Signal tha pek dan tur sawiho

Mizoram chhunga Mobile phone Service Provider BSNL, Airtel leh JIO hotute chu nimin khan MZP General Hqrs. hruaitute nen Aizawl a MZP Pisa Pui-ah thukhawmin tun aia Mizoram hmun hrang hranga Mobile Tower tam zâwk bun leh signal tha zâwk pechhuak thei tura hmalak dan tur an sawiho.

He sawihona hunah hian MZP President, B. Vanlaltana chuan Service provider te chu hlâwkna chiah ûm lova, mipui rawngbawltu an nihna hria a, tun aia nasa zâwk leh tha zawk rawngbawl hna thawk turin a ngen a ni.

He hunah hian JIO lama aiawh chuan, a tul anga Tower 19 bun belh an tum mek thu leh Covid hrileng avanga hnathawktu an lo luh mumal loh avanga la in tifel thei lo an ni thu sawiin, Mizoram hmun hrang hrangah Tower awm tawh la nung lo chu sum leh pai lam buaina ni lovin, Optical fibre a la thlen loh vang leh a thlen thuai theih nan hmalak mek a nih thu a sawi a. Airtel aiawh pawhin Mizoram chhung Signal chhiatna hmun hrang hrangah Signal pe chhuak tha thei tur Tower bun belh a nihna turin project kalpui mek a ni tih sawiin, Airtel Tower awmna hmuna signal chhia chu Customer Care complain-na siam ah rang taka complain thin tur leh an harsatna thlen vat turin a ngen bawk a ni.

BSNL aiawh pawhin 4G leh 3G Tender nghah mek a ni tih sawiin, Tender tihfel a nih ve leh BSNL Tower bun tura an inpuahchah mek thu a sawi a. Tunhnaia Mizoram mipui zirlai tam takin harsatna an tawh chhan  chu Service Provider te ang thoin Optical Fibre an lo zai chhiat bâkah kawng siam ten Fibre an lo hrut chhiat vang a nih thu a sawi bawk.

MZP leh Service provider te chuan Mizo-ram mipuite leh zirlaite’n harsatna an tawh loh nan Mobile Tower bun belh leh signal tha tak neih a nih theih nan 132 KV Line fibre kal tir a nih theih nan State sawrkar ngen nise an ti bawk.