Lenkawl

Mizoram Governor Hari Babu Kambhampati leh Lady Governor Jayasree Kambhampati te chuan zan khat riakin Serchhip an rawn tlawh mek a, nimin khan Sawrkar Department hotute kawmin, Project thenkhatte thawh chhung a rei lutuk thin leh a thawh hun chhung pawhsei a ni fo thin chu thil fel lo tak a ni, a ti.

Serchhip-a District Horticulture Office chuan nimin atang khan an Department hnuaia Family Oriented SEDP kaltlanga tanpuina dawng turte hnenah sum an pechhuak tan.

Thenzawl Zone Football Association (TZFA) buatsaih ‘MLA Cup 2022’ chu karleh Thawhtanni khian khelh tan a ni dawn a, Team 10 te an intihsiak dawn a ni.

North Vanlaiphai Police te chuan nizan hmasa khan Kuhvarah ro quintal 97 manin nimin khan Lunglei-a Custom Preventive Force te kut-ah hlan tura thawn a ni.

Synod Information & Publicity Department leh Central KTP te tangdun in Branch KTP Malzai intihsiakna an buatsaih, ‘Praise On Solo Competition’ chu nimin khan Serchhip District tan Elimination Round neih a ni.

Serchhip-a rawn zin mek Mizoram Governor Hari Babu Kambhampati chuan nimin tlai khan Serchhip DC Meeting Hall-ah Serchhip-a Kohhran hruaitute, tlawmngai pawl hrang hrang hruaitute, Political Party hrang hrang hruaitute leh Serchhip Joint VC te bakah MJA Serchhip District Member te chu a hrang theuhin a kawm a. Heng pawl hrang hrangte hian Governor hnenah hian Serchhip khawtlang tana an ngaih pawimawh thil hrang hrangte lo thlenin, heng zingah hian Nursing School la hawn loh chungchang chu a langsar zingah a tel a, Zawlpui phai-a leilet nei te harsatna te, Eklavya Model Residential School leh JNV bakah Hoticulture College ten harsatna an tawh te pawh lo thlen a ni bawk.

Serchhip District Bawrhsap chuan Tualchher Silai siam chhuah chu Arms Rules, 2016-a ziak angin khap bur a ni tih a sawi.

Nizan hmasa dar 11:00 vel khan Malsawm-tluanga (23), Chhiahtlang Kawn Veng chu New Serchhip-a lirthei chetsualna ah a boral. R. Lalrohlua (JE, PWD) fapa Malsawmtluanga hi nizan hmasa khan a thianpa nen Serchhip a khawhar In ah an kal a, an haw lam Kikawn an thlen hnuah an thil theihnghilh pe tura a tlan let leh chu New Serchhip Sihphir Veng-a Zohmingi te In kawt-a Balu chhunvum chu suin a hmaa 709 Truck ding hnung lamah a va insawh niin a lang a, Mercy Hospital panpui nghal niin Doctor an awm loh avangin District Hospital panpui leh a ni a, kawng lakah a boral hman nia thudawn a ni. A ruang hi lumen a nih hnuah nimin khan vuiliam a ni.

Serchhip District-ah COVID-19 hri kai pung leh hretin nimin tlai thlengin hri kai enkawllai mi 9 an awm. Nimin khan Serchhip District-ah COVID-19 hri kai mi 7 lai hmuh belh leh an ni a, heng hri kai hmuhchhuah zinga mi 6 te hi Then-zawl khua niin midang pakhat hi Khawlailung khua a ni thung. Nimin khan Serchhip District-ah COVID-19 hri kai enkawl dam an awm belh lova, heti hian nimin tlai thlenga Serchhip District-a COVID-19 hri kai hmuhchhuah tawh zat chu 14,591 niin an zinga 14,546 te chu enkawl dam an ni tawh a, hri kai zinga za zela 99.69 te enkawl dam ni tawhin hri kai enkawllai mi 9 an awm a ni.

Mizoram Government (Lumpsum) Aided School Association (MIGASA) chuan nimin khan Aizawl-a MZP Conference Hall-ah General Assembly vawi 5-na hmangin kum 2008-a MNF sawrkar in Lumpsum Grant in Aid-a a hlankai Middle School leh High School te Adhoc Aided-a hlangkai tura sawrkar an ngen thu Resolution siamin an pass a ni.

Ministry of Development of North Eastern Region (MDONER) Parliamentary Consultative Committee thutkhawm chu nimin khan New Delhi-ah neih niin he hunah hian Mizoram Lok Sabha MP C. Lalrosanga chuan Mizoram in thlawhna tumhmun pakhat chauh a neih chu a tawk lo tih sawiin, Tourism leh kawng danga hmasawn nan Mizoram khawchhak leh chhim lama thlawhna tumhmun neih ngei a tul a ni, a ti a. Hei bakah hian Mizoram chhim lam thlenga Rel kawng phah turin Railways hotute a ngen bawk a, hemi kawnga hma lo lak tawhte tharthawh leh turin Railway Board aiawhte a ngen bakah Mizoram khawchhak lama pipute sulhnu humhalh chunga zinmite tana tlawhpawh theihna tur ruahmanna siam a rawt bawk.

Mizoram Sub-Committee on Draft Mizo-ram River Protection Bill chu nimin khan Agriculture Minister C. Lalrinsanga hovin a Pisa-ah an thukhawm a, he hunah hian Minister chuan Dan siam chu a namai loh thu sawiin, The Mizoram (Protection of Rivers) Bill, 2022 tur duanah pawh hian dan leh hrai awmsa dal palh thei ennawn leh belh ngai leh paih ngai a la awm theih thu a sawi a, kan ram chhunga awm, lui leh a chhehvel humhalh chu kan tih makmawh a ni tih sawiin, India ram Danpui- Preamble, Fundamental Duties leh Directive Principles of State Policies ah te chiang takin kan ram leilung chenna humhalh hi kan mawhphurhna a ni tih a sawi bawk. He Bill hi Vawiin hian Deputy Chief Minister Tawnluia hova rel turin chhawpchhuah tura ruahman a ni.

Mizoram-a COVD-19 hri leng dinhmun chuan ziaawm lam a pan ve zel a, nimin tlai thlengin hri kai enkawllai mi 164 an la awm.

National Vector Borne Disease Control Programme (NVBDCP) leh State 10-a Health & Family Welfare Department te chuan ni 3 awh tur Regional Review Meeting (RRM) chu nimin khan Assembly Annex Conference Hall, Aizawl-ah an nei tan.

