Lenkawl

Mizoram State Policy Coordination Committee (MSPCC) chu nimin khan Adviser to Chief Minister for Implementation of Handholding Scheme Dr. KC Lalmalsawmzauva kaihhruaia thukhawmin Ban-a Kaih Scheme kal mekah Department thenkhat hnuaia dilna lut te an thlirho a, lirthei lei chungchanga dilna lut, Taxi (2-wheeler, 4-wheeler leh Auto Rickshaw) atana dilna chu Handholding Scheme hian a huam telloh thu sawi a ni a. Commercial Passenger Vehicle dangah chuan hnuaiah a diltu ngei hminga State Transport Authority (STA) permit/licence nei tawh tan Scheme hian a huam thei dawn a ni.

Art & Culture Department leh Dungtlang Branch YMA te tangkawp buatsaihin nimin khan Dungtlang khuaah ‘Cultural Meet leh Vangpui Kut’ neih a ni a, he hun hi Art & Culture Minister C. Lalsawivunga chuan hmanpuiin Vangpui Kut chu Mizo culture vawnhim nana thil pawimawh tak a nih thu a sawi a, mahni hnam zia zahpuite chu Hnam dingchhuak an awm ngai lo a, an ral thin tih a sawi bawk. Dungtlang khua Vangpui Kut hi kumtin hman thin niin kumin hi tum 38 an hmanna a ni a, kum 2021 atang khan Aizawl a Branch YMA an thlanchhuah te an sawm thin a, kumin hian Ramhlun North Branch YMA te sawmin Ramhlun North Branch YMA atang hian member 60 chuang an kal a ni.

Higher & Technical Education Minister Dr. Vanlalthlana hovin nimin khan ‘Consultative Meeting on Draft Mizoram State University Bill’ chu Stakeholder-te nen neih a ni.

Mizo Language Development Board (MLDB) Chairman R. Lallianzuala chuan Mizo tawng humhim tihhmasawn leh thehdarh kawnga hma la turin Mizoram sawrkarin Mizo Language Development Board a din thu a sawi.

Selesih-a College of Veterinary Sciences & Animal Husbandry chuan nimin khan '26th Foundation Day' an lawm a, he hun hi Rural Development Minister Prof. Lalnilawma chuan he hun hi a hmanpui a ni.

Chief Minister Lalduhoma chuan nimin khan Zoram Medical College (ZMC)-ah Post Graduate Degree in Public Health zirna hawngin Girls' Hostel thar a hawng nghal bawk.

Mizo Zirlai Pawl (MZP) chuan zirlaiten hun leh tha tam tak seng a Certificate an sual chhuah laia awlsam taka Certificate leh documents lem ngampa taka siamchhuah a ni chu an pawi an tih thu an sawi a. Hemi kaihhnawih ni ngeia hriat ah hian Mizoram Police te chuan mi pakhat an man thu an sawi bawk.

MNF Party chuan zirlai tam takin an mamawh leh an innghahna Scholarship sem chhunzawm lova a khaihlak ta chu pawi an tih thu an sawi.

Chief Minister Lalduhoma’n sawrkar laipui-a Minister of Road Transport & Highways Nitin Gadkari hnenah Mizoram kawng chhia a ziaawm nan kawng siam dan phung thara kal an dil tih a sawi.

Chin New Year Day lawmna hmanpuia USA khawpui Washington a châm mek Rajya Sabha MP K. Vanlalvena chuan Thawhtanni khan US Department of State Officer, East Asia, South East Asia and Pacific Region changtu Erin Kimsey-i chu Washington-a a Office-ah hmuin Mizoram-a UNICEF Office din a nih theihna atana hma lak sak turin a ngen a. Rajya Sabha MP K.Vanlalvena chuan US Officer hnenah hian Mizoram chu thenawm ram pathum Myanmar, Bangladesh leh Manipur atang te a politics kal fuh lo avanga raltlante rawn fuankhawm mekna a nih thu leh heng raltlan te zingah hian naupang kumtling lo tam tak an awm thu a hrilh a. Heng kum-tling lo raltlan te hian Zirna tha te, Chaw tha te, Damdawi tha te leh silhfen thianghlim bakah chenna hmun tha leh thianghlim an mamawh thu a hrilh bawk a. Heng an mamawhte pe vek tur hian Mizoram chu India rama State intodelh lo ber te zinga mi a nih avangin kan tan thil harsa tak a nih thu te sawiin, a rang thei ang bera Mizo-ram-ah UNICEF Office hawn a nih theihna tura hma lak sak turin a ngen a ni.

Mizo Inneih, Inthen leh Rokhawmna Dan ennawntu, Review Committee chu nimin khan an Chairman Law & Judicial Department-a Addl. Secretary Zahmingthanga Ralte kaihhruaiin Secretary Conference Hall-ah a tum khatna atan an thukhawm.

