Hri kai thar 268 leh enkawl dam 194 an awm

Niminpiah khan Mizoram-ah Sample 4248 enfiah leh niin heng atang hian COVID-19 hri kai 268 hmuhchhuah belh leh an ni a, Mizoram-a hri kai hmuhchhuah chu 15,631 an tling tawh a ni.

Niminpiah khan ZMC Laboratory-ah Sample 1508 enfiah niin heng atang hian hri kai mi 89 hmuhchhuah an ni a, heng te hi Aizawl District-a Sample lak te vek niin Sairang Dinthar Containment Zone atangin hri kai mi 13 hmuhchhuah an ni. ZMC Laboratory atanga hri kai hmuh zinga a tam ber te hi hri kai tawh nen inkawmhnaihna neih avanga inkhunghrang lai an ni a, tunhnaia State pawn atanga rawn lut inkhunghrang lai te pawh an awm bawk a ni.

District hrang hranga TrueNat Laboratory-ah Sample 92 enfiah ni bawkin hri kai mi pahnih hmuh an ni a, heng hri kai hmuhchhuah te hi Lunglei leh Siaha District ami te niin Lunglei ami hi hri kai tawh nen inkawmhnaihna nei a nih laiin Siaha District ami hi hri kaina chhui ngai a ni thung.

Niminpiah khan Rapid Antigen Test hmangin Mizoram-ah Sample 2648 enfiah leh a ni bawk a, heng atang hian hri kai mi 177 hmuhchhuah an ni a, an zinga 111 te hi Aizawl District a hri kai hmuh-chhuah niin Kolasib District-ah hri kai mi 28 hmuh an ni a, Lawngtlai District-ah hri kai mi 10 hmuh niin Siaha leh Saitual District-ah hri kai 7 ve ve hmuh an ni a, Lunglei District-ah hri kai mi 6 hmuh niin Mamit District-ah 5 leh Serchhip District-ah 3 hmuhchhuah an ni bawk.

Nimin khan Mizoram-a COVID-19 hri kai mi 312 te chu hri lakah fihlimin anmahni enkawlna hmun atanga chhuahtir an ni a, heti hian nimin tlai thleng khan Mizoram-a hri kai hmuhchhuah chu 15,631 niin heng zinga 12,191 te chu enkawl dam an ni tawh a, hei hi hri kai hmuh tawh atanga chhutin za zela 77.99 niin tunah hian hri kai enkawllai 3369 an la awm mek a ni.

Hri kai zingah nunna chan pakhat awm belh :

Nimin khan Mizoram-a COVID-19 hri kai zingah nunna chan mi pakhat awm belh lehin Mizoram-a hri kai zingah nunna chan mi 71 an awm ta a ni. Nizan dar 6:30 khan Thanmawii (92), Sairang Dinthar chu a boral a, Thanmawii hian June 2, 2021 khan COVID-19 hri a kai tih hmuhchhuah niin In lamah enkawl zui a ni a, amaherawhchu nizan khan a boral zui ta a ni. Heti hian nizan thleng khan Mizoram-a hri kai te zingah nunna chan mi 71 awm tawhin tun thla chhung ringawt hian mi 31 an boral tawh a, Mizoram-a COVID-19 hri kai hmuhchhuah an awm hnuah tun thla hi thla khat chhunga hri kai boral an tam ber tum a ni tawh bawk a, hei mai bakah hian tun thla chhung hian June 12 tihloh, nidang zawng ah hri kai boral hi an la awm ziah bawk a ni.