Serchhip Mat Phai-a Buh hmun zau tak chu tunhnaiah Sazu puang ni ngeia hriat ten an seh chhia a, hei vang hian nimin khan Serchhip-a Agriculture Department bultumin Tur hmanga Sazu hrai dan inzirtirna neiin Zawlpui-ah Sazu hrai runpui neih a ni.

Agriculture Technology Management Agency (ATMA) Serchhip District hmalakna in nimin khan East Lungdar-ah Panhnah chin dan chungchang zirhona neih a ni a, he hunah hian ATMA atangin mithiam te chuan Panhnah chi tha thlan dan te, a hnah pakhat atanga a chi siamchhuah dan te, awlsam leh tangkai zawka a zamna siam dan te zirho niin C. Lalchung-nunga Green House-ah a chichhuah turin Nursery Polypot buatsaihin inzirtirna an neih nghal bawk a ni. He hunah hian ATMA mithiam te chuan Panhnah enkawl lamah a changtu Department an awm mumal rih loh avangin an tan ATMA chu an awm reng thu an sawi a ni.

Mizoram Governor Dr. Hari Babu Kambhampati chuan zan khat riak turin Vawiin hian Serchhip District a rawn tlawh dawn. Governor hian Vawiin hian Serchhip hi rawn thlengin chawhnu dar 2:00 hian Serchhip DC Conference Hall-ah Serchhip-a sawrkar Department hotute a kawm nghal dawn a, he hunah hian Serchhip District dinhmun lo hrilh a nih dawn bakah sawrkar laipui Scheme hrang hranga hmalakna chungchang Official te a sawipui dawn a, hemi hnu hian Kohhran hruaitu, tlawmngai pawl aiawh, Political party hrang hrang hruaitute leh VC te bakah MJA te nen inkawmna an nei zui ang. Larsap hi Serchhip-ah riakin naktuk-ah Sainik School a tlawh dawn bawkah sawrkar laipui Scheme hmanga hnathawh te leh hamthatna dawngtute pawh a kawm nghal dawn bawk a ni.

Serchhip Police te chuan nizan hmasa khan New Serchhip Heroin No. 4 Hawng 5 an man.

Serchhip District Jail Inspection Team te chuan nimin khan Serchhip District Jail tlawhin kum tlinglo tang an awm leh awm loh an enfiah.

Serchhip District Police ten ruihhlo an man sa Heroin No. 4 zinga gram 566.44 te chu tunkar Thawhtanni khan Serchhip District Drugs Disposal Committee chuan an halral.

Nimin tlai thleng khan Serchhip District-ah COVID-19 hri kai enkawllai mi 2 an la awm.

Sawrkar laipui chuan Pradhan Mantri Garib Kalyan Anna Yojana (PM-GKAY) a kalpui mek thu thla thum (3) dang atan a pawtsei leh tih nimin khan Union I&B Minister Anurag Thakura chuan a sawi a, he ruahmanna hnuaiah hian AAY (Ration Card eng) leh PHH (Ration Card pawl) Beneficiary te tan Buhfai mi pakhat zelah thla khat atan Kg. 5 zel a thlawn a sem thin a ni. Union Minister chuan thla thum lo awm tur chhungin PM-GKAY scheme atan hian cheng vbc. 44,762 senral a ni ang tih sawiin, ramchhungah he Scheme dawngtu hi mi vbc. 80 dawn an awm thu a sawi a. Kum 2020 April thla atangin he Scheme hi kalpui a nih thu a sawi bawk a ni.

Sawrkar laipuiin ram pum huap ruihhlo do beihpui thlak a kalpui tur ‘Nasha Mukt Bharat Abhiyaan 2.0’ chu nimin khan Govt. Lawngtlai College-ah Excise & Narcotics Minister Dr. K. Beichhua chuan a hawng a, he hmalakna hi kum 2021 atanga kalpui a nih thu sawiin, Lunglei, Lawngtlai leh Mamit District-ah te he hmalakna hi kalpui a nih thu a sawi a, heng District khawpui ah te hian Bawrhsap Chairman-na hnuaiah Ruih-hlo Do Committee din vek a nih tur thu sawiin, Committee-ah chuan official-te bakah, tlawm-ngai pawl hrang hrang leh kohhran ai awhte an tel tur thu a sawi bawk. He hmalakna pual hian Lawngtlai District-a Sawrkar office leh zirna In-ah te ruihhlo laka fihlim tur leh do tura intiamna (pledge) sawirual a ni bawk.

Mizoram-ah nimin tlai thleng khan COVID-19 hri kai enkawllai mi 182 an la awm.

Disaster Management Act tlawhchhana Mizoram-a COVID-19 inkaihhruaina hman mek chu thiah a ni ta.

Mizoram sawrkar-a UD&PA Department chuan thuchhuah siamin Aizawl New Market sak that tur chungchang chu an sawifiah.

Mizoram Governor Hari Babu Kambhampati chuan Performance Grading Index (PGI) tihchhuah hnuhnung bera Mizoram District thenkhat dinhmun tha lo chungchang leh tanlak ngai lai te nimin khan School Education Department Official te a sawipui.

Serchhip District Women Football Championship-2022 nimin-a khelh zawh takah Hmar Veng FC chuan Vengchung FC chu 3-2 a hnehin an champion ta.

Serchhip-a Excise and Narcotics Department chuan kumin chhunga Rakzu an man litre 800 chuang chu nimin khan an tichhia.

Serchhip khawpui chhunga Ek In sakna leh thawmthatna dawngtute hnenah nimin khan tanpuina thawh hnihna semchhuah a ni.

Serchhip Zawlpui vel-a Buh hmun chu Sazu in tunhnai khan a seh tan nia hriat niin nimin khan Agriculture Department hotute chuan an tlawh a, Vawiin hian Tur hmanga Sazu hrai runpui nei turin ruahmanna siam a ni.

