Lunglei-ah RT-PCR khawl bun turin ruahmanna siam

Mizoram sawrkar-a Health & Family Welfare Department chuan thuchhuah siamin Lunglei-ah RT-PCR Laboratory bun tura hma an lak thu an tarlang.

Nimin a thuchhuah an siamah Health Department chuan Lunglei District mipuite duh leh mamawh chu sawrkarin ngai pawimawhin uluk takin a ngaihtuah tih tarlangin, RT-PCR Machine dahna tur hmun him, tangkai taka hman theihna tur 'Laboratory Block' siam tumin hmalak mek a ni tih an tarlang a. He 'Laboratory Block' hi Civil Hospital, Lunglei compound chhungah ngei dah turin ruahmanna siam a nih thu leh cheng vbc. 7.8 man hu Detailed Project Report (DPR) pawh siamin NEC-ah a thehlut tawh thu an tarlang a. He DPR hi NEC-ah umzuiin sanction hmuh thuai beisei a nih thu leh DPR-ah hian Laboratory building bakah hmanraw chi hrang hrang mamawh tur pawh a tel nghal tih an tarlang a ni.

RT-PCR Laboratory bika thawk tur hian Staff hrang hrang a tlem berah mi 10 mamawh a nih thu pawh tarlangin, hemi atana senso tur chu kum khatah cheng nuai 32 chuang a nih thu leh nitin sample 100 vel test tura chhutin (Pathianni tiam lovin) a bawlhlo neuh neuh ah hian kum khatah cheng nuai 192 chuang fe hman a tul tur thu an tarlang a, hemi nen hian a thawktu leh hmanrua senso zat tur chu kum khat-ah cheng nuai 234 aia tlem lo a ni ang tih an tarlang.

Health Department thuchhuah chuan heng zawng zawng hi a puitlin hma chu Truenat Quattro pakhat an kawllai bakah a dang (a tul chuan pakhat aia tam) sawrkarin lei belh turin hma a la mek tih pawh an tarlang a, Truenat Quattro hian ni khatah sample 40-45 a test thei a, pahnih an neih chuan ni khatah sample 80-90 tal chu an test thei dawn tih an tarlang bawk a ni.