National Ayurveda Day, 2024 chu nimin khan Aizawl-a Assembly Annexe Conference Hall-ah hman a ni a, Mizoram Governor Dr. Hari Babu Kambhampati chuan he hun hi khuallian niin a hmanpui a ni.

Chief Minister Lalduhoma chuan sawrkarna an chan khan leiba tam tham tak an chhawm avangin an kawng a chho nghal hle tih sawiin, “Renchem takin kan sum te kan enkawl a. Chuvang chuan tunhmaa RBI balance chhe tak nei thin khan tun Financial Year tawpah kha chuan RBI Balance cheng vbc. 500 chuang kan lo nei ta a ni,” a ti.

Vehicle Enforcement Service Association, Mizoram (VESAM) chuan thudik ziktluak lo hmanga Social Media-a thehdarhtu Maxi Cab khalhtu chu ngaihdam dil tura an phut thu an sawi.

Mizoram sawrkar Food, Civil Supplies & Consumer Affairs Department hotute chuan Food Corporation of India (FCI)-in buhfai an la rawn pekchhuah loh avangin raltlante ei tur buhfai an a la thei rih lo niin an sawi.

Health Minister Lalrinpuii hovin nimin khan a Pisa-ah mipuite'n eitur thianghlim leh hrisel an neih theih nana hmalak dan tur sawiho a ni.

Kum 2019 March 11-a Mizoram Larsap in Chairman a lakluh hnua a taka hna thawk tan, Mizoram Lokayukta chuan eiruk thubuai chhui tur 67 a dawng tawh a, kumin 2024-ah thubuai 14 a dawng tawh.

Mizote ngaihhlut leh tlawh châk, Buannel leh Phawngpui National Park chu thla thar November thla atang hian tlawh theih a ni chho leh dawn nia thudawn a ni.

MNF Vice President Dr. R. Lalthangliana chuan tuialthei man tihsan a nih avangin thil man a pung nasa niin a sawi.

Home Minister K. Sapdanga chuan eptu Party te chu thutling lo leh belhchian dawl lo hmanga mipui rilru hruaikawi tum-ah a puh.

Chief Minister Lalduhoma chuan Sustainable Development Goals Dashboard thar leh Project Monitoring Committee Dashboard (MPLAN) thar te chu nimin khan a hawng a. Chief Minister chuan Department te chu data dik tak zel thun tum turin a chah bawk.

Chief Minister Lalduhoma chuan BJP atanga MLA pakhat Deputy Chief Minister-a lakluh chungchanga thu thang chu thu diklo a nih thu a sawi.

PHE Department hotute chuan November thla ralhma in Aizawl mipuite hnenah a pangngai in tui sem theih an inbeisei tih an sawi.

School Education Minister Dr. Vanlalthlana chuan zirlaite chu mahni kalkawng tur thlira rilru nei taka zir turin a fuih.

Vairengte leh Sairang inkara kawngpui lian laih tura zangna-dawmna tihfel a nih thu Chief Minister Lalduhoma’n a sawi.

Mizo Zirlai Pawl (MZP) dinchampha phak pualin Inrinni khan Aizawl-ah ‘Ruihhlo-Zirlaite hmelma’ tih thupui-a hmangin Ruihhlo Do Kawngzawh neih a ni a, he hun hi School Education Minister Dr. Vanlal-thlana leh Excise & Narcotics Minister Lalnghinglova Hmar ten an telpui a ni.

Mizoram Larsap Dr. Hari Babu Kambhampati chuan Chakma Autonomous District Council sawrkarin Chakma zirlaite tan Mizo tawng zir tura thutlukna a siam chuan, Chakma leh Mizote inbiakpawhna leh inhriat-thiamna kawngah thui tak a pui dawn tih a sawi.

Mizoram-a Kohhran hrang hrangte thawhhona leh inpumkhatna tura hmalatu tur, Council of Churches in Mizoram (CCM) chu nimin khan hawn a ni a, hemi hma niminpiah khan Mission Veng Kohhran Biak In-ah rorel inkhawm neih a ni.

Chief Minister Lalduhoma chuan Aizawl khawpui chhung atanga Assam Rifles insawnchhuak tura inremna chu Mizoram sawrkar leh Assam Rifles aiawh ten Nilaini kalta, October 23, 2024 khan New Delhi Mizoram House-ah a hriatpuinain an ziak tih a sawi.

Mizoram Public Service Commission (MPSC) chuan MPSC chu Constitutional leh Independent body a nih thu sawiin, Sawrkar leh mipui tana hna a thawhna kawngah sawiselna leh rawtna nei an awm chuan Chairman emaw, Secretary emaw hnenah a duh tan a thlen theih reng tih an sawi.