Nimin tlai thleng khan Serchhip District-ah COVID-19 hri kai enkawllai mi 6 an awm. Nimin khaan Serchhip District-ah COVID-19 hri kai mi pakhat hmuh belh leh a ni a, hri kai hmuh thar hi Thenzawl khua niin Serchhip District-a COVID-19 hri kai zingah nimin-ah enkawl dam an awm belh lo thung a ni. Nimin tlai thleng khan Serchhip District-a COVID-19 hri kai hmuh tawh chu 14,583 niin an zinga 14,541 chu enkawl dam an ni tawh a, hri kai zinga za zela 99.72 te enkawl dam ni tawhin hri kai enkawllai mi 6 an la awm a, heng te hi Khawlailung-ah 3, Zote South-ah 2 leh Thenzawl-ah mi pakhat te an ni a, hri kai zingah mi 36 an boral tawh bawk.

AH&Vety Minister Dr. K. Beichhua chuan Lunglei District chhunga Lungpuizawl AH & Vety Farm chu nimin khan tlawhin Ar note awpkeu tura hmalakna kal mek te a enpui a, Lungpuizawl AH&Vety Farm-ah hian Ar note 5000 (rainbow rooster) awp keu turin hmalak mek a ni a. Heng Ar note te hi October ni 1, 2022-ah keu hman tura beisei niin he Farm-a Ar awpkeuna khawl hian ni 21 chhungin Ar note 5000 a awp keu thei a ni. Lungpuizawl Farm-a Ar awpkeuna leh Broiler Ar vulhna hi kum 2017-18 ah NABARD RIDF atanga cheng nuai 519.25 hmuh atanga sak a ni a, Aarkon Infrastructure, Uttar Pradesh ten a sak hna hi an thawk a ni.

Lunglei Municipal Council (LMC) inthlan lo awm tur thlir chungin BJP Mizoram chuan nimin khan Lunglei Venglai-a Election Kick-Off an nei a, he hunah hian BJP President Vanlalhmuaka chuan Lunglei khawpui, chhim lama kan khawpui lian ber chu Mizoram hmasawnna meichher dep kai hmasatu ah tang ngei turin thinlung takin a sawm tih a sawi a, LMC Election lo awm tur leh kum 2023 MLA Election awm tura BJP Official candidate kan vote tlin chu an ram sum harsatna leh development lama chhim lamin harsatna an tawh zawng zawng damna tur leh rehna tur a ni tih a sawi a, “India ramin Economy a nasa taka hma a sawnna kawngah hian Mizoram kan tel ve theih nan BJP hi thuneihna kan pek a hun tawh a ni,” a ti bawk.

Siaha-a Deputy Commissioner (DC) Office in kum 50 a tlin lawmna pualin nimin zing khan Marathon Race buatsaih a ni a, Meisatla Forest Check Gate atanga tlan tanin DC Office thleng an tlan a, Siaha DC Lalsangliana chuan Marathon Race-a tlan te hi a vailiam bakah a tithate hnenah lawmman a sem bawk a ni. He Marathon Race-ah hian Mipa leh Hmeichhia bakah kum upa ber leh naupang ber te hnenah lawmman sem a ni a, Consolation prize mi panga te hnenah pek an ni bawk.

Tripura Refugee Camp a awm thin, Mizoram Electoral Roll a chuang mi 1,400 te hming chu Election Commission of India thu angin Mizo-ram Electoral Roll atanga paih an ni tawh a, Electoral Roll atanga paih zingah hian Hachhek bial a vote nei tam berin mi 838 an ni a, Hachhek dawtah Mamit bial-a vote nei tam lehin mi 285 te paih an ni tawh bawk a ni. Electoral Roll atanga paih te hi Mamit, Hachhek, Dampa, Tuirial, Serlui, West Tuipui leh Thorang bial atanga paih te niin tunah hian paih hmabak mi sing chuang an la awm nia thudawnn a ni bawk.

Nimin khan Champhai-ah District Level Committee on Myanmar Refugees chu an Chairman leh District Bawrhsap James Lalrinchhana hovin an thukhawm a, tun dinhmunah Champhai District-ah raltlan 9488 an awm mek a, Camp 34 awm mekin, Temporary ID mi 9488 te tan siam a ni tawh a. September ni 24, 2022 thleng khan COVID-19 Vaccine First Dose la 3698 (38.98%) leh Second Dose la 1989 (20.97%) an awm tawh a ni. He hunah hian raltlante chungchanga hma an lakna hrang hrangte tarlan niin, raltlante chhawmdawl kawnga Agency-te hmalakna chiang zawka hriat a nih theih nan an hmalakna te DC ah thlen tura hriattir ni se an tih bakah Village Level Committee on Myanmar Refugees-te tun aia chak zawka kalpui ni se an ti bawk a ni.

Niminpiah khan Mizoram-ah COVID-19 hri kai hmuhchhuah pung leh hretin hri kai mi 54 lai hmuh leh an ni.

HIV hrik kai awlsam tura ngaih, High Risk Group ten awlsam zawka HIV test an neih theih nana ruahman ‘Community Based HIV Screening Programme’ chu nimin khan Health Minister Dr. R. Lalthangliana chuan a hawng.

Aizawl Bawngkawn South-a awm, thalaite tana Skill Development Training hmun, Medhavi Foundation Centre chu nimin khan Mizoram Larsap Dr. Haribabu Kambhampati chuan a tlawh.

Aizawl New Market-a sumdawng pawl hrang hrang te chuan Mizoram sawrkarin an awmna building sa mai tura a tih laia Vawiin thlenga a la sak loh avanga an mangan thu an sawi a. Pawisa a awm tih sawi reng chunga an awmna tur sak a la ni lo chu sumdawngte rahbehna ah an ngaih thu leh an ngaihthiam thei loh thu an sawi a ni.

Mizoram Information Commission (MIC) chuan RTI Act, 2005 Section 4(1)(b) zawm chungchang sawiho turin nimin khan Public Authorities 10 te chu Mizoram Information Commission Office-ah a thawh thumna atan an ko a, Vawiin hian Department dang 10 te koh leh an ni ang.

Agriculture Minister C. Lalrinsanga chuan Mizoram sawrkarin Agriculture lama hma a lakna hrang hrangah Scientific Approach kan neih dan leh kan kalpui dan in Central lam beng a verh ti sawiin, hengte hi Mizoram in Agriculture-a ‘Outstanding North East State Award’ a dawn theihna kawnga kawngro sutu pawimawh tak a ni, a ti.

Harsatna sukiang tura hmalak a tul

September thla Pathianni hnuhnung bera hman thin 'World Day of The Deaf' pualin nimin khan DIET Serchhip-ah hun hman a ni a, beng enkawl that a pawimawh zia inzirtirna neih a nih bakah a thlawna Beng leh ri hriatna enfiahna hun hman nghal a ni bawk.

