Latest News

Central Jail-a hri leng chungchang sawiho a ni

Tunhnaia Central Jail-a tang zinga COVID-19 hri kai hmuh belh an nih chungchang leh Jail tang te himna tur chungchang chu nimin khan Home Minister, Lalchamliana hovin sawiho a ni.

Home Minister Pisa-a he sawihona hun tarlan a nih danin Central Jail-ah hian COVID-19 result hriat hnuhnun ber, June 22 khan mi 105 hri vei hmuh belh an ni a, tun dinhmunah COVID-19 hri kai 141 awm mekin CCC awmsa bakah Ward remchangah CCC siambelhin inkhunghran a ni a. COVID-19 kai awm mek te uluk zawka vil an nih theihna turin viltu tur thawktu dah belh tura hma lak ni se tih a ni bawk.

Hei bakah hian Central Jail a COVID-19 dinhmun report hi nitin siam ni se tiin rel a ni a. CCC siam belhna atan leh hri darh zel tur venna atana mamawh te chhut chhuakin Finance Department atanga dawn tawh baka mamawh hrang hrang atana senso tul SDRF atanga pek theih chi te rang taka ngaihtuah a nih theihna turin hmalak nghal tur a ni.

He hunah hian Health Department lam aiawha tel ten Central Jail a tang awm mekte zingah COVID-19 avanga damlohna ti zual thei Zunthlum leh natna khirh hrang hrang vei sa an awm em tih zirchian a tul thu an sawi a, chutiang mite tan chuan damdawi leh chawtha mamawh hrang hrangte ngaihtuah sak tum a ni a. Hei bakah hian Psychologist Association lam te be rawnin tang zinga hri veite thlamuan turin hma lak tum a ni bawk.

Comments

Chhiar Hlawhte