Latest News

Tui chungchang CM-ah thlen

Serchhip khawtlang hruaitute leh tlawmngai pawl bakah rorellai Party te chuan Chief Minister Zoramthanga hnenah lehkha thawnin Serchhip mipui ten Tui lama harsatna kan tawh mek sutkian a nih theihna tura hma lak sak turin an ngen.

Serchhip Joint VC, Serchhip District NGO Coordination Committee, Serchhip District Consumers Association leh Serchhip East Block MNF te hian Chief Minister hnenah lehkha theh-lutin, Serchhip khaw tui harsatna sutkian sak tur hian an ngen a ni.

He lehkha an thehluh ah hian Serchhip khua in kan rin ber, tuna PHE Tui Pump khawl hian Serchhip mipuite khamkhawp a chawm zo tawhlo tih tarlangin, kum 1997-a commission niin kum 25 lai rim taka hman a lo nih tawh thu an tarlang a. Tunah hian he khawl hmang hian chhun zan zawmin nikhat-ah darkar 24 Tui pump chhuah reng a nih thu leh khawl a hlui tawh avangin hei aia tam hi pump chhuah theih a nih loh thu an tarlang a. Hei vang hian PHE Department lam pawhin an Tui sem thin chu nasa taka ti hniamin tunah hian Connection pakhat tan kar khat-ah litre 2500 zelin an semrual ta tih an sawi.

Heng pawl hrang hrangte hian Chhungtin te hi PHE Tui sem ring kan nih avang leh Tuikhur tui chawi tur kan neih tawhloh avangin khawsak ngaihna a awm ta meuhlo nia tarlangin, chawlhkar khat atana litre 2500 chu chhungkaw member tlem tan pawh khawsakna tham a tlinglo niin an tarlang a. Hetiang a nih avang hian Serchhip mipui ten Tui harsatna lian zawk kan tawh loh nan Serchhip PHE Tui Pump chu tun aia tam zawk pump chhuah a nih theih nan leh tuna mipui tena harsatna an tawh mek hi chhawk zangkhai a nih theih nan a tul dan ang anga hma lak sak turin an ngen tih an lehkha ah hian an tarlang a ni. Heng pawl hrang hrangte hian Chief Minister hi hmuh tum mah se remchan zawkna avangin nimin khan MNF East Block hruaitute chuan lehkha an thehlut ta zawk a ni.

Comments

Chhiar Hlawhte