Serchhip District Women Football Championship khelh mekah Hmar Veng FC leh Vengchung FC te Final-ah an inhmachhawn dawn.

Kumin a 'World Pharmacist Day' pualin nimin khan Marian H/S Serchhip-ah ruihhlo leh Damdawi hmansual pawi theih dan inzirtirna neih a ni.

Mizoram Governor Dr. Hari Babu Kam-bhampati chuan tunkar tawplam khian Serchhip District a rawn tlawh dawn a, amah lo dawnsawn dan tur hi nimin khan District Bawrhsap Nazuk Kumar IAS hovin sawrkar mi pawimawh, NGO, Political Party leh Kohhran aiawhte chuan an sawiho a ni.

Serchhip District Hospital Building sakna tur chungchang sawihona chu nimin khan neih leh niin Damdawi In hmun tur tihfel a ni thei lo a, damdawi In hmun chungchanga hma la tu pawl pahnih te chuan thuchhuah intawm an siam thung a ni.

Kumin March 29 atanga Serchhip District a African Swine Fever (ASF) hri leng chuan ziaawm lam pan zelin chawlhkar khat zet ASF vanga Vawk thi leh suat a awm belh tawh lova, hri lenna hmun ni lo khaw dang ah pawh hri leng kaihhnawiha thi nia rinhlelh Vawk thi a awm belh tawh rih lo bawk a ni.

Serchhip District-a COVID-19 hri kai hmuh te zingah za zela 99.71 te chu enkawl dam an ni tawh. Nimin khan Serchhip District-a Sample enfiah atangin COVID-19 hri kai hmuh thar an awm lova, hetihlai hian Khawlailung-a hri kai enkawllai mi pakhat chu chhuahtir a ni ve thung a ni. Heti hian nimin tlai thleng khan Serchhip District-a COVID-19 hri kai hmuh tawh zawng zawng chu 14,582 niin an zinga 14,541 te chu enkawl dam an ni tawh a, hri kai zingah za zela 99.71 te enkawl dam ni tawhin hri kai enkawllai mi 5 an la awm a, hri kai zingah mi 36 an boral tawh bawk a, hri kai enkawllai te hi Khawlailung khua ah mi 3 leh Thenzawl-ah mi 2 an ni.

MNF party President Zoramthanga chuan nimin khan Aizawl-a an Party Office, Mizo Hnam Run-ah thu sawiin Mizoram Health Care sum puk an tum chungchangah mipui bum tumin thu chhumbung sawichhuak an awm thin niin a sawi a, “Keima tawngkam ngei hawhin 'Bang chhak sathlaka bang thlang bel ang a ni' tiin an sawi a. Asian Development Bank (ADB)-a Central sawrkar-in sum puk min phalsak tawh vbc. 1000-a vbc. 720 hi Central sawrkar rulh tur a ni a. Mizoram sawrkar-in kan rulh ve tur chu zaa 28 chauh a ni. In sak that nan Mau lian pui pui kan pu thleng thar dawn a ni zawk,” a ti bawk.

Peoples' Conference (PC) Party General Hqrs. hruaitu thlanna neih a thlan thar te chu nimin khan Aizawl-a an Party Office-ah thukhawmin General Secretary atan mi 6- B. Vanlalhruaia, H. Lalremsiama, Lalenkima Khiangte, Lalnunthara, Lalramthara leh VL.Thazova te ruat an nih thu an President thar Vanlalruata chuan a puang a, heng mite bakah hian Secretary 13 leh Joint Secretary mi 7 ruat an nih thu a puang bawk. He hunah hian an President Vanlalruata chuan vai sumdawng leh Vai Mistiri-ten sumdawnna leh hnaah Mizo min chimral titih tawh nia sawi fo chu ngaimawhawm a tih thu sawiin, heng harsatna chinfelna tur hian Dan tha a awm sa reng thu a sawi bawk.

Tuipuiral Zirlai Pawl (TZP) General Hqrs. hruaitute chuan nimin khan Aizawl Press Club-ah thuthar lakhawmtute kawmin an bial chhung Samthang khuaa Ministry of DONER hnuaia North Eastern Council (NEC) sum hmanga hna thawh ‘Samthang Zophulpui Nature Park, Mizoram’ saka hnathawh a chhe lutuk nia sawiin, tuna hnathawh mek chu DPR nena inmil lo, DPR aia chhia veka sak a nih thu an sawi a. He hna ah hian uchuak taka sum tihchingpen a awm ngei niin an ngai tih sawiin, Mizoram Lokayukta-ah complaint an thehluh nghal dawn tih an sawi bawk.

National Highway and Infrastucture Development Corporation Limited (NHIDCL) chuan an Corporate Social Responsibility (CSR) Fund atangin nimin khan Tlabung Sub-Division Hospital a hman tur 20Kv Kirlosker Generator cheng nuai nga man an hlan a, he hun hi Lunglei DC Kulothungan A IAS chuan hmanpuiin Lunglei District hmasawnna kawngah NHIDCL te nen thawhhona tha tak neih chhunzawm zel a duh thu a sawi a, NHIDCL te hian hemi hma pawh hian Tlabung Sub-Division Hospital-a hman tur Medical hmanrua an pek tawh thu a sawi bawk.

Mizoram Legislative Assembly Secretariat-a Officer leh Staff te tan nimin khan Assembly Secretariat Conference Hall-ah Cyber Crime Awareness Campaign neih a ni a, Commissioner & Secretary, Mizoram Legislative Assembly H. Lalrinawma chuan kaihruaiin Rahul Alwal, IPS, SP CID (Crime) cum OSD to PHQ hovin Cyber Crime Police Station, CID (Crime)-a mithiam ten zirtirna an pe a, tunlaiin Mizoram-ah Cyber Crime nasa taka a hluar thu leh Phone hmang te, Facebook leh Instagram, etc hmanga inbumna awm theih dan hrang hrang inhrilhhriat niin chutiang inbumna laka fimkhur a tulzia leh fimkhur dan tur hrang hrangte sawiin, zawhna leh chhanna hun hman a ni bawk.

Nimin tlai thleng khan Mizoram-ah COVID-19 hri kai enkawllai mi 158 an la awm.

