Ramdaidep hmuhchhuah thar ah Mizo lal hming chawi

India hmarchhak state pahnih atangin Ram-daidep (Cyrtodactylus) Species thar pahnih ve ve hmuhchhuah a ni a, species thar pakhat hming chu Mizo lal hmingthang Bengkhuaia hming chawia phuah a ni.

Nikum October-November chhung khan Assam leh Mizoram atanga Scientist Group pahnih te chuan Mizoram leh Meghalaya State chhunga an zirchianna atangin Ramdaidep chi thar pahnih ve ve an hmuchhuak a. Mizorama hmuhchhuah thar pahnih zinga pakhat hi Sailam lal Bengkhuaia hmingchawia phuah niin, chu chu 'Cyrtodactylus bengkhuaiai' tih a ni a, Sailam ram atangte man a ni.

“Hetiang a Mizo Lal Bengkhuaia hming ti ropui lehzual tur a nungcha tenau (invertebrate) mai nilo nungcha hnungzangruh nei (vertebrate), Ramdaidep Species thar Sailamah hmuhchhuah tur alo awm reng hi kan lawm tak meuh meuh a ni,” tiin Prof. HT. Lalremsanga, Associate Professor leh Head, Department of Zoology, Mizoram University chuan a sawi a ni.

A dang pakhat hi Aizawl khawpui chhung leh a chhehvel, Mizoram University campus, Durtlang, Sihphir leh Tamdil ami te niin a hmingah American Herpetologist ropui, Prof. Aaron Bauer hming chawiin ‘Cyrtodactylus Aaron-baueri’ ti a vuah a ni thung.

Ramdaidep te hi khawvel pum huapah Species 307 hriat tawh niin, Indo-Burma hotspot ah Species 27 awmin, chung zing a species pakua te chu India hmarchhakah hmuhchhuah an ni tawh tih Prof H.T. Lalremsanga chuan a sawi a, “Kum 2018 thleng khan India hmarchhak ah hian Ramdaidep hi chi khat, Cyrtodactylus khasiensis chauh awm anga ngaih a ni thin a. Amaherawhchu, kum 2018 atang khan State hrang hrang atangin species thar pariat lai hmuhchhuah belh an ni leh,” a ti bawk.