Lal Thanhawla’n Covid Test runpui nei turin ngen

Mizoram Pradesh Congress Committee (MPCC) President, Lal Thanhawla chuan COVID-19 veite rang taka hmuhchhuah zung zung a nih theih nan leh rang taka a veiten enkawlna an dawn zung zung theih nan Test Runpui (Mass Detection Drive) nei turin Mizoram sawrkar a ngen.

Nimin-a thuchhuah a siamah MPCC President, Lal Thanhawla chuan Mizoram-in COVID-19 thawh hnihna kan tuar mek a, a vei pawh kan pung chakin, nunna chan pawh mi 50 chuang zet an awm ta tih a sawi a. COVID-19 laka invenna atan Mizoram sawrkarin April 19, 2021 atangin Total Lockdown puangin, thla 2 dawnlai kan inkhung tawh tihna a ni tih a sawi a. Total Lockdown hi thil tul tak niin lang mah se, hri vei pun chak dante thlirin hripui do hneh tur chuan inkharkhip piah lamah kawng dang kan dap tel a ngai ta takzet nia a lan thu a sawi a ni.

Lal Thanhawla chuan COVID-19 thawh hnihna kan hmachhawn mekah hian thawh khatna ai chuan a veite pawhin an la na zawkin, nunna chan pawh nasa takin an tam zawk thu leh natna langchhuak (symtomatic) pawh a hma ai chuan an tam ta hle tih a sawi a. “Hei hian a entir chu hri kaite hian thawh khatna hunlai ai khan enkawlna an dawng har a, natna langchhuak hmanin, dinhmun khirh tak (critical stage) a awm, Oxygen pek ngai, ICU-a enkawl ngai an tam phah tih hi a ni,” a ti.

Hetiang a nih avang hian hripui veite hi rang taka hmuhchhuah zung zung a, symptom a lanchhuah hma a enkawlna pek vat vat a, enkawl dam zung zung hi kan mamawh tih sawiin Lal Thanhawla chuan, “Chuvangin, COVID-19 veite rang taka hmuhchhuah zung zung a nih theih nan leh rang taka a veiten enkawlna an dawn zung zung theih nan Test Runpui (Mass Detection Drive) nei turin Mizoram sawrkar ka ngen,” a ti a ni.