MLA Fund hmangin Mat phai ah kawng siam

Serchhip Mat phai, Chawm kai atanga Taipuia Leilet inkar kawng chhia siamthat hna chu tunlai hian Bialtu MLA in MLA Fund a pek hmangin thawh mek a ni.

Serchhip Agriculture & Horticulture Cooperative Society hruaitute hnen atanga thu kan dawn danin tuna kawng an siam mek hi Chawm Kai atanga Serchhip Mat phai, Tuisen, Chamdur, Thinglubul leh Zote South khua te panna kawng niin Mat phai-a kawngpui lun ber te zing ami a ni a, he kawng hi anmahni Society ten enkawl berin Fur-ah chuan kawng a diak avangin 4 wheel (4X4) te tan lo chuan kal hleihtheih a ni lova, Thal-ah JCB hmanga siamthat leh a ngai thin thung a. Hei vang hian bialtu MLA hnenah hian MLA Fund dilin cheng nuai 1.5 a pe a, hemi hmang hian kawng siam-that hna hi an thawk a ni.

Serchhip Agriculture & Horticulture Cooperative Society hruaitute chuan niminpiah khan JCB 2 leh Tipper 7 hmangin mihring 40 vel kawng siam hian an hnatlang tih sawiin, nimin ah JCB pakhat leh Tipper 4 hmangin mi 10 vel an hnatlang leh tih an sawi a, heng JCB hmang hian Mat lui-a Tiau lung (GSB) lain kawng-ah hian chhungin kawng hi KM 1 chuang zet a ni tih an sawi a, he kawng hi tunhma pawhin siamthat hna an lo thawh tawh thin thu leh tun anga an beih nasat erawh ala awm ngailo tih an sawi a, hetianga bialtu MLA in hma a lak sak chu an lawm hle tih sawiin, he kawng an siam hi an zawhfel hunah chuan Fur-ah pawh lirthei tan kal harsa tawh lo tura an beisei thu an sawi bawk.