Sawrkar enkawl School-ah Admission fee zaa 30-a tihhniam a ni dawn - Edn. Minister

School Education Minister, Lalchhandama Ralte chuan Sawrkar enkawl School-ah Admission fee zaa 30-a tihhniam a ni dawn tih a sawi.

Govt. Mizo High School, Aizawl chuan nimin khan an School tual zawl-ah an School atanga HSLC Top 10-a tling leh Subject Topper an neihte chawimawina hun buatsaihin he hun a hmanpuina ah he thu hi Education Minister chuan a sawi a, Minister chuan Mizoram-in hripui avanga hun harsa a tawn mek avangin sawrkarin a enkawl, zirtirtute hlawh a pek School - Govt School, Adhoc Aided, Deficit leh Lumpsum School Higher Secondary School-ah te Class XI Admission Fee chu School-in an lo lak thin zat atangin zaa 30-a tihhniam a ni dawn tih a sawi a. Mimal School dinte pawh ram mipuiin harsatna kan tawk tih hriaa Admission Fee hi lo titlem ve turin a sawm nghal bawk.

Minister chuan nu leh pa te chu an chhungkaw sum leh pai lakluh mila an fate zirna ngaihtuah turin a sawm a, mimal sikul thlatin-a man chawi ngaia luhtirte chu Fee pe thei tura ngaih an nih thu leh luh tawh hnua Fee chawi tur zat tihtlem leh phut ai chuan a thlawna zir theihna, sawrkar School tha tak tak a awm thu leh zirtirtu pawh qualified an nih bakah chhuanawm tak tak an awm thu a sawi a, mahni chhungkaw mila School luhna thlan a tul thu a sawi bawk.

Education Minister chuan HSLC result 2021-ah pakhat mah pass awm lohna School 7 an awm thu leh chung zinga pakhat chu sawrkar School a ni tih sawiin, heng School-te hi insawifiah tura hriattirna pek an nih thu a sawi bawk.

Govt Mizo High School hian HSLC result chhuakta ah khan Exam hmachhawn 295 an nei a, zaa 93.56 in an pass a. An zirlai zingah Lalnunmawii chu a pumpuiah 10-na niin Lalsangpuii leh C. Lalramngaihzuali te chu Social Science-ah Topper an ni. Top 10-a tling Lalnunmawii hi chawimawi nan Laptop hlan an nih bakah Subject Topper pahnihte hi tablet an hlan bawk.

He hunah hian Mizoram Secondary School Teachers Association (MISSTA) chuan Video Clip Tutorial an siam clip 182 chu zirlaiten an lo hman tangkai turin Minister hnenah hian an hlan a. Heng Video Clip te hi Class IX leh X Mathematics niin a pawimawh lai lakchhuah a ni.