Serchhip Sub-Hqrs. YMA in HSLC leh HSSLC Exam-a Top 10-a lang zirlaite an chawimawi

Serchhip Sub-Hqrs. YMA chuan HSLC leh HSSLC Exam result chhuakta a Mizoram puma Top 10-a lang phak an huamchhung ami te chawimawina hun nimin khan an buatsaih a. Hei hi YMA Kumpuan 'Zirna Uar' chungchanga hmalakna niin College zirlai Exam result chhuaka titha bik te pawh chawimawi leh tura ruahman a ni.

Serchhip Sub-Hqrs. YMA Conference Hall-a zirlai tithate lawmpuina hun hi Serchhip Sub-Hqrs. YMA Kumpuan Committee Chairman leh Sub-Hqrs. YMA Vice President, Lalrammawia chuan kaihruaiin YMA chuan kum 1983 atangin kan ram mamawh ang zelin Kumpuan te neia hma an lo lak tawh thin thu a sawi a. Hemi ang hian kum 1996 leh 1997-ah te 'Zirna Uar' chu Kumpuan ah an lo neih tawh thu sawiin, hemi atanga kum 20 vel a liam hnuah Mizote zinga Central Service kan tlem tak zel avang leh zirna lamah nasa zawka hmalak a tul leh ta nia a lan avangin kum 2016-a YMA General Conference chuan Mizote zingah Central Service ah mi tam zawk an luh theihna tura hmalak a lo rel tawh thu leh hemi ang deuh bawk hian Kohhran te pawhin thu hrang hrang an rel thu a sawi.

Hetianga an thurel tawh tih hlawhtlinna atan hian nasa zawka lehkha kan zir a, a Hnam ang pawha hma kan lak a tul thu sawiin, chumi atan chuan YMA chuan Kumpuan-ah 'Zirna Uar' an hman leh tak thu a sawi a. He hmalakna atan hian zirna lama hlawhtling te chawimawi chu thil pawimawh tak a ni tih sawiin, heng mite hi khawtlang huapa ropui taka chawimawi duh viau mah se hri leng nen punkhawm tam a remchan tak loh avangin hetiang hian mi tlemte te nen chawimawina hun an buatsaih tak thu a sawi a, zirlaite chu an hmalam huna an kal zelna turah duhsakna a hlan bawk.

He hunah hian HSSLC Exam-2021 a Commerce Subject-a Mizoram puma pakhatna, C. Lalrintluangi D/o C. Lalduhawma, Serchhip P&E Veng (Oikos HSS, Aizawl) te, Science Subject-a Mizoram puma 5-na F. Remsangpuia S/o F. Remnalalnghaka, Serchhip IOC Veng (St. Paul's HSS, Aizawl) leh HSLC Exam-2021 a Mizoram puma 9-na, Vanlalhriati D/o Hming-chhuanmawia (L), Dinthar Veng Serchhip (Marian H/S) te hnenah chawimawina thuziak leh Dictionary an hlan a, lehkha an zir dan leh kal zel an tum dan te an sawi bawk a ni.

Nimin hun hmanna ah hian Serchhip Sub-Hqrs. YMA Office Bearers leh Kumpuan Committee Member te an tel a ni.