Latest News

Hri leng vangin Mizoram-a Jail tang 175 te Bail-a chhuah lailawk an ni dawn

COVID-19 hripui leng vanga Jail tawt lutuk tih ziaawm nan Supreme Court thu angin Mizoram chhunga Jail hrang hranga tang mi 175 te chu Bail-in chhuah lailawk tir an ni dawn a, Serchhip District Jail-a tang mek zingah mi 17 chhuah an ni dawn a ni.

Mizoram Sawrkar tana High Powered Committee chu nimin khan a tum 7-na atan Gauhati High Court, Aizawl Bench-ah an Chairman, Justice Michael Zothankhuma, Judge, Gauhati High Court hova thukhawmin May 20-a thutkhawm an neih tuma an thurel hrang hrang bawhzui a nih dan an thlirho a. Hri leng mekin Jail tangte a luhchilh tur ven nan Supreme Court in Suo Moto Writ Petition (civil) No 1 of 2020-a order a lo chhuah tawh angin India ram hmun hrang hrangah Jail tang te hi a theih chen chenah tih thawl tur a ni a. Chumi atan chuan UTP te, Bail a chhuah tirte leh Convict tawh te pawh dan ruahmanna ang zelin remission pek leh parole leave te pek tur an ni a. Hemi bawhzuina atana District tin Chief Judicial Magistrate te leh Magistrate First Class te'n anmahni Court theuha Bail-a chhuah theih tur list an thehluh te chu he hunah hian ngaihtuah ho in, thubuai tenau nei la Convict loh mi 152 leh Convict tawh mi 23, an vaiin mi 175 te chu Bail-a an chhuah phal sak an ni a, Jail tang chhuak turte chu an chhuah hma in hri an kai leh kai loh endik phawt nise an ti bawk a. Heng Jail tang bail-a chhuahtir tute hi thubuai tenau nei ho an ni dawn a a, Bail-a chhuah turte zingah hian POCSO Act leh ND&PS Act hnuaia thubuai nei te chu an tel lo a ni.

High Powered Committee thukhawm chuan, Jail tang lai te zingah COVID-19 hripui a darh lohna tura hma lak chhunzawm zel te, Central Jail Complex chhunga Women Cell hlui zawk chu Covid Care Centre (CCC) atana chei-bawl that chungchang te, District hrang hranga CJM leh Magistrtate First Class ten an hma zawn theuha COVID-19 hripui darh lohna tura hma an lak tawhna leh, chutiang bawkin Police lamin an hma lak tawh dan te an thlirho bawk a ni.

He Meeting hian Jail tang chhuak tur ten pawn lamah hri an putdarh loh nan tun a chinah Jail atanga chhuak tur te reng reng chu COVID-19 Exit Test neih vek phawt tawh turin an rel a, Jail tang lai zingah COVID-19 damlo serious zual bik an lo awm thulh palha hmalak dan tur kimchang tak relin, chutiang thil a awm palh pawhin Jail tang lai te chu venhimna hnuaia dah hran nise an ti bawk a ni.

Tarlan tawh angin High Powered Committee  hian India ram-a Court sang ber, Supreme Court of India in thupek a lo chhuah tawh anga Jail tang lai te chu COVID-19 hripuiin a luhchilh loh nan leh an zingah he hripui hi darh lohna tura hma lak dan tur hrang hrangte an rel dawn a ni.

Hetianga HPC in ruahmanna a siam chung-changah hian LENKAWL zawhna chhangin Serchhip District Jail Superintendent, Laldingliana Chinzah chuan High Power Committee in Serchhip District Jail-a tang mek zinga chhuah tura a tih mi 17 zingah mi 12 chhuah an nih tawh thu a sawi a. Ser-chhip District Jail-a tang mek zingah hian thubuai neilai leh an thubuai la ngaihtuah zawh loh, Under Trial Prisoner (UTP) mi 15 chhuah tur awmin an zinga mi 10 chu chhuah tawhin mi 5 chu an la chhuah loh thu a sawi a. Thubuai ngaihtuah fel tawh leh an thubuai a thiamloh chantir tawh mi 2 chhuah tur an neih te chhuahtir ve ve an nih tawh thu a sawi bawk.

Heti hian Serchhip District Jail-a tang zinga chhuah tur mi 17 zingah mi 12 chhuah tawhin la chhuahloh mi 5 an la awm tih District Jail Superintendent chuan a sawi a, tunah hian Serchhip District Jail-ah tang mipa 17 leh hmeichhia 4, an vaiin mi 21 an awm mek thu a sawi bawk a. Hri leng laka Jail tang te an him theihna turin theihtawp an chhuah zel thu a sawi bawk.

Comments

Popular News (Last 30 Days)