Frontline Worker Training neih tur PM in a hawng

Rampum-a COVID-19 Frontline Workers Training neih tur chu nimin khan Prime Minister Narendra Modi chuan hawngin Mizoram atang pawhin mi 160 training pek tum an ni.

PMKVY 3.0 (CSCM) Scheme hnuaia kalpui tur ‘Customised Crash Course Programme for COVID-19 Frontline workers’ hi Video Conferencing kaltlangin Prime Minister hian a hawng a, State 26 atangin Training Centre 111-ah kalpui a ni dawn a. Mizoram-ah chuan Mission Foundation Movement, Bawng-kawn chu National Skill Development Corporation leh Healthcare Sector Skill Council hnuaia Affiliation nei an nih angin he Course kalpui tur hian sawrkar laipui chuan a thlang a ni.

COVID-19 hri leng mekah Frontline Worker mamawhna a san em avangin mi nuai 1 train chhuak turin Ministry of Skill Development & Entrepreneurship leh Ministry of Health and Family Welfare chuan ruahmanna siamin State tina Accredited Training Centre Performance tha 111-ah a thawhkhatna atan kalpui tan turin ruahmanna a siam a, hemi atan hian Central sawrkar chuan cheng vbc. 275 chu Budget a dah a ni.

Central sawrkar chuan Job role 6 rawn duangchhuakin, heng zinga mi Covid - Basic care support (GDA) chu kalpui tura thlan a ni a. Training Fee awm loin, stipend hi PFMS kaltlangin central sawrkar in zirlaite account-ah a thun ang a, Accidental Insurance cheng nuai 2 thleng he Scheme hian a keng tel dawn bawk a ni.

Labour, Employment, Skill Development & Entrepreneurship Department leh Aizawl DC kaihhruai District Skill Committee kaltlangin he training-a tel turte hi lak an ni a, a thawhkhatna atan mi 160 Training pek tumin ruahmanna siam a ni. Batch khatah 20 zel awmin training hi kalpui tur a ni a, ni 21 chhung training tur niin, Training zawhah Health Department hnuaia Hospital hrang hrangah thla 3 chhung (On job training) duty leh tura ruahman a ni a. He programme hi Non-Medical Healthcare Worker indaihlohna chhawk zangkhai tur leh hmalam hun atana lo inbuatsaihna tur Scheme a ni.