Serchhip Town chhunga ASF hri leng laka inpuahchah dan tur sawihona neih a ni

Vawk natna, African Swine Fever (ASF) chu Serchhip khawpui chhungah a hluar zel avangin he hri laka hmalak dan tur leh hri darh zel tur chungchanga lo inpuahchah dan tur sawihona chu nimin khan AH&Vety Department hmalakna in Serchhip Sub-Hqrs. YMA leh Town chhunga VC hrang hrang ten an nei.

He sawihona Serchhip DVO Office Building-a neih hi Serchhip DVO, Dr. R. Lalmakthanga chuan a kaihruai a, he hunah hian Serchhip DVO chuan tunhnaih Serchhip Town chhunga Chhiahtlang leh New Serchhip te chu Vawk hri lenna hmun-ah puan a ni tawh tih sawiin, hei bakah hian Serchhip-ah pawh Vawk thi awm zelin heng te hi ASF vanga thi nia rinhlelhna a lian sawt hle tih a sawi a. Amaherawh chu Serchhip area ami hi ASF a ni tih puang theitu an ni lo tih sawiin, hri lenna hmunah min puang emaw, puang lo emaw pawh nise hri hian min luhchilh ngei dawn nia a lan avangin tun atanga kan lo inpuahchah leh kan lo inralrin theih nan he thutkhawm hi hmanhmawh taka koh a ni tih a sawi bawk.

He thutkhawm ah hian AH&Vety Department hotute bakah Serchhip leh New Serchhip-a VC aiawh mi 12 bakah Serchhip Sub-Hqrs. YMA aiawh mi pathum an tel a, Vawk hri lenna hmuna lo puan tawh ten an hmalakna leh an tawnhriat hrang hrangte tarlangin, hmalak zui dan tur sawiho a ni a. He Meeting hian hri leng laka kan ranvulh te a lo him theih nan damdawi hmanga nitin Vawk In leh a vel kah thianghlim thin a pawimawh thu sawiin, YMA leh VC te pawhin he hri laka fimkhur a tul zia a tam thei angin puangchhuak se an ti a ni.

Hei bakah hian hri darh zel tur venna atan Veng leh Veng-a Vawk leh Vawksa bakah Vawksa atanga siamchhuah thil te inlakpawlh loh a pawimawh thu sawilan niin hemi kawngah hian a theih anga hmalak tlan nise an ti a. Hri lenna hmun, Infected Area-a puan tawhna hmuna Vawk awm te chu hri kai tawh ang veka ngaih an nih thu AH&Vety Department hotute chuan sawiin, hei vang hian Vawk talh reng reng khap a nih thu an sawi a. State sawrkar phalna in emaw Vawk talh phalna lo pek theih a ni lo tih sawiin, Dan bawhchhia te pawh Dan hmanga hrem theih an nih thu an sawi bawk.

Hri leng vanga Vawk thi reng reng chu VC leh YMA te hnena inhriattir tura tih niin Vawk thi te chu damdawi hmanga sawngbawl hnuah lei thuk takah pum tur a ni a, Vawk thi hi mahni ram-a phum tur niin ram neilo tan a tul angin VC ten Vawk phumna tur hmun hi an ngaihtuah sak thei anga, chutiang remchang lo te chuan Mualvawm-a Slaughter House ram-ah a phum thei dawn a ni.

Hetihlai hian nimin chawhnu dar 1:00 thlenga Serchhip District-a ASF hri lenna hmuna Vawk thi chu 188 zet a tling tawh bawk a, nimin chawhnu dar 1:00 atanga chhiarlet-a darkar 24 kalta chhungin Serchhip District-a ASF hri lenna hmunah Vawk thi 20 zet awm belh lehin heng zinga 19 te chu New Serchhip-ah niin a dang pakhat hi Thenzawl-ah a ni thung a. New Serchhip-a Vawk thi 19 zinga 17 te hi Vawk puitling niin a dang pahnih hi Vawk laklawh kan tih ang a ni thung. 

Heti hian Serchhip District-a ASF hri lenna hmuna Vawk thi chu 188 niin heng zinga 118 te chu New Serchhip huamchhung ami an ni a, East Lungdar-ah Vawk 46 thiin Keitum-ah 9, Thenzawl leh Chhiahtlang-ah 7 ve ve leh Vanchengte-ah pakhat te an ni.

Serchhip District-ah hian chhan hriat-loh-a Vawk thi pawh awm belh zelin nimin thleng khan Vawk thi 68 lai a awm tawh a, darkar 24 kalta chhung khan chhan hriatloh-a Vawk thi 4 awm belh lehin heng te hi Serchhip ami vek an ni a, Serchhip-ah hian chhan hriat loh a Vawk thi 56 lai a awm tawh a ni.

Hetihlai hian tunhnaia Serchhip P&E Veng-a Vawk thi Sample lak Mizoram-a en-fiah ah ASF hri hmuh niin Bhopal lama enfiah result erawh hriat ala nilo nia thudawn a ni.