Chanchin thar thenkhat :

H&FW in thuchhuah siam

Health & Family Welfare Department-a Secretary, R. Lalramnghaka chuan thuchhuah siamin COVID-19 hripui dona atana mimal leh pawl thahnemngai te'n Health & Family Welfare Department hman tura tanpuina chi hrang hrang an pe thin chu a lawmawm tih tarlangin, hetianga tanpuina thilpek te hi mumal taka record vawn leh a semzai a nih theih nan a remchan phawt chuan thilpek petu ten Secretary leh Principal Director, Health & Family Welfare Department te hriattir zel tur leh thilpek dawngtu tur Office-ten a petu turte lo bengvar zel tur a ni tih a tarlang a. A petu lamin hetianga hriattir hi a remchang lo a nih pawhin, thilpek dawngtu Medical College/Hospital hotute'n thilpek dawn chungchang hi a hma thei angin a chunga sawi thuneitute hnenah hian report vat tur a ni tih an tarlang bawk.

Synod in CM hnenah thlen

Mizoram Synod Puipa te chuan nimin khan Chief Minister, Zoramthanga chu a Office-ah kawmin thenawm State nena ramri buai chinfel thuai a nih theih nana hmalak chungchang leh India Danpui 8th Schedule-a Mizo tawng telh chungchangte an sawiho a. Synod thurel anga ramhruaitute hnena thu thlen tura thutlukna lo siam tawh bawhzuiin Synod puipate hian Chief Minister hi hmu an ni a. Chief Minister chuan an thu thlen chu lawmawm tiin, a remchan ang zela bawhzui a nih tur thu a hrilh a ni.

OFC chhe thin ah FIR thehlut

Covid Task Force on Mobile and Internet Services chuan Optical Fiber Cable (OFC) tichhe thin te lakah FIR an thehlut tih sawiin, Mizoram chhung khaw hrang hranga khawtlang hruaitute leh mipuite pawh Fibre Cable pawimawhzia hriaa lo venpui tur leh dimdawi turin an ngen a. Heng Fiber te hi a chah chuan a tuartu chu mipui bawk kan ni leh thin tih sawiin, tunlaiah phei chuan zirlai ten an tuar nasat lehzual avangin a tichhe thin te chu thuneitute hnena hrilh vat turin an ngen bawk.

Division Bench siam turin ti

RT-PCR for Chhimbial in Lunglei Civil Hospital-a RT-PCR khawl bun thuai a nih theihna tura inrawlh tura Gauhati High Court an ngenna, Public Interest Litigation (PIL) Aizawl Bench-a an thehlut chu nimin khan Gauhati High Court Single Bench-ah pharh a ni a, Gauhati High Court Aizawl Bench Registrar chu he PIL ngaihtuahtu tur Division Bench (Judge pahnih awmna) siam tura tih a ni. RT-PCR for Chhimbial hian Mizoram sawrkar in an dikna chanvo 'Right to Life' a palzut saka an ngaih thu lo sawi tawhin, Lunglei-a RT-PCR khawl dah tumna chu sawrkar in a dodal niin an ngai a ni.