Saiphai Police Out-Post a Duty te chuan Inrinni zan dar 6:00 vel khan Dan lova tawlh ni ngeia hriat Zawng te chi pathum leh bawkvak-a kal chi rannung chi hrang 10 chu Channighat, Cachar Assam lam mi Birhan Uddin Laskar-a khalh lirthei atangin an man a, motor a chuang ve midang 3- Kamal Hussain, Karimganj; Abdul Ruf, Bagha Bazar leh Niaz Hussain Bagha Bazar te pawh an man nghal a ni.

Kanghmun leh Lunglei inkar World Bank Road kawng thawmthat hna Bhavya Construction ten an thawh chungchangah nimin khan Lunglei DC Kulothungan A, IAS chuan thuthar thehdarhtute kawmin Disaster Management Act hmangin Bhavya Construction te chu koh an nih thu leh Mipui, Lirthei neitu leh District Administration te lungawina khawp a kawng siam tha tur leh a hun chhunga kawng thawm hna an zawhfel a tul thu a sawi a, hun tiam chhunga an zawh loh chuan Mizoram State chhunga hnathawk theilo tur a black list a nih theih thu a sawi bawk. He hunah hian Bhavya Construction-a Project Manager Horendra Kumar Barua chuan October 2022 chhung ngeia kawng repair hna an zawhfel tur thu a intiam a ni.

Zoram Peoples' Movement (ZPM) General Hqrs. hruaitute chuan Kolasib Fast Track Court building sakna tura lungphumna ah sawm zinga tel lo, Assam sawrkar hnuaia case nei lai Abu Mazumdar lo tel ve chu an chhuizui dawn thu an sawi a, hemi sawifiah tur hian tukthuan lo buatsaih saktu Supply Minister leh Kolasib bialtu MLA ni bawk K. Lalrinliana leh Chief Minister Zoramthanga te an phut thu an sawi bawk.

AH&Vety Minister Dr. K. Beichhua chuan nimin khan Nisapui ah Bawnghnute dahkhawlna In (Milk Collection Centre) leh khawl hmanga bawnghnute vawnthatna (Bulk Milk Cooler) a hawng.

Chief Minister Zoramthanga chuan Myan-mar atanga Rohingya Muslim maktaduai chuang raltlante avangin Mizoram-ah venhimna tihchak a tul a ni, a ti. Chawlhkar 2 vel Delhi-a a cham chhungin hemi chungchang hi ram hruaitu a hmuh te hnenah chiang taka a hrilh thu Chief Minister chuan amah kawmtu chanchinbumite a hrilh a. Myanmar atanga Rohingya mi maktaduai tel Bangladesh-a an raltlan chu ngaihthah chi a nih loh thu leh tun dinhmunah pawh Mizorama rawn luh tum an awm fo thu a sawi tih a sawi a ni.

Mizoram-a Sazu puang chuan District 8 te nghawngin khaw 104-a loneitute thlawhhma ram hectare 524.31 zetah Buh hmun a khawih chhiat tawh thu Agriculture Department hotute’n an sawi.

Mizoram-a National Service Scheme (NSS) Unit hrang hranga Programme Officer (PO) hna thawk tha leh Volunteer hna thawk tha chawimawina, ‘State Level NSS Award for 2021-2022’ sem takah Govt. Serchhip College atangin C. Lalramliana (Programme Officer) leh Lalrempuii Sailo (NSS Volunteer) te hnenah he chawimawina hi hlan a ni.

MIZOFED Board Chairman K. Rothangpuia chuan Inrinni khan Serchhip rawn tlawhin Serchhip Sub-Hqrs. YMA leh Serchhip District Consumers Association hruaitute nen inkawmna an nei.

Serchhip District Football Association (SDFA) buatsaih Women Football Championship khelh mek chu Vawiin hian Semi Final khelh a ni dawn.

Mipui in midang tana a thlawna thisen pek an lo hlut deuh deuh theihna tur leh a tam thei ang ber a thlawna thisen pek a nih theihna atana thla thar ni 1 thlenga hman tur 'Raktdaan Amrit Mahotsav' denchhenin Inrinni khan Serchhip Chhim Veng Branch YMA te chuan Serchhip Blood Bank-ah thisen Unit 12 an pe a, thisen petute hi Mipa 9 leh Hmeichhia 3 niin heng mi tlawmngai te hi Blood Bank-ah kalin thawktu ten thisen hi an lo lak sak a ni.

Nimin September 25 kha UPC NEI Kohhran ni pawimawh, Missionary Day a ni a, Kohhran hrang hrangah hman a ni. UPC NEI Kohhran hian tun dinhmunah Mizoram chhung leh State pawnah Missionary 250 chuang an ruai mek a ni.

UPC NEI chuan nimin Pathianni hmang khan Pastor Bial hrang hrangah Mission Department Inkhawmpui an hmang a, Serchhip Bial Mission Department inkhawmpui vawi 45-na chu Biak Inpui Serchhip-ah neiin Serchhip Dinthar Bial Mission Department inkhawmpui vawi 21-na pawh Dinthar UPC Biak In-ah neih a ni bawk.

Inrinni kalta atanga nimin Pathianni hmang khan Roman Catholic Serchhip Parish Naupang Sunday School Inkhawmpui chu All Saints Church, New Serchhip-ah neih a ni a, ‘Lalpa tih hi finna bul a ni’ tih chu thupui-ah hman niin Cate. John Rambuatsaiha leh Sr. Carmeline Lallawmsangi ten thupui hmang hian thu an sawi a, thu leh hla hmangin intihsiakna an nei nghal bawk.

Nimin tlai thleng khan Serchhip District-ah COVID-19 hri kai enkawllai mi 6 an la awm.

Mizoram-ah COVID-19 hri kai enkawllai tlem ve hret hretin nimin tlai thlengin hri kai enkawllai mi 178 an la awm.

Champhai District chhung Zokhawthar Police Duty te chuan Zirtawpni zan khan Melbuk dai-a lirthei an enfiahna ah Methamphetamine mum 5,05,000 zet an man a, a neitu nia hriat Lalrindiki, Zokhawthar Field Veng-a khawsa ni-a inchhal pawh man nghal niin heng an thil man hi international Market-a cheng vbc. 167.4 hu nia chhut a ni. Champhai Police pawhin tun thla ni 22 khan Methamphetamine mum 2,52,500 an lo man tawh a, hei hi Champhai District chhunga Police-in an man tam ber niin, ni 2 hnu lekah he record hi Zokhawthar Police te chuan khumin Champhai District-a Methamphetamine an man tam ber tum a ni.

