Mizoram-ah hri kai 236 hmuhchhuah leh an ni

Mizoram-ah COVID-19 hri kai enkawl dam pung ve zel mah se hri kai hmuhchhuah erawh ala tlahniam thei meuh lova. Niminpiah khan Sample 3021 enfiah niin hri kai mi 236 zet hmuhchhuah leh an ni.

Niminpiah khan ZMC Laboratory-ah Sample 606 enfiah niin heng atang hian hri kai mi 27 hmuhchhuah leh an ni a, an zinga a tam zawk te hi hri kai hmuhchhuah tawh nen inkawmhnaihna neih avanga inkhunghrang lai niin COVID Free Certificate neih duh avanga Sample Test zingah hri kai mi 3 lai hmuh an ni a, ZMC-a Healthcare Frontline Worker zingah hri kai pakhat hmuh a ni bawk. District hrang hranga TrueNat Laboratory-ah Sample 92 enfiah ni bawkin hri kai mi 4 hmuh an ni a, Saitual District-ah hri kai 2 hmuh niin Serchhip leh Lawngtlai District-ah hri kai pakhat ve ve hmuh an ni.

Niminpiah khan Mizoram-ah Rapid Antigen Test hmangin Sample 2323 enfiah a ni bawk a, heng atang hian hri kai 205 zet hmuh an ni a, an zinga mi 150 te chu Aizawl District-a Sample enfiah an ni. Aizawl District-a hri hmuhchhuah zingah hian Dinthar Veng mi 29 zet an tel a, Armed Veng South atangin mi 28 leh Phunchawng atangin mi 15 hmuh an ni a, Veng mal-a hri kai hmuhchhuah tamna zual te an ni a. Central Jail a tang zingah hri kai mi 4 hmuh niin hri kaina hriatloh an ni. Heng bakah hian Kolasib District-ah hri kai mi 25 hmuh niin Siaha District-ah hri kai mi 12 hmuh an ni a, Lunglei District-ah hri kai mi 9 hmuh niin Khawzawl District-ah 3, Mamit leh Serchhip District-ah hri kai 2 ve ve leh Lawngtlai leh Hnahthial District-ah hri kai pakhat ve ve hmuh an ni bawk.

Nimin khan Mizoram-a COVID-19 hri kai zingah mi 216 te chu enkawl dam an ni ve leh a. Heti hian Mizoram-a hri kai hmuhchhuah chu 16,135 an ni ta a, an zinga 12,630 te chu enkawl dam ni tawhin hri kai hmuhchhuah atanga za zela 78.27 te enkawl dam an ni tawh a, hri kai enkawllai 3430 an la awm mek a ni.

Hri kai zingah nunna chan mi 3 awm belh leh :

Mizoram-a COVID-19 hri kai hmuhchhuah zingah nimin khan mi 3 boral lehin hri kai zingah mi 75 an boral ta a ni. Nimin zing dar 1:20 khan Lalawmpuia (41), Venghlui Aizawl chu ZMC-ah a boral a, May 31 khan a nu chu COVID-19 vang hian a lo boral tawh bawk a ni. Nimin zing dar 3:02 khan Hmangaihzuali (35), Tuithiang Veng chu ZMC-ah a boral ve leh bawk a, ani hi May 26-a hri kai hmuhchhuah niin naupai lai a nih avangin June 4 khan a naupai hi zaichhuah a lo ni tawh bawk a, a naute erawh a tha niin sawrkar thuchhuah chuan a tarlang a ni. Nimin vek chawhnu dar 2:15 khan Hreumawii (88), Electric Veng Aizawl chu ZMC-ah a boral ve leh bawk a, Aizawl Electric Veng-ah hri kai boral mi 8 lai an awm tawh a ni.