi 2 hmuh an ni a, Lunglei-ah hri kai awmpuitu pakhat chuan hri a kai tih hmuh niin Serchhip District-a Thenzawl-ah hri kai pakhat hmuh a ni bawk.

Rapid Antigen Test hmangin niminpiah khan Sample 2261 enfiah ni bawkin hri kai 261 zet hmuhchhuah an ni a, an zinga mi 150 chu Aizawl District ami an ni. Aizawl District atang hian Sairang-ah hri kai mi 42 hmuh niin Aizawl Saron Veng-ah hri kai mi 36 zet hmuh an ni bawk. Lawngtlai District-ah hri kai mi 56 hmuhchhuah ni bawkin an zinga 38 te chu Kamalanagar-II an ni a, Kamalanagar-I ah hri kai mi 11 hmuh an ni bawk. Lunglei District-ah hri kai mi 27 hmuh ni bawkin Kolasib District-ah hri kai mi 15 hmuh an ni a, Siaha District-ah hri kai 5, Saitual District-ah hri kai mi 3 leh Mamit leh Serchhip District-ah mi 2 ve ve bakah Khawzawl District-ah hri kai mi pakhat hmuh a ni bawk.

Heti hian nimin thleng khan Mizoram-a COVID-19 hri kai hmuh chu 12,399 an tling ta a, nimin khan hri kai mi 133 te enkawl dam leh niin heti hian nizan thlenga Mizoram-a hri kai hmuhchhuah zingah 9347 te chu enkawl dam an ni tawh a, hei hi hri kai hmuhchhuah atangin zaa 75.38 niin tunah hian hri kai enkawllai 3009 an la awm mek a ni.

Nimin-ah hri kai mi 4 boral an awm leh :

Mizoram-a COVID-19 hri kai hmuhchhuah zing ah nimin khan nunna chan mi pali lai awm lehin Mizoram-a hri kai zingah nunna chan mi 44 an awm ta. Nimin zing dar 7:20 khan R. Lalduhzuala (40), Lungdai chu ZMC-ah a boral a, amah hi 4th IR mi leh sa niin West Bengal inthlanna a duty kha a ni a, April 27 khan hri a kai tih hmuhchhuah a ni. Nimin tlai dar 4:25 khan Vanlalvuana (65), Chhingchhip chu ZMC-ah a boral leh bawk a, May 17 khan Serchhip District-ah hri kai hmuhchhuah niin ZMC-a refer a ni a, Serchhip District atanga hri kai hmuh zingah mi 3 an boral ta a ni. Nizan dar 8:30 khan Hauhnuna (76), Electric Veng Aizawl chu ZMC-ah a boral ve leh a, May 8-a hri kai hmuhchhuah a. Nizan dar 10:40 khan H. Vala (76), Ex-Servicemen, Tuithiang Aizawl chu ZMC-ah boral ve lehin May 16-a hri kai hmuhchhuah a ni.