Politics dahthaa mipui rawngbawl turin beisei

ZPM Leader, Lalduhoma chuan ZPM Party chuan hri dona kawnga sawrkar hmalakna te an thlawp tlat tih sawiin, Politics dahthaa ram mipuite tana rawngbawl tura an beisei thu a sawi.

Nimin a thuchhuah a siamah ZPM Leader, Lalduhoma chuan hri leng dona ah kan sawrkar in theihtawp a chhuah tih sawiin, 2nd Wave-ah phei chuan thlakhat chuang inkhung tawhin Vawiin thlengin kiam lam a la pan theilo tih a sawi a. Chutih mek laiin eizawnna khaihlakin Khua, Veng leh chhungkaw tam tak chhuanchham kan awm mek bawk tih sawiin, Frontline Workers ten hah sawi lovin Vawiin thlengin phunnawina tel lovin hna an thawk mek zel chu chhuanawm a tih thu a sawi a. Hrileng dona kawnga pawimawh em em chu Testing, Tracing, Treatment a ni tih mithiam ten an sawi bakah Vaccine pek hna kalpui mek pawh chak lehzuala kalpui theih tha a tih thu a sawi bawk.

ZPM Leader chuan tun dinhmunah ICMR-in Gold Standard a tih, RT-PCR test-na chu hmun khatah chauh kan la neih thu leh Lunglei-a RT-PCR khawl din turah harsatna leh chhuanlam dang hmanga din hun tihkhawtlai reng a ni chu hriatthiam a harsa ta hle tih a sawi a. Sawrkar hian pawimawh a ti takzet a, mipui mamawh hi a dah hmasa a nih chuan politics dahthain tihdan hi a hriat a rin thu leh harsatna karah pawh arang thei ang bera din theih a ni tih a lantir thuai a beisei thu a sawi bawk.