Chanchin thar thenkhat :

/

CM leh Governor te kawm

Nimin khan General Officer Commanding-in-Chief, Eastern Command, Lt. Gen. Manoj Pande, AVSM, VSM chuan Chief Minister, Zoramthanga chu a Pisa-ah a kawm a. He hunah hian Chief Minister chuan Assam Rifles te chu ramri ven chungchangah te leh environment hum-halh kawnga an thawhhlawk thu a sawi a. Ram-dang nena inri kan nih avanga Mizoram leh India hmarchhak State thenkhatte pawimawhna te pawh an sawidun bawk a ni. Lt. Gen. Manoj Pande hian Chief Minister chu COVID-19 dona kawnga hma la tha a tih thu a hrilh bawk.

Lt. Gen. Manoj Pande hian nimin vek khan Mizoram Governor, P.S.Sreedharan Pillai chu Raj Bhavan-ah kawmin ram venhimna kaihhnawih thil leh thil pawimawh dang te an sawidun a ni.


Press Accreditation Card hlan

Champhai District Bawrhsap, Maria CT. Zuali chuan nimin khan Undivided Champhai District atanga Press Accreditation hmu thar mi 13 te hnenah Press Accreditation Card a hlan a, he hunah hian Champhai DC chuan chan-chinbumite chu District hmasawnna tura theih-tawp chhuahtu leh thawh hlawk berte zinga mi nia a hriat thu a sawi a. Media-in nasa taka hma a sawn thu leh mipui hawiher tidanglam dawrh thei tura mawhphurhna lian tak an neih thu sawiin, sawrkar thu leh hla puanchhuah kawngah an thawhhlawk em avangin sawrkar pawhin media mi leh sate a ngaipawimawh hle a ni, a ti. Undivided Champhai District-a Accredited Journalist ni tura pawm mi 13 zinga 10 te hi Champhai District ami te niin midang pathum hi Khawzawl District ami an ni thung.


Dilna thehluh hun hawng

Mizoram State Quota-a Professional Course hrang hrang (NEET leh JEE in a huam ve loh) dil tumte chuan dhte.mizoram.gov.in/page/smatee-form-ah online in dilna thehluh theih a ni a, Form hmasa e-mail hmanga lo thehlut tawh tan tih that ngai lovin form hmasa pawh hman zel theih a ni.


Vaccine la vek turin ngen

Mamit District Bawrhsap, Dr. Lalrozama chuan nimin khan Mamit DC Conference Hall-ah Mamit District chhunga Media te kawmin COVID-19 darh mek zel venna tura Sawrkar hmalakna tha taka puanzar anih theihna chungchang a sawipui a. He hunah hian Bawrhsap chuan Covid vaccine chu hlauthawng lova la vek turin mipuite ngenin, mithiam zawk ten a him ngei a ni tih an finfiah vek tawh anih avangin an Vaccine lak theih hun a lo thlen hunah la vek turin a ngen a ni. Mamit District-ah hian hri kai 289 hmuh ni tawhin enkawllai mi 35 an la awm mek a. District chhunga mi 32,529 te hnenah Vaccine Dose 1-na pe tawhin mi 3769 te hnenah Dose 2-na pek an ni tawh bawk a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »