Latest News

Chanchin thar thenkhat :

Inkhuahkhirhna siamtha

Mizoram-a COVID-19 hri leng avanga inkhuahkhirhna kalpui mek chu tukin dar 4:00 a a tawp hnuah sawrkar chuan July 15, 2021 zanlai dar 12:00 thlenga hman turin inkaihhruaina thar a tichhuak a, hemi chungchanga sawrkar thuchhuah chuan hun rei tak chhung Lockdown kalpui a ni tawh chungin hri kai thar tam tak la awm mah se hri kai zat chhutin inkhuahkhirhna kalpui mek hian nasa takin min veng a ni tih a lantir niin a tarlang a. Chutih rualin, nitin kan ei leh bar zawn kawngah nasa taka nunphung a tihkhaihlak avangin, ei leh bar kawnga kan dinhmun a tlakhniam lutuk loh nan eizawnna hna ngaihtuah chunga inkhuahkhirhna hi kalpui tha a tih thu pawh tarlan a ni bawk.

Ngaihhnathiamna siam leh

Mizoram sawrkar-a Transport Department chuan Motor Vehicle kaihhnawih Document zawng zawng- Fitness Certificate, Permit hrang hrang, Driving Licenses, Registration Certificate, passenger and Goods Tax, Road Tax leh document dang te Feb. 1, 2020 atanga chhiar tanin September 30, 2021 thlenga thi te chu la dam/valid anga pawm an ni ang tih a tarlan bakah hemi hun chhunga Motor vehicle Document thi te chu Late Fee ngaihdam an ni bawk ang tih a tarlang. Hemi chungchangah hian nimin khan MNF party chuan thuchhuah siamin lirthei neitute hmakhua ngai a, inngaihhnathiamna zau tak leh hriatthiam thui tak nei tura Transport Minister TJ. Lalnuntluanga hmalakna chu lawmawm an tih thu an sawi a, mipuite hmakhawngaia a hmalakna ropui an tih thu an sawi bawk.


Sawrkar chungah lawm

Mizorama Sumdawng Pawl, Mizoram Business Co-Ordination Committee (MBCC) chuan Mizoram Sawrkara ngenna an siam anga Transport Department hnuaia lirthei nei ten Chhiah chi hrang hrang an chawite COVID-19 vanga harsatna kan tawh tan tirh, February 2020 atanga September 2021 thleng ngaihhnathiam an ni chu lawmawm an tih thu sawiin, sawrkar chungah lawmthu an sawi. MBCC-ah hian Sumdawng Pawl 71 an awm mek thu pawh sawiin, District danga Sumdawng pawl te tan pawh MBCC hi a zawm theih thu leh thawhhopui atan an sawm thu an thuchhuah an an tarlang bawk.


Vaccine la pung chho zel

Niminpiah June 28, 2021 thleng khan Mizo-ram-ah COVID-19 vaccine chu Dose 5,55,286 pekchhuah a ni tawh a. First dose la mi 5,00,990 awmin Full dose la mi 54,296 an awm tawh a ni. Electoral roll thar ber atanga chhutin Mizoram-ah vaccine la thei (kum 18 chunglam) mi 7,75,106 an awm a, heng zinga mi 5,00,990 (65%) hian vaccine an la tawh a, Vaccine First dose pek hmabak hi mi 264116 la awm anga chhut a ni.


Kolasib-ah Press Accreditation Card semchhuak

Kolasib District-a Accredited Journalist mi 13 te hnenah nimin khan Kolasib DIPRO, Dr. Hming-thanzuala chuan Press Accreditation Card a hlan a, he hunah hian Kolasib DIPRO chuan thuthar lakkhawm leh mipuite hnena thehdarh hna chu hna zahawm, thiamna leh inpekna thuk tak ngai a nih thu sawiin, sawrkarin rintlaka a ngaih Press Accredited Journalist 13 lai mai Kolasib District-ah dawng thei an awm chu lawmawm a tih thu a sawi bawk. Kolasib District-ah hian nitin chanchinbu chhuak 10 leh kartin chhuak pakhat a awm a, heng zingah hian Kawnpui-ah 1, Bilkhawthlir-ah 1 leh Vairengte-ah 2 an awm a. Nimin-a he huna hmanna ah hian MJA hruaitute pawhin thu an sawi a ni.


BJP Thalai hruaitu bang

BJP Mizoram Pradesh YUVA (Thalai) President, C. Lalchhuanawma chuan nimin khan a nihna atanga banna chu BJP Mizoram State President hnenah a thehlut nia thudawn a ni a, Party chhunga boruak thalo awm fo mai te leh election an neiha thil fello tam tak awm ta ziah mai te chu a ban chhan nia thudawn a ni.

Comments

Chhiar Hlawhte