Mizoram-ah kum thum kalta, 2019 leh 2021 inkar khan mahni intihlum mi 224 an awm a, a tam ber hi mipa an ni. Chhinchhiahna atanga a lan danin kum thum chhunga mahni intihlum 224 zinga 187 hi mipa an ni a, hei hi mahni intihlum zawng zawng atanga chhutin 83.48% a tling a. Hemi hun chhunga hmeichhia mahni intihlum mi 37 an awm bawk. Mizoram Police chhinchhiah danin kum 2019 khan mahni intihlum hi mi 60 awmin an zinga 47 chu mipa an ni a, hmeichhia 13 awm bawkin kum 2020 khan mahni intihlum mi 99, mipa 83 leh hmeichhia 16 an awm a. Nikum khan mahni intihlum mi 65 awmin an zinga 57 chu mipa niin hmeichhia pariat an ni thung.

State Election Commissioner Laima Chozah IAS (Rtd.) chuan October ni 14, 2022-a Lung-lei Municipal Council (LMC) Final Electoral Roll tlangzarh a nih hnuaiah Hmeichhe tana hauh tur Ward pawtin hemi hnu hian LMC inthlan hun tur puan a ni dawn tih a sawi a, LMC Inthlan senso turte State sawrkarin Election Commission hnenah a pek vek tawh thu a sawi bawk.

Gauhati High Court Judge, Justice Michael Zothankhuma chuan Inrinni khan Kolasib Project Veng-ah Fast Track Court building sakna tur lungphum a phum a, thubuai chinfelna hna thawh kawngah Kolasib District mipui tan a hmun tangkai tak a nih ngei a beisei thu leh building rintlak, a nihna tur ang tak a sak a nih ngei a beisei thu a sawi bawk. Kolasib-a Fast Track Court building hi cheng vbc. 13.75 hmangin thla 24 chhunga sak zawh hman tura tih a ni a, lungphum phumna hun hi bialtu MLA leh Supply Minister K. Lal-rinliana pawhin a telpui a ni.

Lirthei in khu a tichhuak tam lo tih finfiahna, Pollution Under Control Certificate (PUCC) dan lova pechhuaktu nia hriat chu tunhnai khan man chhuah a ni. Transport Department hotute sawi danin, report an dawn bawhzuia thu an zawhfiahna ah PUCC lo pechhuak thin hian a thil tih a lo bansan hman a, Tripura lamah contact neiin PDF-in online-in an rawn thawn a, chu chu a lo pechhuak thin a. Dan bawhchhiatna a nih avangin ti tawh lo tura hriattirna lehkha pek a ni a, a copy pawh SP Traffic, Aizawl leh SDPO, Aizawl North pek an ni. Dan lova PUCC lo pechhuaktu hian Scooty tan certificate hi a lo pechhuak tlangpui a, pakhatah Rs. 80 zel lain PUCC Test man hi a pangngaiah chuan lirthei pakhat zelah Rs. 50 a ni. Transport Department hotute chuan PUCC pe-chhuak turin Authorised Testing Agency nih a ngaih thu leh Mizoram-ah chuan Mizoram Pollution Control Board (MPCB) an nih thu an sawi.

Zoram Peoples Movement (ZPM) Leader Lalduhoma chuan, “Mizo hnam hrang hrang te hi inlahrang zawng ni lovin inpumkhat zawnga kan kal a ngai a ni,” a ti.

Directorate of Health Services chuan tunhnaia Mizorama Dengue natna a hluar mek chungchangah thuchhuah siamin natna pung chak tak anih avangin inven kawngah tan lak zual a tul hle a ni, a ti.

Zan hnih (2) riaka Mizoram rawn tlawhtu Union Minister of State for Women & Child Development and AYUSH Dr. Munjpara Mahendrabhai chuan Inrinni khan Aizawl Venghnuai-a Health & Wellness Centre leh Aijal Club Park-a State Handloom Expo a tlawh.

Chief Minister Zoramthanga chuan Zokhawsang ram-a Assam Rifles awmna hmun hawng turin Union Home Minister Amit Shah chuan November thla khian Mizoram rawn tlawh a tum tih a sawi a. Heng bakah hian Mizoram mamawh hrang hrang sawrkar laipui-a Minister te a sawipui thu a sawi bawk.

Vawiin September 24 hi National Service Scheme (NSS) dinchampha vawi 53-na a ni a, NSS Foundation Day pual hian Serchhip-a NSS Unit hrang hrangte chuan nimin khan hun an hmang hlawm a ni.

Serchhip District Football Association in a buatsaih SDFA Women Football Championship chu nimin khan khelh chhunzawm leh a ni.

Disaster Management and Rehabilitation Department buatsaih chawlhkar hnih awh 1st Batch of Aapda Mitra (Community Volunteers), Serchhip District chhunga mi 50 tana training buatsaih chu nimin khan State Training Centre, Tanhril ah kharna neih a ni a, Upscaling of Aapda Mitra-ah hian khawtlang atanga volunteer te hi chhiatrupna tawh thulha lo hmachhawn dan tur hrang hrang leh hmanraw hrang hrang hman dan te zirtir an ni a. Training chhuakte hian hmanraw (equipment) chi hrang hrang- Personal Floatation Device (Life Jacket), Torch/ Emergency light (Solar), Safety Glove, Pocket Knife, First Aid Kit, Gas Lighter, Whistle, Water Bottle, Ruck Sack, Thosilen, NDMA Uniform & SDMA/DDMA Uniform, Safety Googles, Safety Helmet, Rain Coat, Gum Boot leh Training Certificate te hlan an ni. Hetiang Training hi Serchhip District-a mi 100 tan neih tura ruahman niin mi 50 tan Training hi la buatsaih leh tur a ni ang.

Serchhip-a Agriculture Department hotute chuan report an dawn chinah Serchhip District a Buh hmun Sazu in a beih chu ‘nasa’ tia sawi tur khawp a la nih loh thu an sawi.

Serchhip District SP chuan Serchhip District mi zawng zawngte ruihhlo ti lo tura intiam (Pledge) turin a ngen a ni.

