Result fello ah hma la nghal

Tunhnaia MBSE in Higher Secondary School Leaving Certificate (HSSLC) Exam result a tih-chhuaha Govt. Mizo Higher Secondary School zirlaite harsatna tawh chungchangah he School Principal mawhphurhna la mektu chu chawlhtir rih a ni.

Govt. Mizo Higher Secondary School-in an zirlai HSSLC Exam 2021 hmachhawn zinga mi 25 te Internal Mark MBSE-a an thehluh loh chungchangah hian School Education Minister, Lalchhandama Ralte chuan he thil hi sawrkar in a ngai thu ak hle tih sawiin, MBSE lam pawhin hma a lak nghal thu te, Govt. Mizo Higher Secondary School Principal pawh June 21 tlai dar 4:00 hmaa in sawifiah tura an hriattir bakah June ni 22 khan zirlaite result chu MBSE Exam Committee in a buatsaih nghal tih a sawi a, MBSE lam hian nimin chawhma lamah he thil thleng chungchang report chu sawrkarah an thehluh tawh thu a sawi bawk.

Education Minister Lalchhandama Ralte chuan, he thil thleng chungchang enfiah a, chhui a, thil ti sualtu hrechhuak tura chhui turin School Education Director, James Lalrinchhana chu ruat a nih thu leh hemi chungchang chhuina ah hian Govt. Mizo Higher Secondary School-a Principal Charge la mek chu a mawhphurhna chelh mek atanga chawlh tir a nih thu pawh a sawi a, a aiawh tur pawh ruat fel a ni thu a sawi bawk.

Education Minister chuan, MBSE in zirlaite result fello chungchangah hma an la chak tih pawh sawiin, result a chhuah hnua sawrkar Working Day hmasa ber atanga hma an lak thu leh zirlaite hma khaw ngaia an chetna chu fakawm a tih thu a sawi a. Internal Mark te thehluh a nih loh avanga zirlai fail tawha ngaih mi 25 zingah result siamthat leh hnuin mi 23 chu pass in mi 2 an fail thu a sawi a, zirlai pass leh ta mi 23 zinga mi 2 chu Distinction an pass in, mi 10 chu First Division-ah an pass a, midang 10 te chu Second Division-ah pass in, mi pakhat Third Division-ah a pass tih a sawi bawk.