Chanchin thar thenkhat :

Harsatna chinfel thuai duh

Hnahthial Town Village Council Association chuan Mizoram Truck Drivers' Association (MTDA) in Hnahthial-ah buhfai dah a tum tawh loh thu an sawi chu sut leh hram se an duh thu an sawi. Nimin khan Hnahthial South-II VC House-ah thuthar lakhawmtute kawmin, Hnahthial Town VC Assocation President, HC. Rohming-thanga chuan, COVID-19 hrileng laka mipuite himna tura Hnahthial hmarlam kawtchhuah a duty-te leh buhfai phur Truck driver, Lalbiakdika te inhmuh thiamlohna chu a punlun zawngin kal lo se, an dikna laite inhmuh thiam sak tawnin an diklohna ah inngaidam tawn se an duh thu a sawi a. Hnahthial Sub-Hqrs. YMA hruaitute pawhin nimin khan thuthar thehdarhtute kawmin hripui len vanglai-a hetiang boruak duhawmlo a awm chu pawi an tih thu leh chinfel thuai tha an tih thu an sawi bawk.

Bial tan Ambulance hlan

Aizawl North-II bialtu MLA, Dr. Vanlal-thlana chuan Aizawl North-II huamchhunga damlo leh harsatna tawkte tana hman tur, MLA Fund atanga Ambulance a lei chu nimin khan a hlan a, Ambulance hlanna hunah hian a bial chhunga LLTF atangin aiawh mi pakhat theuh telin bialtu MLA chuan May 23, 2021-a LLTF Chairman te leh Councillor te nen inrawnkhawmna an neih tuma an mamawh bera an sawi bawhzuina a nih thu a sawi a ni. He Ambulance lei thar Driver tur hi bialtu MLA hian a rawih sak rih dawn a ni. Hei bakah hian Aizawl North-II bialtu MLA hian MZU hnuaia Under-Graduate zirlai exam tur ten inbuatsaihna atana an hman tur leh exam chhanna atana an hman turin lehkhapuan a sem nghal bawk a ni.

Mizoram hnenah bungrua hlan

Khalsa Aid, Delhi chuan Mizoram-in CO-VID-19 a dona tur bungrua thahnem tak, Oxygen Concentrator 30 leh Stabilizer 15 a rawn pe a. Heng bungrua te hi nimin khan Mizoram rawn thlengin, Health Department ah hlan nghal a ni.

ZORO in UN-ah ngenna thlen

Zo Reunification Organisation (ZORO) chuan tunhnaia Mandit (Myanmar)-a Myanmar sipaite chetna leh mipui tawrhna te chu mihring nihna chanvo inpalzutsakna rapthlak tak a ni tih sawiin, tualto hnamte diklo taka rah behna a ni tih an sawi a. Myanmar sipaite kut atanga Mindat chhanchhuak tura ngenin UN peng pahnih, United Nations Permanent Forum on Indigenous Issues (UNPFII) leh United Nations Human Rights Commission (UNHRC) te May 28, 2021 khan lehkha a thawn tih an sawi bawk. ZORO chuan Myanmar buaina hi an ramchhung thil mai nia ngaih theih a ni lo tih chu an ngaihdan a ni reng tih an sawi bawk.