Serchhip District-a African Swine Fever (ASF) hri leng chuan ziaawm lam a pan rih niin a lang a, Serchhip-a AH&Vety Department ten an chhinchhiahna atanga a lan danin tun Pathianni kalta hnu lamah ASF vanga Vawk thi leh Vawk suat a awm belh tawh rih lo a. Kumin March 29 hnu lamah Serchhip District-ah hian ASF vanga Vawk thi 303 awm tawhin Vawk 392 suat a ni tawh bawk a, khaw 8 chu ASF hri lenna hmun ah puan a ni tawh bawk a ni. Heng bakah hian khaw dang 11-ah chhan hriat loh a Vawk thi 26 awmin Vawk 134 suat a ni bawk a ni.

Nimin khan Serchhip District-ah COVID-19 hri kai mi 3 chhinchhiah thar an awm leh a, heng hri kai chhinchhiah thar te hi Zote South khua vek niin khaw dang-a Sample enfiah ah hri kai an awm lo a ni. Nimin khan Serchhip District-a hri kai enkawl dam an awm belh lova, heti hian nimin tlai thleng khan Serchhip District-a COVID-19 hri kai hmuh tawh chu 14,579 niin an zinga mi 14,526 te chu enkawl dam an ni tawh a, hri kai zinga za zela 99.63 te enkawl dam ni tawhin hri kai enkawllai mi 17 an la awm a, hri kai zingah mi 36 boral tawhin hri kai enkawllai te hi Khawlailung-ah 10, Thenzawl-ah 4 leh Zote South-ah mi 3 te an ni.

LESDE leh Central YMA te buatsaih August 21, 2022 atanga Cement Mistiri training neih kharna inkhawm chu nimin khan Central YMA Hall, Aizawl-ah neih a ni a, LESDE Minister Lalchhandama Ralte chuan a hmanpui a ni. Central YMA hian Cement Mistiri training vawi 16 an buatsaih tawh a, Alluminium Mistiri Training vawi 3 leh Floor Tile Mistiri Training vawi 3 an buatsaih tawh a, tun tuma training-ah hian ni 31 chhung theory leh practical-in an zir a, mi 48 in he training hi an zo a ni.

Mizoram-a rawn zin mek Union Minister of State for Women & Child Development and Ayush, Dr. Munjpara Mahendrabhai chuan nimin khan Mamit tlawhin a Department chan Women & Child Development leh Ayush hnuaia thawktute nen inkawmhona neiin an hnathawh dan a enpui a, heng hmun a thawktute hian an harsatna te lo thlenin nakin zelah harsatna an nei anih pawhin biak theih reng anih thu a sawi a. Sakhi- One Stop Centre leh Swadhar Greh a awm mekte chu anmahni-a intung-nung thei tur leh inenkawl thei turin Vocational Training nei a, thiamthil tha tak neih tum turin a chah bawk a ni.

Lunglei Municipal Council (LMC) inthlanna neih tur atan inbuatsaihna kalpui zel niin he inthlan neih tur inbuatsaihna atan Electoral Roll enfiah hna thawk turin nimin khan Draft Electoral Roll chu tarchhuah a ni a, LMC Draft Electoral 2022-ah hian vote nei 40,265 awmin hming thun belh, paih leh siamthat ngai te tan tun thla ni 30 thleng dilna thehluh theih a ni a, October 14, 2022 khian Final Electoral Roll tarchhuah a ni ang.

Nimin khan Rural Development Minister Lalruatkima hovin a Office-ah Mizoram-a DRDA Project Director te chuan DRDA chungchang an sawiho a, RD Minister chuan DRDA kalphung thin te lo danglamin, Cabinet ten ngaihtuahin an dil angin an dinhmun ngai luah tura a buatsaih avangin lawmawm a tih thu a sawi a. Harsatna zualpui tam tak kal pelh a nih hnuah insiamrem ngai tam tak a awm a, chungte chu Administrative Level a sawiho ngai leh thuneihna sang changtu te ngaihtuah tura buatsaih a ngaih avangin he thut-khawm hi koh a nih thu a sawi a. He hunah hian DRDA Staff la awm te kal zel dan tur leh DRDO kalpui dan turte pawh sawiho a ni bawk.

Mizoram Governor Hari Babu Kambham-pati chuan nimin khan Raj Bhavan-ah Mizoram State Council for Child Welfare (MSCCW) hotute kawmin naupangte tana hamthatna, naupangte humhimna kawng leh naupangte thlamuang taka Society-a an lo than lennatura hmalakna te an sawi a. Governor hnenah hian MSCCW hotute chuan an hmalakna huanga National Painting Competition buatsaih chungchang, National Bravery Award for Children thlanchhuah kawnga hmalakna te, naupang huaisen lawmman dawngte zirna senso chhawmdawlna chungchang leh ICCW atanga naupang chhawmdawl ngaite tanpui an nih dan te report an pe a. MSCCW hotute chuan Danbu in a phut angin Governor chu Chief Patron of MSCCW atan an sawm nghal a ni.

Nimin tlai thleng khan Mizoram-ah COVID-19 hri kai enkawllai mi 185 an la awm.

Mizoram-ah kum 1985 atanga nikum 2021 inkar chhung khan nau piang 7,13,508 leh mitthi 1,67,002 chhinchhiah an awm a, kum 2021 a mitthi chhinchhiah zingah kum 70 chunglam (70 and above) an tam ber. Kum hmasa lam nen a khaikhinin, nikum a mitthi punna a sang hle bawk.

MPCC chuan Primary School leh Middle School (Elementary stage) naupangten a thlawna chaw chhun an dawn thin Mid Day Meal Scheme hnuaia chaw ei thleng leh bungraw dang supply te chu a nih tur ang aia quality chhia a nih avangin District Project Coordinator Office-te chuan School-ah an sem chhuak ngam lo, an ti. 

Serchhip District Football Association (SDFA) buatsaih ‘District Women Football Championship 2022’ chu nimin khan Serchhip-ah khelh tan niin Team 7 an tel a ni.

Serchhip Sailiamkawn Police Check Post-a Duty te chuan nimin zing khawvar hma khan khawchhak lam atanga dan lova rawn phurh Kuhvarah ro bag 80 chu Motor pahnih atangin an man a, kumin February 17-a he Check Post hawn a nih hnua helai hmun dan lova phurh Kuhvarah man hmasak ber nia hriat a ni.

Serchhip District Hospital-a damlo chaw pek hun leh damlo awmpuitu inthlak duhte tan Vawiin, Sept. 23, 2022 atanga hman tan turin ruahmanna siam thar a ni.

Serchhip District Football Association (SDFA) buatsaih ‘District Women Football Championship 2022’ chu nimin khan Serchhip Sports Stadium-ah khelh tan a ni.

Serchhip District-a ‘Zorin Bean’ chin te chu tunlai hian seng tan mek a ni.

Nimin tlai thleng khan Serchhip District-ah COVID-19 hri kai enkawllai mi 14 an awm.

Thosi seh atanga kai chi natna chikhat Dengue kai chu Mizoram-ah an pung nasa hle a, State Vector Borne Disease Control Programme hotute sawi danin, kumin August thla thleng khan Dengue kai ni-a rinhlel mi 1,330 te thisen endik atangin mi 135 in he natna hi an kai tih hmuhchhuah a ni a, nikum (2021) chhung khan thisen endik 420 atangin hri kai 83 hmuh a ni thung a ni.

All India Regional Rural Bank Employees Association (AIRRBEA)-in vawiin a rampum huap lungawilohna an lantir tur chu Mizoram Rural Bank-a thawktute pawhin an zawm dawn a, hei vang hian MRB hi mipui tan dawr theih a ni dawn lo nia thudawn a ni. AIRRBEA hian thilphut 8 lai an nei a, heng an thilphut hrang hrangte hi India sawrkar, Ministry of Finance (MOF) in a tih hlawhtlin an phut thu an sawi bawk a ni.

Kawlphetha MW 20 pechhuak thei tur leh hmarchhak bial-a Solar Project lian ber tur Vankal Solar Park-ah hnathawh mek zel a ni a, Solar Plate dahna tur ban 11,600 phun turah ban 9,000 phun zawh tawh niin, phun hmabak 2,600 awmte pawh phun tura buaipui mek a ni bawk.

Nimin khan Hnahthial District Development Coordination & Monitoring Committee chu an Chairman leh Lok Sabha MP C. Lalrosanga hova thukhawmin nikum October atanga kumin August thla thlenga Sawrkar laipui sum hmanga hnathawh hrang hrangte an thlirho a. Lok Sabha MP chuan Hnahthial chu District thar a nih angin mamawh tam tak a awm tih a hriat thu leh Sawrkarin a ngaihtuah zel a beisei thu a sawi a, Mizoram chhung kawngpui siam hna thawk mektu NHIDCL te chu tha taka hnathawk turin a chah a, kawng laih avanga lirthei thenkhat tana tlan hreawm khuar leh pawng sang deuhte chu siamtha nghal zel turin a ngen bawk.

Tlabung Sub-Division huamchhung Khojoy-sury-a chhungkaw 160 bawr velte leilet-a buh chu rannung chi khat Brown planthopper-in a eichhiat sak a, helai hmun hi Lunglei DAO C. Malsawmkima chuan tlawhin buh eichhetu Brown planthopper chu Mizo ten ‘Katnelh’ kan tih mai thin a ni tih sawiin, “Hetiang hi an lifespan a thui lo a, reilote chhungin an inthlahpung chak em em a ni,” a ti a. Rannung thahna hlo an ken hmangin la chhe ve lo buh engemaw zat chhan theih an in beisei thu leh, anmahni puih theih dan kawng awm ang ang dap tura theihtawp a chhuah tur thu a sawi bawk. Lunglei District ATMA Dy. Project Director John Laltluangliana chuan, buhin a huat em em an pai tel avangin planthopper-in a ei tawh buh kung chu a ro nghal mai zel niin a sawi a; tun tuma damdawi an ken chu rannung hnawh-darhna mai ni loin, a thah nghalna hlo a nih avangin awmzia a neih ngei a beiseiawm tih a sawi bawk.

Peoples' Conference (PC) Party chuan nimin khan Aizawl-a an Party Office Durbar Hall-ah General Assembly an nei a, he hunah hian kum 2 chhunga an Party hruaitu tur thlanna neiin President-ah Vanlalruata; Senior Vice President-ah Lalrinzuala Chawngthu; Vice President-ah Lalrinmawii Fanai leh Treasurer-ah HK. Liansawta te thlan an ni. Nimin a General Assembly-ah hian an President thar Vanlalruata chuan thu a sawi bawk a ni.

Mizoram-ah niminpiah khan COVID-19 hri kai hmuhchhuah tlem leh hretin hri kai mi 21 hmuhchhuah an ni a, nimin khan mi 35 te chu anmahni enkawlna atanga chhuahtir an ni thung.

New Delhi-a cham mek Chief Minister Zoramthanga chuan mi pawimawh te hmu chhunzawm zelin naktuk khian Mizoram rawn thleng leh tura beisei a ni.

Sawrkar Laipui-a Minister of State for AYUSH leh Women & Child Development Dr. Munjpara Mahendrabhai chuan nimin khan Aizawl rawn thlengin nimin tlai khan Mizoram a AYUSH Directorate leh Women & Child Development Department hnathawh leh hmalakna te thlirletna hun a neihpui.

Nimin khan Lunglei leh Siaha District-ah State Public Information Officer (SPIO) leh State Assistant Public Information Officer (SA-PIO) te tan RTI Act chungchang zirhona neih a ni.

Information & Public Relations (I&PR) Department changtu Minister Lalruatkima chuan, “Chanchinbu hi khawtlang inzirtirna leh ram leh hnam humhalh kawngah pawh hmanraw tangkai tak a ni,” tiin kan Media ah pawh Mizo nun ze mawi a lan a mawi thu a sawi.

SDFA Women Football Championship-2022 chu Vawiin Sept. 22, 2022 hian Serchhip-ah khelh tan a ni dawn a, tun thla ni 27 thleng a awh ang.

Serchhip District Bawrhsap Nazuk Kumar chuan tun thla ni 15-ah thupek tichhuakin Accredited Journalist-te'n an lirthei-a bel tur Press Sticker leh Press ID leh Press Card-te mipuite hmuh theih tura an hman thin chu Accredited Journalist ni ve lo ten dik lo takin pawl leh mimal chungchang (information) lakkhawmna atan hmang thin an awm tih hriat a ni tih tarlangin, hetiang tih chingte chu IPC Section 419 hnuaia 'Cheating by Impersonation' hmangin thubuai siam sak theih an nih thu leh hetiang ti hriat leh manchhuah an awm chuan he Dan hmang hian hrem an nih tur thu a tarlang.