Latest News

Chanchin thar thenkhat :

FMGE&W in vbc. 3 hlan

Mizoram-a sawrkar hnathawk inzawmkhawm pawl lian ber, Federation of Mizoram Government Employees & Workers (FMGE&W) chuan hri leng dona kawnga hman tura an member te sum thawhkhawm cheng vbc. 30 chu nimin khan Chief Minister's Relief Fund for COVID-19 ah an chhunglut a, he sum hi FMGE&W hruaitute chuan CM Office-ah hlanin an member zawng zawngin an la thawh kim theihloh avangin a dang la lut tur a awm thu an sawi bawk. Nimin vek khan Chief Secretary, Lalnunmawia Chuaungo chuan CM Relief Fund for COVID-19 ah hian Rs. 15,000 pe in, State Institute of Rural Development & Panchayat Raj (SIRD&PR) ten Rs. 76,524 an pe bawk a ni.


CMRF pekchhuah leh rel

Committee on Utilization of Chief Minister’s Relief Fund for COVID-19 chuan Lockdown avanga chhuanchham te tanpuina atan CMRF atangin Rs. 1,55,98,000/- semchhuah an remti a. Aizawl District tan Rs. 89,78,000/-, Lunglei District tan Rs. 12,00,000/- leh Siaha, Lawngtlai leh Champhai District tan Rs. 7,50,000/- theuh dah a ni a. Kolasib, Mamit, Serchhip, Saitual, Khawzawl leh Hnahthial District tan Rs. 5,00,000 theuh sanction a ni bawk. Heng bakah hian Aizawl District-a Sairang Dinthar tan CMRF atang hian Rs. 50,000/- ruahman a ni a, Lawngtlai District-a Karlui tan Rs. 20,000/- leh Champhai Sub-Hqrs. YMA tan Rs. 1,00,000/- sanction a ni bawk.


Ration khulna tur tum sak

Aizawl South-I bialtu MLA, C. Lalsawi-vunga chuan a bial chhunga AAY leh PHH Ration Card nei te June thla Ration buhfai chu a khul sak a, Aizawl West-III bialtu MLA, VL. Zaithanzama pawhin a bial chhung Veng hrang hrang pakua-a AAY leh PHH chhungkua te chu June thla Ration buhfai khulna tur MLA Fund atangin LLTF te kut-a a hlan bakah AAY te hi Ration Chini khulna tur sem an ni leh bawk ang.


AR hotu leh Larsap inkawm

Mizoram Governor P.S.Sreedharan Pillai leh Assam Rifles hotulu ber, Director General Lt. Gen. Pradeep Chandran Nair, AVSM, YSM te chu nimin khan Raj Bhavan-ah inkawmin Mizoram chhunga Assam Rifles te hnathawh hrang hrangte bakah thil pawimawh dang te an sawidun bawk.


MADC-a thawktu ten hlan

Mara Autonomous District Council (MA-DC)-a thawktu hrang hrangte chuan an nikhat hlawh theuh an thawh tlingkhawm Rs. 32,86,112/- chu COVID-19 hri leng dona atan CEM Relief Fund-ah an chhunglut a, heng sum te hi nimin khan Pachi Hlychho Executive Secretary, MADC chuan MADC CEM, N. Zakhai kutah a hlan a ni.


Lunglei-ah hri leng sawiho

Nimin khan Lunglei DC Conference Hall-ah COVID-19 hrileng avanga inkharkhip kalpui mek leh hrileng do kawnga hmalakna te leh hmalakna tura tul te sawihona neih a ni a, he hunah hian DLTF Member te, Incident Commander-te, Lunglei District VC Association hruaitute leh Sub Hqrs. YMA hruaitute telin HPC Vice Chairman, Lawmawma Tochhawng leh Dr. K. Pachhunga MLA te pawhin an telpui a ni.

Comments

Chhiar Hlawhte