Dy. Speaker in Chhingchhip 4C tlawhin tanpuina a sem

Tuikum bialtu MLA leh Assembly Deputy Speaker, Er. Lalrinawma chuan nimin khan Chhing-chhip khua a COVID-19 hri kai te enkawlna hmun, Community Covid Care Centre (4C) chu tlawhin VLTF te hnenah Disinfection Fogger Machine a hlan bawk.

Assembly Deputy Speaker chuan Covid hrik hi hriatthiam harsa tak a ni tih sawiin, hri kai te nena inkawmhnai tak pawh hri kaichhawng lo an awm laiin fimkhur em em te pawhin an lo kai ve reng thei tih a sawi a, hei vang hian hri kai nia inringhlel te chuan thuneitute hnenah in hriattir vat-a Sample enfiah nghal vat a pawimawh thu a sawi a. COVID-19 hri kai te chu enkawl har chuan natna hlauhawm tak a nih theih rualin enkawl vat a nih erawh chuan awlsam taka enkawl dam theih nia a hriat thu a sawi a, hri leng avanga phili buai mai lovin fimkhur tak chunga hlauh dan tawk hriat a pawimawh thu a sawi bawk.

Er. Lalrinawma chuan, Chhingchhip-a 4C chu an tihthat avangin chhuanawm a tih thu sawiin, Mizoram mai ni lovin India ram huap pawha chhuan tlak a nih thu leh, DONER Minister Dr. Jitendra Singh pawhin Chhingchhip 4C chungchang hi twitter-ah a lo tweet hial tawh tih a sawi a, hei hi khawtlang thawhhona that vang te, Task Force leh thawktute pawimawh hrang hrangte tanrualna leh inpekna vang a nih thu a sawi bawk.

Tuikum bialtu MLA hian Chhingchhip-a 4C din nan hian Rs. 70,000/- a lo pek tawh bakah PHC-ah Rs. 30,000/- a pe tawh bawk. Hei bakah hian a bial chhunga Rullam, Thinglian, Ngentiang leh Lungpho lama 4C dinna turin nimin vek khan Rs. 70,000/- a pe leh bawk a ni.

Chhingchhip 4C-ah hian khum 51 a awm a, hri vei enkawl lai mi 24 awmin an zinga 19 hi hnamdang an ni a, helai hmuna enkawl te zingah mi 27 te chu hri lakah fihlimin chhuahtir an lo ni tawh bawk a ni.