Mizoram Lok Sabha MP Richard Vanlal-hmangaiha chuan tunkar Thawhtanni atanga Ningani chhung khan Mumbai tlawhin Navi Mumbai-a Mizoram House hmun thar tur chu a tlawh bawk.

Kulhpawn Monitoring Committee ti invuah te chuan nimin khan Aizawl Press Club-ah thuthar lakhawmtute kawmin Mizoram Police Headquarters hnuaia Police Quarters 26 sak chungchanga Contractor thlan dan dik lo chhui chiang turin Mizoram Lokayukta Chairman chu an ngen tih an sawi.

Sericulture Department hnuaia Eri Project kalpul mekah Sericulture Farmer te tharchhuah ‘Eri Cut Cocoon’ chu State pawnah thawnchhuah a ni.

Sports Minister Lalnghinglova Hmar chuan infiamna chi hrang hrangah, Mizo thlalaite thiamna leh theihna haichhuak tur chuan mi nawlpui ban phak, Sports Infrastructure tha siam a pawimawh thu a sawi.

Sawrkar kum kal mek-a kum chanve (April - September, 2024) chhungin Mizoram-ah a thlawnin Thisen Unit 17,559 pek ni tawhin hei hi thisen pek zawng zawng atanga chhutin za zela 94.19 a ni a, Mizoram-ah kum chanve chhunga a thlawna thisen pek tam ber tum a ni.

olasib District Bawrhsap Robert C. Lalhmangaiha chuan nimin khan ‘Tobacco Free Youth Campaign 2.0’ chu Kolasib DC Conference Hall-ah a hawng a, Mizote hian zuk leh hmuam kan ti nasa a, kan hriselna pawhin a tuar hle tih sawiin, hemi dona lama thawktu hriselna lama hnathawkte chu fakawm a tih thu a sawi a. Vaihhlo leh a kaihhnawi te hi do rem a ngaih thu sawiin, hemi lak atanga kan zalen a, nunphung thar kan zawh a ngai tawh takzet tih a sawi bawk.

Centre for Environment & Social Justice (CESJ) chuan Mizoram sawrkar-a Department pali (4) a changtu Minister theuhte hnenah Mizo-ram tualchhuak thil hrang hrang humhalhna dan kengkawh tha turin an ngen.

YMA Inkhawmpui Lian neih loh kum-a neih thin, ‘YMA Rorel Inkhawm’ vawi 4-na chu nimin khan Aizawl Mualpui Salem Veng-a R. Dengthuama Hall-ah neih a ni a, thu pawimawh hrang hrang an rel zingah Plastic bur/bottle-in kan ram a tihchhiat nasat avangin a hman tlem dan inzirtir leh thil danga hman tangkai dan kawng zawn chu a tel a ni.

UD&PA Minister K. Sapdanga’n sawrkarin a kalpui mek Bana Kaih hmanga kaihchhuah theih turin mipuiten ban an phar a, an penchhuah a ngai tih a sawi.

Karnataka sawrkar hnuaia Revenue Department kalphung zirchiang turin Land Revenue and Settlement Minister B. Lalchhanzova chuan niminpiah khan Karnataka a thleng a, nimin khan Karnataka Revenue Minister Krishna Byre Gowda chu a pisa, Vikasa Soudha-ah hmuin State pahnih te in laichinna ti chak tura thawh-puiah sawmin, Karnataka-ah a bikin Bengaluru khawpui ah Mizo thahnem tak an awm ve thu leh a tul anga an thlavang lo hauh thin turin a chah a. An sawrkar tirh atanga an lo ruahman tawh tih hlawhtlin ani chu a lawmthu sawiin, Karnataka State chu India ram State zinga Land Revenue administration nei tha leh technology thar hmang tangkai ber te zing ami anih anga tlawh annih thu a sawi bawk.

Chief Minister Lalduhoma chuan nizan hmasa khan New Delhi-ah Assam Rifles Director General Vikas Lakhera hmu in Mizorama venhimna chungchanga hmalakna tur hrang hrang an sawi dun a, he hunah hian tunhnaia P&E Minister F. Rodingliana leh Assam Rifles Checkpost duty inkara thil thleng chungchang an sawidun tura ngaih a ni a, Home Minister K. Sapdanga sawi danin Chief Minister Lalduhoma Delhi zin hian Assam Rifles Director General Vikas Lakhera nen an inkawm hunah P&E Minister F. Rodingliana leh Assam Rifles chungchang an sawi dawn a ni.

MNF Treasurer Lalruatkima chuan Local Council leh Village Council term pawh tawi chu a thlangtu mipuite zahlohna niin a sawi.

Mizoram State Project Monitoring Committee chuan nimin khan ‘Construction of Multipurpose Ground at High Field, Mc Donald Hill, Aizawl’ chu tlawhin hnathawk kal mek te an enfiah.

Kolasib District Drivers & Owners Joint Action Committee hruaitute chuan Sethawn leh Kawnpui Quary Area-a kawngpui chhe zual tun thla chhunga thawmthat anih loh chuan na taka hmalak an tum tih an sawi.

National Social Assistance Programme (NSAP) hnuaia Scheme hrang hranga chhawmdawlna dawngtu ten anmahni Bank/Postal Account ah ngei Direct Benefit Transfer (DBT) kaltlanga tanpuina an dawn theihna tura Ministry hmalakna, NSAP-PPS on-boarding programme chu nimin khan Aizawl-ah hman niin Social Welfare Minister Lalrinpuii chuan a hmanpui a. NSAP hnuaia Pension-te hi Central Sawrkar hmalakna bakah Mizoram Sawrkar hmalakna tangkawp a chhawmdawlna pek niin Mizoram sawrkar in a pek tur chu kumin hian September thla thlengin pek a ni tawh a ni.

North East Zone Cultural Cenltre (NEZCC), Dimapur, Ministry of Culture, Govt. of India leh Art & Culture Department, Mizoram tangkawp buatsaih India rama hnam hrang hrangte inpumkhatna leh hnam ziarang inhriatpawhtawnna leh chawilarna 'Bharat Ko Jano' programme chu nimin khan Vairengte Jt. YMA Playground-ah hman a ni a. He hunah hian Mizoram Governor Dr. Hari Babu Kambhampati chu khuallian niin Nagaland Governor La. Ganesan, Chairman, NEZCC chu khualzahawm a ni.

Chief Minister Lalduhoma chuan nimin khan Sawrkar laipui-a Union Minister of Road Transport & Highways Nitin Gadkari chu hmuin Mizoram chhunga National Highway kawngpui hmasawnna tur hrang hrang an sawi dun.

Kawng chhia leh tuialhthei man sang avanga lungawilohna lantir nana Sumdawng lirthei neitute intelkhawm, Mizoram Commercial Vehicle Union (MCVU) ten nimin zing dar 6:00 atanga an lirthei hrang hrangte an din tir chu nimin tlai dar 4:00 khan tihtawp a ni.

BJP Mizoram President Vanlalhmuaka chuan Union Minister hrang hrangte hmuin Mizoram mamawh thil te a sawipui.

MNF President Zoramthanga chuan an party mipuite chu phur taka leh tha thlah hauh lova kan ram kan hnam tan theihtawp chhuah zel turin a sawm.

Congress thalaite chuan Education Department hnuaia Samagra Siksha Mizoram leh Thar-thilthlentu Entrepreneurship and MSME Support Society (TiLi) in 'Project Intodelh Inzirtir a 2024-2025' atana thawhdunna an ziah a dik lo taka pawisa in siam chungchang chhui turin nimin khan Lokayukta-ah lehkha an thehlut.

Healthy Lunglei District Campaign hnuaia hriselna kawnga hmalakna kalpui mek atan Lunglei District Deputy Commissioner Office in RailTel Corporation of India Limited, New Delhi atanga Corporate Social Responsibility (CSR) kaltlanga tanpuina sum an haichhuah hlawhtlinna tur atana nimin khan inremna thuthlung (Memorandum of Understanding - MoU) an ziak a, he MoU ah hian Lunglei District Bawrhsap R. Lalthazuala leh RailTel Corporation-a Executive Director (CC) Harish Pawaria te chuan an hming an ziak a. Lunglei Bawrhsap chuan Healthy Lunglei District Campaign hnuaia khua leh tuite hriselna dinhmun endikna leh hriselna lam inzirtirna beihpui thlak mek atana RailTel Corporation te'n CSR kaltlanga tanpuina an rawn pe thei tur chu lawmawm a tih thu a sawi a ni.

African Swine Fever (ASF) chu kum 2024 chhung atan leh Mizoram State huamchhung atan State Specific Disaster-ah puan a nih tak avangin Disaster Management Act, 2005, Section a8(1)(a) hnuaia siam, State Disaster Response Fund (SDRF) atangin chhawmdawlna pek an ni dawn.

Ni hnih awh tur India rama Buhtun chawikanna, Promotion of Millets in India Programme chu nimin khan Aijal Club-ah hman niin he hun hi Agriculture Minister PC. Vanlalruata chuan a hmanpui a ni.

Mizoram Commercial Vehicle Union (MCVU) chuan Oil man sang leh kawng chhe nasa lutuk avanga lungawilohna lantirin Vawiin October 23, 2024 hian Service lovin an ding dawn tih an sawi.