95.57% enkawl dam tawh

Serchhip District-ah COVID-19 hri kai mi 655 hmuhchhuah ni tawhin hri kai hmuhchhuah atanga za zela 95.57 enkawl dam an ni tawh.

Inrinni khan Serchhip District-a TrueNat Laboratory-ah Sample 27 enfiah niin hri kai pakhat hmuh a ni a, hri kai hmuhchhuah hi Chhingchhip khua-a hmeichhia niin In lama inkhunghrang lai leh hri kaina hriatloh a ni. Inrinni khan Rapid Antigen Test hmangin Sample 127 enfiah ni bawkin Thenzawl-ah hri kai pakhat hmuhchhuah a ni a, hri kai hmuh hi a hmaa hri kai hmuhchhuah tawh, negative result a neih hnua chhuahtir leh In lama ni 7 inkhunghrang lai a ni a, a taksa-ah hri kai lan-chhuahna a neih avanga sample ennawn leh a ni.

Inrinni khan Serchhip District-ah hri kai mi 8 te enkawl dam an ni thung a, heng hri kai enkawl dam te hi 4C Chhingchhip atangin mi 6 leh Nursing School CCC atangin mi 2 te an ni.

Heti hian nimin thleng khan Serchhip District-a hri kai hmuhchhuah tawh chu 655 niin an zinga 626 chu enkawl dam an ni tawh a, tunah hian hri kai enkawllai 26 la awm mekin hri kai zingah nunna chan mi 3 an awm tawh a. Ser-chhip District-a hri kai hmuhchhuah atanga za zela 95.57 te chu enkawl dam an ni tawh a ni.