Latest News

Chanchin thar thenkhat :

Covid-19 Package siam thar

Mizoram Building & Other Construction Workers’ Welfare Board (MBOCWWB) chuan COVID-9 hri leng mek avanga an hnuaia hna-thawktu in register-te harsatna chhawmdawl nan ‘COVID-19 Package’ thar a ruahman a. Hemi ang hian COVID-19 hri avanga hnathawktu in register boralte chu an nominee-te hnenah Rs. 3,00,000/- pek an ni anga, CCC/CCCC/ZMC etc. a enkawl ngaite chu Medical Benefit bakah Rs. 10,000/- chhawmdawlna pek an ni bawk ang. Heng hamthatna dawng thei tur hian March 31, 2021-a MBOCWWB membership valid chin te pawm an ni anga, chhawmdawlna dawng tur hian April, 2021 hnu lama COVID-19 veite chauh huamin, chhawmdawlna hi a pahnih (thihna leh damlohna) dil kawp theih a ni lo bawk ang.


Tuikum bialtu MLA in tlawh

Tuikum bialtu MLA leh Assembly Deputy Speaker, Er. Lalrinawma chuan nimin khan Thing-sulthliah PHC behchhana mipui in COVID-19 hri kai te enkawlna tur, 4C an buatsaih chu a tlawh a, MLA Fund atangin Rs. 70,000/- a hlan a, Thingsulthliah 4C hi Rural Training Centre-ah siam niin April 26 atang khan hman a ni a, tunah hian hri kai mi 5 an enkawl mek a ni.


Sample Test runpui neih duh

Mizoram Pradesh Congress Committee (MPCC) Media Department chuan nimin khan thuchhuah siamin Mizoram sawrkarin April 19, 2021-a Total Lockdown a puan atanga ni 50 hnuah pawh hri kai kan tlahniam thei chuang lo tih sawiin, Total Lockdown ringawt hian min chhanlo tih a chiang tawh hle tih an sawi a. COVID-19 second wave bikah hian a veite zingah damdawi In-a enkawl ngai, Oxygen pek ngai leh ICU a enkawl ngai an thahnem sawt hle nia sawiin, hei hi a vei ten a hun taka enkawlna an dawn loh thin vang leh, symptom a lan hnu chauha hriatchhuah an tam vangah an ngaih thu an sawi a. Hri kai hmuhchhuah zung zung an nih theih nan Sample Test runpui chu a rang thei ang bera kalpui ngai an tih thu an sawi bawk.


Sum pekchhuah leh rel

Committee on Utilization of Chief Minister’s Relief Fund for COVID-19 chu nimin khan thu-khawmin Mizoram hmun hrang hranga De-addiction Centre leh Childcare Institution-te puihna tur Rs. 23,39,500/- pek an remti a. Social Welfare & Tribal Affairs Department list thehluh angin District hrang hranga De-addiction Centre-ah enkawl lai mek (inmates) mi 4007 awmin, Child Care Institutions-ah te enkawl lai 672 an awm bawk a. Committee chuan mi pakhat zelah Rs. 500/- hisapin tanpuina pek nise tiin a rel a. Heti hian De-addiction Centre te tan Rs. 20,03,500/- leh Child Care Institutions te tan Rs. 3,36,000/-, a vaiin Rs. 23,39,500/- pek tura ruahman a ni.

Comments

Chhiar Hlawhte